Bileditšwe go hlokomela – Letšatši 22

₁Bohle ba e lego makgoba ba swanetše ba bone beng ba bona e le ba ba lebanwego ke tlhompho ye e feletšego, gore go se be le motho yo a nyefolago Modimo goba thuto ya rena. ₂Makgoba ao beng ba ona e lego badumedi a se ke a ba nyatša, gobane ke badumedikabona. A a upše a ba šomele gabotse le go feta, ka gobane ba ba holegago ka modiro wa ona ke badumedi bao ba ratwago.

O rute batho ka go realo, o ba begele ditaba tšeo. ₃Ge eba go na le yo mongwe wa go ruta batho dišele, wa go se dumele thuto ya nnete e lego ya Morena wa rena, Jesu Kriste, le tša thuto ya bodumedi bja rena, ₄yo mobjalo ke moikgogomoši yo a sa tsebego selo. Sa gagwe ke go tšea kgang le go ngangišana ka tlhalošo ya mantšu, gona go tswalago mahufa le ditshele le lesebo le dikgopolelo tše mpe, ₅le kgang ya go se fele – dilo tše di tšwago bathong ba ba senyegilego menagano ba ba sa tsebego nnete. Ba hloma nke bodumedi ke mokgwa wa go ikhumiša.

₆Bodumedi bjona bo humiša motho kudu ge eba a kgotsofala ka se a nago le sona. ₇Gape ga se ra tla le selo mo lefaseng, gomme le go tloga re ka se kgone go tloga le selo mo go lona. ₈Ge re na le dijo le diaparo re kgotsofale ka tšona. ₉Ba ba nyakago go huma bona ba wela molekong, gomme ba tanywa ke ditumo tše dintši tša botlaela tša go bolaiša batho le go ba phonkgetša tahlegong le tshenyegong. ₁₀Gape go rata tšhelete ke wona modu wa makgopo ka moka. Ba bangwe, ka lebaka la go e duma kudu, ba kgelogile tumelong mme ba itlišetša masetlapelo a mantši.

₁₁Ge e le wena, motho wa Modimo, dilo tšeo o di tšhabe. O katanele go loka le borapedi le tumelo le lerato le kgotlelelo le boleta. ₁₂O gakale ge o šiana mošianong wo mogolo wa tumelo, o tle o ithopele bophelo bjo bo sa felego, gobane o bileditšwe bophelong bjo mola o ipega tumelo ka sebete mo pele ga dihlatse tše dintši. ₁₃Ke go laya Modimo, Mophedišatšohle, le Kriste Jesu yo a ilego a ipega tumelo ka sebete mo pele ga Pontiose Pilato ba le gona, ₁₄gore o botegele go phetha ditaelo o se na bosodi, go fihlela Morena wa rena, Jesu Kriste, a tšwelela.