Dikholofetšo tše botse tša Modimo – Letšatši la 4

Kgoši Solomone a hlatlama bogošing e sa le yo monyenyane ka mengwaga ye 12. Ka go latela ditokišetšo ka moka tše Dafida a mo tlogeletšego tšona, a thoma go aga tempele Thabeng ya Moria.

Mengwaga ye 20 pušong ya gagwe, go agwa ga tempele le letago la yona ka moka, le mošate wa gagwe, go ile gwa phethwa gomme Solomone a kgotsofala. E bile ka nako yeo mo Modimo a tšweletšego go yena ka kholofetšo ye kgethwa ye e lego temana ya rena lehono.

Lega go le bjalo, e be e na le temošo. Ge Solomone a ka hlanogela Modimo gomme a lahla ditaelo le melao ye a mo filego yona, Modimo o tla tumola Israele nageng gomme tempele e tla ba mokgobo wa marope (2 Dikronika 7:19-21).

Pušo ya Solomone e be e le nako ya khutšo le boiketlo ya mmušo wa Bajuda, eupša e be e na le dipeu tša phedišo ka gare go yona.

Basadi ba bantši ba šele ba Solomone ba bile le seabe se sebe go tumelo ya gagwe: “… gomme ka nako ye a tšofala ba be ba šetše ba mo gogetše medimong e šele. O be a sa khunamele Morena Modimo wa gagwe ka botlalo, a sa swane le Dafida, tatagwe” (1 Dikgoši 11:4).

Go be go sena motho yo a fetago Solomone ka lehumo, lega go le bjalo batho ba gagwe o be a ba lefiša motšhelo o boima. Ge morwa wa gagwe, Rehabeamo, a mo hlatlama bogošing o ile a oketša morwalo wa bona wa motšhelo.

Israele ya tsoša mpherefere. Tše lesome tša dikgoro tše 12 tša lesa Rehabeamo bjalo ka kgoši ya bona (1 Dikgoši 12:16). Ba kgetha Jerobeamo yo a bego a khunamela medingwana bjalo ka kgoši ya bona.

Mengwaga ye 400 morago ga go agiwa ga tempele, Jerusalema ye e hlaselegago gabonolo e fentšwe ke Bababilonia. Motse wa kgerešwa gomme mahumo a wona a thopša. Batho ba bantši ba bolawa gomme ba bangwe ba išwa bokgobeng. Tempele ya Solomone ya ba marope.

Go na le thuto mo go rena ka moka: Modimo wa rena ga a swanela go nyenyefatšwa. Ge re nyaka go hwetša dikholofetšo tša gagwe tše kgethwa, ga re a swanela go hlokomologa ditaelo tša gagwe. Moya wo Mokgethwa o re laetša ka fao.