Bible Society of South Africa

E100 Letšatši 17 – Mošwana wa go Tuka Mollo

Mošwana wa go Tuka Mollo

(Di)temana ya Bibele

EKSODOSE 3

Modimo o bitša Moshe

1Ka letšatši le lengwe Moshe o be a dišitše dihuswane tša ratswalagwe Jetro, moprista wa Midiane. O be a fudišetša mohlape go ya bosobela lešokeng, a ba a fihla Horebe, thabeng ya Modimo. 2Gona moo morongwa wa Morena a iponagatša go yena ka kgabo ya mollo e lauma e etšwa gare ga mošwana. Ya re ge a lebelediša, a tlabega a bona mošwana o tuka mollo eupša o sa swe. 3Moshe a re: “Anke ke batamele ke bontšhiše semaka se: E reng mošwana o sa swe?”

4Ge Modimo a bona Moshe a batamela, a mmitša a le gare ga mošwana a re: “Moshe, Moshe!”

Moshe a araba a re: “Ke nna e!”

5Modimo a re: “O se ke wa batamela mo. Rola dieta tša gago gobane mo o emego gona ke felo mo gokgethwa. 6Ke nna Modimo wa borakgolokhukhu ba gago, Modimo wa Abrahama le Isaka le Jakobo.” Moshe a ipipa sefahlego ka gobane o be a tšhaba go lebelela Modimo.

7Ke moo Modimo a boletšego a re: “Ke bone gabotse ka moo setšhaba sa ka se tlaišwago ka gona kua Egepeta; ke kwele ba golola ba llela go hlakodišwa diatleng tša bahlapetši ba go ba šomiša sekgoba. Ke tseba mohlako wa bona ka moka. 8Ke fologetše go tlo ba hlakodiša diatleng tša Baegepeta le go ba ntšha Egepeta go ba iša nageng ye e nonnego ye e nabilego. Ke naga ya mokhora le monono yeo bjale e dulwago ke Bakanana le Bahete le Baamore le Baperise le Bahibe le Bajebuse. 9Ke kwele sello sa setšhaba sa ka, gomme ke bona ka moo Baegepeta ba ba gatelelago ka gona. 10Bjale ge, ke go roma go kgoši ya Egepeta gore o tle o ete setšhaba sa ka pele o se ntšhe nageng yeo.”

11Moshe a botšiša Modimo a re: “Ke nna mang nka yago go kgoši le gona ka ntšha Baisraele Egepeta?”

12Modimo a mo fetola a re: “Ke tla ba le wena. E tla re ge o ntšhitše Baisraele nageng ya Egepeta, la tla la nkhunamela mo thabeng ye, ke moo o tlago lemoga gore o be o rongwa ke nna.”

13Moshe a mo araba a re: “Ge ke fihla go Baisraele ke ba botša ke re: ‘Modimo wa borakgolokhukhu ba lena o nthomile go lena,’ ba tla mpotšiša ba re: ‘Leina la gagwe ke mang?’ Ke ba botše ke reng?”

14Modimo a re: “Ke nna yo ke lego yena.” A tiišetša a re: “O ba botše o re: ‘KE NNA o nthomile go lena.’ 15O tsebiše Baisraele gore nna, Morena, Modimo wa borakgolokhukhu ba bona, Modimo wa Abrahama le Isaka le Jakobo, ke go romile go bona. Le ke leina la ka go ya go sa felego; ba meloko ka moka ya ka moso ba tla mpitša ka lona leina le. 16Eya o rape pitšo ya bagolo ba Baisraele o ba botše gore nna, Morena, Modimo wa borakgolokhukhu ba bona, Modimo wa Abrahama le Isaka le Jakobo, ke iponagaditše go wena, gomme ke go laetše gore o ba botše o re: ‘Ke be ke le etše hloko, gomme ka bona tše Baegepeta ba le dirago tšona. 17Ke ikemišeditše go le ntšha Egepeta, nageng ye le tlaišwago go yona, ka le iša nageng ya mokhora le monono, nageng ya Bakanana, Bahete, Baamore, Baperise, Bahibe le Bajebuse.’

18“Setšhaba sa ka se tla theeletša se o se bolelago. O ye le bagolo ba Baisraele go kgoši ya Egepeta, le fihle le mmotše le re: ‘Morena, Modimo wa Baheberu, o gahlane le rena; ka gona, re dumelele re sepele leeto la matšatši a mararo re tšwele lešokeng re yo direla Morena Modimo wa rena dihlabelo.’ 19Fela nna ke a tseba gore kgoši ya Egepeta e ka se le dumelele go ya, ka ntle le ge e ka gapeletšwa. 20Ka gona ke tla otlolla letsogo la ka, ka otla Egepeta ka mehlolo ye ke tlago e dira moo. Ka morago ga fao kgoši ya Egepeta e tla le lesa la sepela.

21“Ke tla dira gore Baisraele ba hwetše botho go Baegepeta, gore e tle e re ge setšhaba sa ka se huduga, se se tloge se le fela.

22“Mosadi yo mongwe le yo mongwe wa Moisraele o tla ya go moagišani wa gagwe wa Moegepeta, le go mosadi yo mongwe le yo mongwe wa Moegepeta yo a dulago le yena ka lapeng, a mo kgopela diaparo le dikgabišo tša gauta le tša silibera. Baisraele ba tla di apeša barwa le barwedi ba bona, ya ba ge ba hula Baegepeta.”

EKSODOSE 4

Modimo o fa Moshe maatla a go dira mehlolo

1Moshe a mo fetola a re: “Ge Baisraele ba ka se nkgolwe gomme ba gana go kwa tše ke ba botšago, ke tla reng ge ba ka re Morena ga se a iponagatša go nna?”

2Morena a botšiša Moshe a re: “Ka seatleng o swereng?”

Moshe a mo fetola a re: “Ke swere lepara.”

3Morena a re: “Le lahlele fase.” Ge Moshe a lahlela lepara lela fase, la fetoga noga, mme a tsaroga. 4Ke moka Morena a laela Moshe a re: “Otlolla letsogo o e sware ka mosela.” Moshe a hlaeletša letsogo a e swara, mme noga ya fetoga lepara. 5Morena a re: “O dire sona se go Baisraele go ba kgodiša gore Morena, Modimo wa borakgolokhukhu ba bona, Modimo wa Abrahama le Isaka le Jakobo, o iponagaditše go wena.”

6Morena a bolela le Moshe gape a re: “Anke o tsenye seatla ka seaparong kgareng.” Moshe a se tsenya, mme ge a se ntšha, a tšhoga se pherile se kgamathetše dipue tše tšhweu nke ke lehlwa. 7Ke mo Morena a itšego go Moshe: “Bušetša seatla ka seaparong kgareng.” A se bušetša, gomme ge a se ntšha gape, a makala se fodile se swana le mmele ka moka. 8Morena a re: “Ge ba ile ba se ke ba go kgolwa, goba ba se ke ba ušwa pelo ke mohlolo wa pele, wo wa bobedi wona o tla ba kgotsofatša. 9Ge ba ka fela ba sa go kgolwe le ge o ba diretše mehlolo ye mebedi ye, gomme ba se ke ba kwa seo o se bolelago, o ge meetse nokeng ya Naele o a kgaphetše fa go omilego. Meetse a tla fetoga madi fao.”

10Moshe a re: “Aowaowa, Mong wa ka, nka se ye. Ga se nke ka ba seboledi, le gonabjale ge o bolela le nna, mohlanka wa gago, ga se ka fetoga seboledi. Ke lešaedi la polelo, ke a gakanega ka itoma diteme.”

11Morena a re go Moshe: “Ke mang yo a fago motho molomo? Ke mang a dirago motho semuma goba sefoa? Ke mang a mo fago sefahlego goba a mo foufatša? A ga se nna, yena Morena? 12Bjale sepela; ke tla go thuša go bolela, le gona ke tla go botša se o swanetšego go se bolela.”

13Eupša Moshe a mo fetola a re: “Aowa hle, Mong wa ka, roma yo mongwe, e sego nna.”

14Morena a tukela Moshe bogale a re: “A ke re o na le morwarrago Arone, wa Molefi? Ke tseba gore yena o kgona polelo gabotse. Le gonabjale ge ke bolela šole o šetše a le tseleng go go gahlanetša, mme o tla thaba ge a go bona. 15O boledišane naye o mmotše gore a bolele a reng. Nna ke tla le thuša go bolela, ka ba ka le laetša gore le dire eng. 16Arone yena o tla go bolelela le setšhaba. E tla ba yena motseta wa gago, gomme wena o tla ba bjalo ka Modimo go yena, wa mmotša gore a bolele eng. 17Tšea lepara le o le sware; ka lona o tla dira mehlolo.”

EKSODOSE 3:1-4:17NSO00Bula go Mmadi wa Bibele

RAPELA pele o bala, kgopela Modimo a go thuše go kwešiša.
BALA tema ya Bibele ya letšatši – go feta gatee ge go kgonega.
SEKASEKA tema. Ngwala dikgopolo tša gago ka gare ga pukutšatši.
DIRA seo Modimo a o rutago go tšwa go Lentšu la Modimo bophelong bja gago.
RAPELA gape, kgopela Modimo gore o phele ka Lentšu la Gagwe.

Bible Society of South Africav.4.28.1
RE HWETŠE GO