Ditswalano – Letšatši la 2

Go a tsebega gore thaloko e ka matlafatša megopolo ya bana le go oketša tšwelopele le kgolo ya monagano, le go bopa dikamano tše mpsha tša megalatšhika. Maikwelong, go raloka ke tsela ya go ntšha maatla le kgateletšo; e dira gore o iketle le go tsošološa lerato le go thabela bophelo – kudukudu maphelong a batho ba bagolo.

Lega go le bjalo, mohola o bohlokwa kudu wa go raloka ke gore o kgothaletša ditswalano magareng ga batho. Ge poledišano ya thaloko le kamano e le ye bohlokwa, e hlagolela moya wa boiketlo le kamano ye bonolo gape le tswalano ya kgauswi.

Tsela e tee ya go kgona go ka raloka ke go lebelela ka fao bana ba bapalago ka gona. Dipapadi tša bona tša bokgoni bja go hlama, tša boikgopolelo tša go akanywa tša ditau le dikwena, bomma le bopapa ka bana ba dipopi tša pampiri, basenyi le bagale, di a atlega ka go hlola kamano. Ba a befela, ba lla, le go binela kopelo ye e “bapalago” ka dipelong tša bona. Ba raloka ka ditaba tše mabapi le bophelo ka bokamorago le go hwetša gape kopanelo ye e ba thabišago. Se ke ka fao Jesu a hlalošago bana ba ba ralokago: “Ba swana le bana ba ba dutšego mapatlelong a motse ba goelelana ba re: ‘Re le leleditše dinaka, la se bine! Ra le retela sereto sa mahloko, fela la se lle!’ ” (Mateu 11:16-17).

Ga gona bohlatse bja gore Jesu o be a raloka dipapadi le bana, eupša go na le bohlatse bja gore o be a ba fa nako ya Gagwe. Go yena ba be ba le mohlala wa boitshwaro bjo batho ba bagolo ba swanetšego go bo bontšha ge ba amogela mmušo wa gagwe (Mateu 19:13). Mohlomongwe o be a itšweletša bjalo ka motho yo a ka thabelago go raloka le bana gore ba dule diropeng tša gagwe ka ntle le go dikadika a ba gokarela le go dula ka setu ge a le gare A ba šegofatša. Ga se a dikadika go kgala barutiwa ka tsela ye ba ilego ba swara bana ka yona.

O be a tšeela barutiwa ba gagwe thopeng kgafetšakgafetša. Dinakong tšeo tša tswalano ya kgauswi O be a ba botša se se lego ka pelong ya Tatagwe gomme a ba tlatša ka kholofelo ya bokamoso. Ka dithutišo tša gagwe, diswantšho le ka tsela ye A dirilego dilo, o hlodile boemo moo batho ba kago ba le tswalano le Yena gabonolo le go bolela dinyakwa tša bona.

O ka botšiša: “Go raloka” go tsena kae mehlaleng ye? Wa bona, go raloka go nyaka gore o dire nako go šetulo ya gago ye e tletšego. Se ke sona se Jesu a se dirilego – O hlodile ka boomo dinako moo A, bomothong bja Gagwe, tlago ba motho ka nnete go ba bangwe gore ba kgone go itemogela tswalano ya nnete.

Ke ipotšiša gore: ge go raloka go kgontšha go hlagolela le go matlafatša ditswalano, ke ka lebaka la eng re hwetša go le boima go raloka ka boomo?