Bohlale bjo bo sa felego – Letšatši 11

₁Tumelo ke bonnete bja tše re holofelago gore di tla hlaga, ke go kgolwa tše re sa di bonego.

₃₂Go hlwa go iša pele ka tše dingwe go thušang? Gape ge nka re ke le botša ka tša Gideone, Barake, Simsone, Jefta, Dafida, Samuele, le baprofeta, nako e ka ba ya mphelela. ₃₃Ka lebaka la tumelo ya bona ba be ba elwa le magoši ba a fenya. Ba be ba dira tše di lokilego, gomme Modimo a ba putsa ka mo a holofeditšego ka gona. Ba tlema ditau melomo, ₃₄ba tima mello ye e gaketšego, ba phonyokga go bolawa ka tšhoša. Ba be ba fokola, fela ba tia maatla; e be e le bagale ntweng gomme ba fenya madira a bašele. ₃₅Basadi, ka lebaka la tumelo ya bona, ba be ba tsošetšwa batho ba bobona ba ba hwilego.

Ba bangwe ba bolawa ka sehlogo, ba gana go lokollwa, e le gore ba tle ba tsošetšwe go phela bophelo bjo bokaone.

₇Gape re phela re dumela go Morena, e sego re mmona.

₉Ge o bega gore Jesu ke Morena mme o dumela gore Modimo o mo tsošitše bahung, o tla phološwa. ₁₀Gobane motho o lokafatšwa ka go dumela, mola ka go bega tumelo yeo a phološwa.

₂₄“Ruri, ruri, ke le botša gore yo a theeletšago tše ke di bolelago mme a dumela go yo a nthomilego, o šetše a na le bophelo bjo bo sa felego. A ka se tšwewe, ka gore o šetše a tlogetše tsela ya go ya lehung, o swere ya go ya bophelong bjo bo sa felego.

₄₀Se Tate a se nyakago ke gore mang le mang yo a bonago Morwagwe mme a dumela go yena, a be le bophelo bjo bo sa felego, gomme nna ke tla mo tsoša ka tšatši la mafelelo.”