Dikholofetšo tše botse tša Modimo – Letšatši la 15

Boloki le go ikemišetša go abela ba bangwe ga di bonolo go batho ka moka. John Wesley a hlomilwego Kereke ya Methodist o boletše phatlalatša a re: “Karolo ya mafelelo ya motho ye e phološwago, ke sepatšhe sa gagwe.”

Se se ka se bolelwe ka Josefa wa go tšwa Arimathea. O be a le morutiwa wa Jesu ka siphiring le moleloko wa Kgorokgolo ya Bajuda, monna wa mohumi yo ditiro tša gagwe di laeditšego boloki.

Ka lehu la Jesu, Josefa o bile le khuetšo ya go boledišana le Pilato moo a kgopetšego gore mmele wa Jesu o fiwe yena. Pilato a dumela.

Josefa a fološa mmele wo o bego o tletše ka dikgobalo le madi wa Jesu sefapanong gomme a o phuthela ka mašela a maswa. A bea mmele wa Jesu ka lebitleng la gagwe le le bego le gwailwe leswikeng.

A tswalela lebitla ka go kgokološetša leswika mojakong gomme a sepela.

Se ke se re se tsebago ka Josefa wa go tšwa Arimathea, eupša a ka se lebalwe. Kanegelo ya gagwe e ngwetšwe go diEbangedi ka moka tše nne. O tla gopolwa go ya go ile bjalo ka monna wa go loka yo a šomišitšego khuetšo ya gagwe le tšhelete go hlankela mong wa gagwe ge bao ba bego ba le kgauswi le Morena wa rena ba tšhabile.

Temana ya rena ya lehono e holofetša balatedi ba Jesu, bao bjalo ka Josefa ba šomišago tšhelete ya bona gabotse, ba ikgobokeletša mahumo a moya legodimong. Ke kholofetšo ye re hlokago go e tšeela godimo le go e diriša.