E100 Letšatši 100 – Jerusalema ye Mpsha

₁Ka bona legodimo le lefsa le lefase le lefsa. Legodimo lela la pele le lefase la pele di be di tlogile, le lewatle le timeletše. ₂Ka bona motse wo mokgethwa, Jerusalema ye mpsha, o theoga legodimong go Modimo, o kgabišitšwe bjalo ka monyadiwa yo a tšhepetšego monyadi wa gagwe. ₃Ka kwa lentšu le goelela kudu le etšwa setulong sa bogoši le re: “Bjale Modimo o dula le batho. O tla phela le bona, bona ya ba ditšhaba tša gagwe. Yena mong o tla ba le bona, ya ba Modimo wa bona. ₄O tla ba phumola meokgo yohle. Go ka se sa ba le lehu goba manyami goba dillo goba bohloko. Dilo tšela tša kgale di fetile.”

₅Yo a dutšego setulong sa bogoši a re: “Bona, dilo tšohle ke di dira tše mpsha!” A ba a re go nna: “Ditaba tše di ngwale, ka gobane ke tša nnete ebile di a tshepega.” ₆A ba a re: “Go phethegile! Ke nna Alfa le Omega, Mathomo le Bofelo. Yo a nyorilwego ke tla mo noša mothopong wa meetse a bophelo a sa a lefele. ₇Tšeo ka moka ke tla di fa yo a ka fenyago, ka ba Modimo wa gagwe, yena a ba morwa wa ka. ₈Eupša mafšega le bakgelogi le dihlola le babolai le difebe le boramaselamose le bakhunamelamedingwana le bafeane ka moka – gabobona ke ka bodibeng bja mollo wo o tukago tshebela, ke lona lehu la bobedi.”

₉Yo mongwe wa barongwa bale ba šupago ba ba bego ba swere meruswana ye e šupago ye e swerego dikotlo tše di šupago a tla go nna a re: “Etla ke go bontšhe monyadiwa, mosadi wa Kwana.” ₁₀Ka tsenwa ke Moya, gomme morongwa yola a nkukela ntlhoreng ya thaba ye e phagamego kudu. A mpontšha Jerusalema, motse wo mokgethwa, o theoga legodimong go Modimo ₁₁o phadima letago la Modimo. O be o phadima bjalo ka magakabje a bohlokwahlokwa, o etša jaspere, o bonatša go swana le legakadima. _12-13O be o ageleditšwe ka morako wa go phagama kudu, wo o nago le difero tše lesome le tše pedi: tše tharo ka bohlabela, tše tharo ka leboa, tše tharo ka borwa, tše tharo ka bodikela. Sefero se sengwe le se sengwe se be se letilwe ke morongwa, gomme mo seferong se sengwe le se sengwe go ngwadilwe leina la ye nngwe ya dikgoro tše lesome le tše pedi tša Israele. ₁₄Morako wa motse o be o agilwe godimo ga maswika a lesome le a mabedi a motheo, ao godimo ga ona go bego go ngwadilwe maina a baapostola ba lesome le ba babedi ba Kwana. ₁₅Morongwa yoo wa go bolela le nna o be a swere thupakelo ya gauta ya go ela motse le difero tša wona le morako wa wona. ₁₆Motse woo o be o na le dikhutlo tše nne; botelele bja wona bo lekana le bophara. Morongwa a o ela ka thupakelo ya gagwe, a hwetša o na le botelele bja dikilometara tše dikete tše pedi le makgolo a mane, bjo bo lekanago le bophara le bogodimo. ₁₇A ela le morako wa motse, mme wona wa hwetšwa o na le dimetara tše masome a a selelago le metšo ye e šupago go ya godimo go ya ka kelo ye e tsebjago ye a bego a ela ka yona. ₁₈Morako wa gona o be o agilwe ka magakabje a mebalabala, gomme motse ka bowona o agilwe ka gauta ye e sego ya tswakwa, e le ye e bonatšago bjalo ka galase. ₁₉Maswika a motheo wa morako wa motse a be a kgabišitšwe ka magakabje a mehutahuta. Leswika la mathomo la motheo le be le kgabišitšwe ka legakabje la go ya bohwibidung, la bobedi e le le botala bja leratadima, la boraro e le le lenala, la bone e le la botala bja morogo, ₂₀la bohlano e le la mebalabala, la boselela e le le lehwibidu, la bošupa e le le modipa, la seswai e le la go ya botalawatleng, la senyane e le le modipa, la lesome e le le letalabosehla, la lesome le motšo o tee e le la botala bja leratadima, la lesome le metšo ye mebedi e le la bohwibidu bja go retela. ₂₁Difero tšeo tše lesome le tše pedi e be e le tša diperela tše lesome le tše pedi, gomme sefero se sengwe le se sengwe se dirilwe ka perela e tee. Mebila ya motse e be e le ya lebato la gauta ye e sego ya tswakwa ye e bonatšago bjalo ka galase.

₂₂Ke ile ka se ke ka bona tempele moo motseng, ka ge tempele ya wona e le Morena Modimo Ramaatlaohle le Kwana. ₂₃Motse woo ga o nyake go bonegelwa ke letšatši goba ngwedi, ka gobane o bonegelwa ke letago la Modimo, gomme Kwana ke lona lebone la wona. ₂₄Batho ba ditšhaba tša lefase ba tla phela seetšeng sa wona, le magoši a lefase a tla tliša mahumo a ona go wona. ₂₅Difero tša motse wo di tla dula di butšwe nako ka moka, ka gobane moo go ka se be le bošego. ₂₆Mahumo a ditšhaba le dithoto tša bona tše bohlokwa di tla tlišwa motseng. ₂₇Eupša se se sego sa hlweka se ka se tsene motseng, ešita le yena motho wa sehlola le wa go dira tša bofora. Go tla tsena fela bao ba tla bego ba tlilo phelela sa ruri, bao maina a bona a ngwadilwego ka pukung ya Kwana.

₁Morongwa yoo o ile a mpontšha le noka ye e elago meetse a bophelo a go bonatša bjalo ka legakadima, e ela e etšwa setulong sa bogoši sa Modimo le Kwana. ₂Mokgahlong ga mmila wo mogolo wa motse le noka yeo go na le sehlare sa bophelo se se enywago ga lesome le metšo ye mebedi ka ngwaga, ke go re gatee ka kgwedi. Matlakala a sona ke a go fodiša ditšhaba. ₃Moo motseng go ka se hwetšwe selo se se rogilwego.

Setulo sa bogoši sa Modimo le Kwana se tla ba moo motseng, gomme bahlanka ba gagwe ba tla mo khunamela. ₄Ba tla bona sefahlego sa gagwe, gomme leina la gagwe le tla ngwalwa mo diphatleng tša bona. ₅Go ka se sa ba le bošego, ba ka se sa nyaka mabone goba seetša sa letšatši, ka gobane ba tla be ba bonegelwa ke Modimo, gomme ba tla buša go ya go ile.

₆Ke moka morongwa yoo a re go nna: “Mantšu ao ke a nnete ebile a a tshepega. Morena Modimo yo a fago baprofeta ba gagwe Moya wa gagwe o romile morongwa wa gagwe go tlo bontšha bahlanka ba gagwe tše di swanetšego go hlaga kgauswinyana.”

₇Jesu a re: “Theeletša! Ke kgauswi le go tla! Go lehlogonolo yo a phethago ditaba tša go porofeta tša puku ye!”

₈Yo a kwelego dilo tše ka moka gape a di bonego ke nna Johanese. Ya re ge ke di kwele ebile ke di bone, ka itahlela fase pele ga morongwa yola a mpontšhitšego tšona, ke re ke a mo khunamela. ₉Eupša yena a re go nna: “O se leke! Gape le nna ke mohlanka bjalo ka wena le banabeno, baprofeta, le ba ba phethago tše di ngwadilwego ka pukung ye. Yo o swanetšego go mo khunamela ke Modimo.” ₁₀A iša pele a re: “Mantšu a profeto a a lego ka pukung ye o se a dire sephiri, ka gobane nako ya gore taba tše di tle di phethege e kgauswi. ₁₁Yo a dirago tše mpe a a tšwele pele le go di dira; yo e lego wa ditšhila a a no phela a le bjalo; yo a lokilego a a tšwele pele le go loka ga gagwe, le yo e lego yo mokgethwa a a no phela a le bjalo.”

₁₂Jesu o re: “Theeletša, ke kgauswi le go tla! Ke tla le meputso ya ka gore ke tle ke fe yo mongwe le yo mongwe go ya ka mediro ya gagwe. ₁₃Ke nna Alfa le Omega, Wa pele le Wa mafelelo, Mathomo le Bofelo.”

₁₄Go lehlogonolo ba ba hlatswago diaparo tša bona mme ba lokelwa ke go ja dikenywa tša sehlare sa bophelo le go tsena motseng ka difero. ₁₅Eupša ka ntle ga motse go na le dihlola le boramaselamose le difebe le babolai le bakhunamelamedingwana le ba ba ratago tša bofora gape ba di dirago.

₁₆“Nna, Jesu, ke romile morongwa wa ka gore a tle a le begele ditaba tše le le diphuthegong. Ke nna Setlogolokhukhu sa Dafida; ke nna Mphatlalatšane, naledi ye e tagago ya masa.”

₁₇Moya le monyadiwa ba re: “Etla!” Mokwi wa ditaba tše le yena a a re: “Etla!”

Yo a nyorilwego a a tle. Yo a nyakago meetse a bophelo a a a hwetše a sa a lefele.

₁₈Nna, Johanese, ke lemoša bohle ba ba kwago ditaba tša go porofeta tša puku ye ke re: Ge motho a ka di oketša, Modimo o tla mo okeletša dikotlo tše di ngwadilwego ka mo pukung ye. ₁₉Ge motho a ka tloša se sengwe mo mantšung a puku ye ya profeto, Modimo o tla mo amoga tokelo ya gagwe ya go ja dikenywa tša sehlare sa bophelo le ya go dula motseng wo mokgethwa ye go ngwadilwego ka yona ka mo pukung ye.

₂₀Yo a hlatselago ditaba tše ka moka o re: “Ee, ke kgauswi le go tla!”

Amene! Etla, Morena Jesu!

₂₁Morena Jesu a gaugele bohle.