Dikholofetšo tše botse tša Modimo – Letšatši la 17

Ga go o tee wa rena yo a lego mo lefaseng ka phošo. Modimo o na le leano le morero go yo mongwe le yo mongwe wa rena. Polelo ya gore “Modimo o šomiša ba a ba kgethago” ke nnete le go bofa go Bakriste ka moka.

Go ya mafelelong a boruti bja gagwe le sefapano se se bego se etla, Jesu a rapelela barutiwa ba gagwe:“Ke ba roma lefaseng boka wena mola o nthoma lefaseng” (Johanese 17:18).

Go amogela Morena Jesu bjalo ka Mophološi ke tsela fela ya go phološwa go sebe gomme wa hwetša bophelo bjo sa felego. Ka kgaugelo ya Morena, Bakriste ba na le monyetla wo o sa lefelwego gomme go bohlokwa kudu gore ba lemoše ba bangwe ka ditaba tše botse tša Modimo go Jesu Kriste.

Mokriste yo mongwe le yo mongwe o bileditšwe go rera Ebangedi. Ba bangwe ba šomiša dineo tša bona tše ba filwego ke Modimo bjalo ka mošomo, ba bangwe ba šomiša dineo tša bona ka go nea bohlatse goba thekgo ya bona ya boineelo ya Kereke le mekgatlo ye e ikgafilego go morero o bjalo.

Ka Afrika Borwa re šegofetše ka gore re na le tokologo ya go rapela. Re ka, ntle le letšhogo la go sekišwa, tšwela pele le ditiro tša go rera Ebangedi gomme go seo re tsebagatša lerato le legolo la Modimo go batho. Batho ba bantši ba dira bjalo ka go dira gore lentšu la Modimo le be gona.

Go na le dihlopha tša batho ba ba sepelago, kitimago, sesago ka diketswana le go rutha go kgoboketša ditšhelete tša diBibele. Word Riders, sehlopha se se e thaopilego sa basepela ka dithuthuthu, ngwaga o mongwe le o mongwe ba nea bana ba dikolo diBibele ditšhabeng tše di diilago. Ba bangwe bao ba sa dirego mediro ye e nyakago maatla ba dira gore lentšu la Modimo le be gona ka setlamo sa Bibele ka kgwedi sa Mokgatlo wa Bibele.

Ka moka ke badiri-mmogo le Kriste ge ba bjala peu ye botse ya Ebangedi. Ba na le monyetla le lethabo la go ba karolo e bohlokwa ya Thomo e Kgolo le go tliša tumišo le tlhompho go Modimo.

Ake Modimo a re thuše ka moka go ka šomiša dineo tša rena gabotse go tirelo ya gagwe.