Ditswalano – Letšatši la 14

Go Johanese 4 re bala kanegelo ya mosadi wa boitshwaro bjo lešago dihlong yo Jesu a thomago poledišano le yena ka go mo kgopela meetse. Phetolo ya gagwe go kgopelo ya Ggawe e butše lemati la gore a bolele dinnte ka Yena tšeo di tlago fetola bophelo bja gagwe go ya go ile. Ke meetse a a phelago, mothopo wa meetse a a neago bophelo bjo bo sa felego. Lega go le bjalo, pele a ka mo nea meetse a a phelago, o be a swanetše go amogela nnete ya yo ka nnete e lego yena le go lemoga gore Ke Mesia, Kriste, yo mang le mang a bego a mo letetše. Mantšu a Gagwe, “Ke nnaena yo a bolelago le wena yo” (Johanese 4:26), a mo dira gore a kitime. O wiša moeta wa gagwe wa meetse gomme a kitimela motseng go botša batho ka monna yo a tsebago dilo ka moka ka bophelo bja gagwe: “A re yeng le yo bona motho yo a mpoditšego tšohle tše ke ilego ka di dira. Afa ga se yena Mesia?” (Johanese 4:29).

Lemoga ka fao batho ba motse ba ikarabetšego go bopaki bja gagwe: ba tšwa motseng, ba ya go Yena (Johanese 4:30) gomme ba mo phegelela gore a dule le bona (Johanese 4:40). Mathomong ba be ba dumela ka lebaka la bopaki bja mosadi: “Basamaria ba bantši ba motse woo ba ile ba dumela go Jesu ka ge mosadi yola a be a ba boditše a re: ‘O mpoditše tšohle tše ke ilego ka di dira’ ” (Johanese 4:39). Le ge morago ga matšatši a mabedi ba na le Yena le go theeletša mantšu a Gagwe, ba re: “Bjale ga re sa dumela ka lebaka la tše di boletšwego ke wena, eupša ke ka lebaka la ge rena beng re mo kwele, gomme re lemogile gore ka nnete ke yena Mophološi wa lefase” (Johanese 4:42).

Wena le nna re na le morero o tee – go bolela ka taba ye botse ye Jesu a e dirilego maphelong a rena! Ga go hlokege mantšu a kgoketšo, kgodišo goba go bolela ka bothakga, ke fela bopaki bja nnete bja se A se dirilego. Ga e hloke diteng tša go kgahliša, eupša e anega kanegelo ya nnete ya Jesu Kriste yo a tseneletšego ka gare ga bodutu, bohloko, bolwetši, manyami, go se šome, le le go fetoša maphelo a rena.

Bjalo ka mosadi yo, wena le nna re no ba batho fela bao ba tlišago bopaki bja rena le go kitimela pele go lefelo leo a letetšego batho. Lentšu la Gagwe, bogona bja Gagwe, Yena ka Noši ke Mothopo wa tumelo ye e tiilego ya batho. Monyetla wa go bontšha batho tsela ka taba ye botse maphelong a rena ke sona se e lego sona – monyetla. Ke Morena fela yo a hwetšago tlhompho le letago ge maphelo a batho a fetola ke yona.