Dithuto tša bophelo go tšwa Bibeleng – letšatši la 1

Jafta o belegetšwe Gileade, ka 1200 BC, nakong ya lebaka la Baahlodi. Tatagwe o be a nyetše mosadi o mongwe gomme a na le barwa le yena. Mmago Jafta e be e le segwebakathobalo.
Bararragwe ba be ba bo kwera gomme ge ba godile, ba mo raka. O ile a tšhabela Tobe, moo a ilego a kgoboketša sehlopha sa bahlabani. Ba bile sehlopha sa bahlabani ba bogale ba ntwa gomme Jafta a tuma bjalo ka mohlabani yo bogale.

Ge Baamone ba elwa le Baisraele, baetapele ba Gileade ba ya go Jafta ba tšhogile. Ba ile ba mo rapela gore e be molaodi wa madira a bona. Jafta, ka go befela, a ba fetola a re, “… Le ile la ntlhoya la ba la nthaka lapeng la tate. Ke ka lebaka lang le etla go nna bjale ge le le bothateng?”(Baahlodi 11:7).

Ba fetola ba re, “Lega go le bjalo re a go kgopela ga bjale. Sepela le rena, e lwa le Baamone gomme re tla go dira mmuši wa rena.”

Nagana ka maikutlo ao Jafta a bilego le wona. Ka lebaka la go belegwa ga gagwe, o ile a nyatšwa le go rakwa, ga bjale o memilwe go ba moetapele wa setšhaba sa gabo Jafta o ile a boela Gileade gomme ka katlego a ba etela pele gore ba fenye. Kanegelo ya Jafta ke tshwantšhetšo ya nnete e kgolo ya Bibele. Bagileade sa pele ba be ba swanetše go mo amogela bjalo ka mmuši wa bona pele a ba phološa.

Le rena gape re swanetše go ba le kwešišo e botse mabapi le dilo tše di tlago pele maphelong a rena. Ge re nyaka gore Kreste e be Mophološi wa rena, re swanetše go mo amogela bjalo ka mmuši wa rena. Ge fela re obamela borena bja gagwe, re tla phološwa. O swanetše go amogelwa bobedi bjalo ka Morwakgoši le Mophološi, ka gobane Modimo o mo dirile bobedi Morena le Kriste (Ditiro 2:36; 5:31).