Dikenywa tša Moya – Letšatši la 3

Moshe a re: “Aowaowa, Mong wa ka, nka se ye. Ga se nke ka ba seboledi, le gonabjale ge o bolela le nna, mohlanka wa gago, ga se ka fetoga seboledi. Ke lešaedi la polelo, ke a gakanega ka itoma diteme.” Morena a re go Moshe: “Ke mang yo a fago motho molomo? Ke mang a dirago motho semuma goba sefoa? Ke mang a mo fago sefahlego goba a mo foufatša? A ga se nna, yena Morena? Bjale sepela; ke tla go thuša go bolela, le gona ke tla go botša se o swanetšego go se bolela.” Eksodose 4:10-12

Bjalo ka Bakriste, gantši re bolela gore re nyaka go hlankela Modimo – go fihlela ge re bitšwa go hlankela! Gomme, re dira se Moshe a se dirilego; re dira mabaka. “Ga ke lokologele seo” goba “Ga ke na tsebo ya sona” goba “Go na le motho yo a loketšego kudu go feta nna!” Na se se kwagala se tlwaelegile?

Modimo ga a bitše ba maatlafaditšwego; o maatlafatša ba a ba beditšego.

O re maatlafatša ka dimpho le ditalente go mo hlankela, gomme gantši, ka ditsela tše di sa letelwago. Modimo ka mohlolo a ka ba a neile Moshe mpho ya polelo, eupša a se dire seo. Modimo o mo neile Arone go bolela legatong la gagwe. Go oketša moo, naa Modimo o re maatlafatša bjang go mo hlankela? Re ka bala karabo go 2 Timotheose 3:16-17, “Mangwalo a Makgethwa ka moka a ngwadilwe ka go huetšwa ke Modimo,a gomme a hola go ruta therešo, go kgala ba ba fošago, go sokolla batho, le go laya batho gore ba phele ka tshwanelo, gore motho yo a ineetšego Modimo e be yo a kgonago gape a loketšego go dira mediro yohle ye mebotse.” Ge o nyaka go maatlafatšwa go dira selo le ge e le sefe se Modimo a go kgopelago sona, o hloka go bala lentšu la gagwe. Fomula ya Modimo e bonolo; ithute lentšu la gagwe go hwetša mabokgoni le dithulusi tše di nyakegago go mo hlankela. Ka gona, ge o ikwa o ka re ga o na mabokgoni goba dithulusi go mo hlankela, ke ka gobane ga re be le nako e lakanego ya go ithuta lentšu le go le šomiša.