Ditswalano – Letšatši la 20

Ge a botšišwa gore maele a gagwe ke afe go motho yo a nago le bolwetši bja kgateletšego ya monagano le go hloka lethabo bophelong, mosaekholotši wa go tuma, Karl Messinger, o rile: “Notlela ntlo ya gago, o sepele go putla seporo, o hwetše motho yo a hlokago thušo gomme o dire se sengwe go thuša motho yoo.”

Ka tsela ye e swanago, Jesu o file karabo e maatla: “Ge motho a nyaka go ba molatedi wa ka, a ikone, a ikemišetše go tlo tlaišwa bjalo ka nna, mme a ntatele. Gobane yo a ipabalelago o tla lahlega; eupša yo a itatolago ka lebaka la ka o tla phelela sa ruri” (Lukase 9:23-24).

Se Jesu a se hlalošago ke gore motho yo a nyakago go ithabiša o tla boa a sa swara selo, eupša ge a dula le Yo e lego Mothopo wa lethabo, o tla boloka bophelo bja gagwe.

Seretong se se ngwetšwego ke Dafida, o bolela ka hlase ye e tlišago lethabo bophelong bja motho – phološo: “Buša o mphe lethabo la motho yo o mo phološitšego, mme o dire gore ke rate go go theeletša” (Pesalome 51:12). Petrose o bušeletša therešo ye: “Gape le a mo rata, le ge le se la ka la mmona, ebile le dumela go yena, le ge bjale le sa mmone. Ka gona le thaba ka lethabo le legologolo leo motho a sa kgonego go le hlaloša” (1 Petrose 1:8). Bjalo ka Jeremia, modumedi wa Mokriste gape o humana lethabo mantšung a Morena: “Mola o bolela le nna ke be ke go hlwaela tsebe. Ke nna wa gago, wena Morena, Modimo Ramaatlaohle, gomme ke ka lebaka leo mantšu a gago a nthabišago, ka hlalala” (Jeremia 15:16).

Ke ka lebaka la eng re bona batho ba bantši bao ba sa thabago kgauswi le rena? Ditiragalo tša ka morago ga Mangwalo a a ngwetšwego ka godimo di tliša tše e ka bago dibaki tše di fedišago lethabo.

Batho ba dira dibe ka boomo, bjalo ka Dafida le Batseba, gomme ba leke go di uta goba go di gana. Go dumela, boitsholo bja kgonthe le go kgopela tebalelo di bušetša lethabo le legolo la mosenyi (Pesalome 51).

Batho ba ba sa dumelego gore Modimo ke Yo a rego ke Yena (Jeremia 15:6), ga ba kgone go ipolela ka dipelo tša bona ka moka: “Mong wa ka ke wena; ga go se se nkgahlago ntle le wena” (Pesalome 16:2).

Lentšu la gagwe e bile taba ya ka thoko maphelong a bona – leotwana la bohlano go mohlahli. Mohlomongwe nako e fihlile ya gore o je Lentšu ka megabaru gape go kgothaletša lethabo le tlhalalo.

Ke mang yo a tsebago, mohlomongwe nakong e tlago re tla kopana seporong, re nyaka batho ba ba hlokago hlase ye e tlišago lethabo la Gagwe maphelong a bona.