Ditswalano – Letšatši la 13

Go gweba ka batho ke ye nngwe ye kgolo ya ditiro tša go hloka toka tše di dirwago kgahlanong le motho yo mongwe le yo mongwe. Batšwasehlabelo ba a tšewa go tšwa go bophelo bja tokologo, tikologo ye e tlwaelegilego le go baratwa ba bona go ya go maemo ao a sa tlwaelegago, gomme gantši, a kotsi, ao a sa lokelago gore motho a ka phela go ona. Go ya ka Nicolas Kristof, mongwadi-mmogo wa puku, Half the Sky, bokgoba bja sebjalebjale ke kgwebo ya boitshwaro bja go ba le molato ge bo bapetšwa le kgwebo ya makgoba a Afrika ya ngwagakgolo wa 18 le 19.

Go tlhabologo ya kgale, bokgoba e be e le tshwaro e mpe ye e tlwaelegilego magareng ga ditšhaba, ke ka lebaka leo kanegelo ya mosetsana yo a tšerego nageng ya gabo go tlo ba mosetsana wa lekgoba go mosadi wa molaodi wa Siria, e kgahlišago (2 Dikgoši 5).

Bolwetši bja letlalo bja Naamane, monna wa monggadi wa gagwe, bo kgwathile pelo ya mosetsana: “Nke nkabe mong wa ka a eya go moprofeta yo a dulago Samaria! Yena o be a tla mo fodiša bolwetši bja gagwe” (2 Dikgoši 5:3). Ka tumelelo ya kgoši, Naamane le semeetseng o ya Israele go yo hwetša monna yo a kago mo alafa. Taelo ya moprofeta ka motseta wa gagwe e be e hlakile gape e le bonolo – o be a swanetše go yo hlapa gašupa nokeng ya Jorodane – taelo ya go nyamiša le go tlontlolla go Naamane. O ganne, eupša bahlanka ba gagwe ba mo kgodiša go re a leke taelo yeo. Morago ga go nwelela la bošupa ka nokeng ya Jorodane, dipoelo di be di swana le ka mo moprofeta a boletšego: “Nama ya gagwe ya boela ya hlweka ya swana le ya ngwana yo monnyane” (2 Dikgoši 5:14). O ile a thaba kudu ka Modimo wa Elisha, moo a dumetšego go Yena gomme a tšea sepheto sa gore go ya pele o tla direla Morena fela dihlabelo tša go tšhungwa le dihlabelo (2 Dikgoši 5:17).

Mosetsana, yo a bego a na le mabaka ka moka a go phela a apere diaparo tša go ilela le melora ka lebaka la maemo a gagwe, o bile morwadi wa taba ye botse ya phološo le phodišo! Legaeng la lenaba la gagwe o laeditše tumelo le go matlafatša tswalano ye botse le mong wa gagwe. Se se diregile ka gobane o be a tseba Modimo wa Elisha – Modimo wa di sa kgonege!

Mohlomongwe re swanetše go ipotšiša gantši gore: Nka, ge ke swanetše go phela goba go šoma le batho ba thata goba go swarwa gampe, dira phapano le ge ke ikhwetša ka gare ga maemo a sa amogelegego? Ekaba tumelo ya ka go Modimo le bokgoni bja Gagwe di tiile le go bolokega mo ke ratago go bolela? Ekaba ke phela tebalelo? Ekaba nka bolela ntle le dihlong le go dikadika go motho ofe goba ofe yo a hlokago gore: “Ge feela o ka ba le Yo a fetotšego bophelo bja ka?”