Dikholofetšo tše botse tša Modimo – Letšatši la 2

Pitšo ya Modimo e bile le dikholofetšo tše kgolo: Abramo, wena, nna le batho ka moka ba ka šegofatšwa ka yena. Re hloka go ba le tumelo ya Abramo le go amogela thato ya Modimo maphelong a rena. Abramo, ka mengwaga ye 75, o be a ikemišeditše go tlogela lefelo la gagwe la boiketlo, naga ya gabo le batho ba gabo go ya lefelong le a sa le tsebego, go obamela pitšo ya Modimo. Ge re araba pitšo ya Modimo, o re putsa go feta ka mo re swanetšego, lega go le bjalo moputso e ka se be wa semeetseng. Modimo o na le nako ya gagwe ya go dira dilo. Abramo o be a na le megwaga ye 99 pele Modimo a tiišetša kgwerano ya gagwe le go mo fa leina le leswa la Abrahama (Genese 12:5-7).

Go tšere batho ba Modimo meloko e mentši go kwešiša ditlamorago tša kholofetšo ya Modimo go Abrahama go maphelo a bona. Mateu go Ebangedi ya gagwe o tiišeditše taba ye botse – Jesu ke Mesia yo a holofeditšwego yo a bego a letetšwe nako ye telele.

O dirile se ka go dira lenaneo la lešika ka boJesu kgaolong ya gagwe ya pele. O ngwetšwe temaneng ya pele gore: “Ba lešika la boJesu Kriste, setlogolo sa Dafida, yo e bego e le setlogolo sa Abrahama, ba latelana ka mokgwa wo:”

Paulose o boletše gabotse gore kholofetšo ya Modimo go Abrahama e be e le ya bobedi Bajuda le Baditšhaba: “Gomme ge le le ba Kriste ke gona ge le le ditlogolo tša Abrahama, gomme le tla fiwa tše Modimo a le holofeditšego tšona le le bajalefa ba gagwe” (Bagalata 3:29).

Bophelo bja Abrahama ke seipone sa se bophelo bja rena bo swanetšego bo be sona. Ka Moya wo Mokgethwa le rena re amogetše pitšo go tšwa go Modimo – “Dumela go Morena Jesu”, gomme kholofetšo – “gomme o tla phološwa” (Ditiro 16:31).

Go araba pitšo yeo re swanetše go bea Modimo pele maphelong a rena. Eka Modimo a re fe kgaugelo ya go dira bjalo.