E100 Letšatši 30 – Kanegelo ya Rute

₁Mehleng ya ge naga ya Israele e sa bušwa ke baahlodi, go ile gwa wa tlala nageng. Ka gona, monna yo mongwe wa motse wa Betlelehema, nageng ya Juda, a tloga le mosadi le barwa ba gagwe ba babedi go yo diilela nageng ya Moaba. ₂Leina la monna yoo e be e le Elimeleke, la mosadi e le Naume. Barwa ba bona ba babedi e be e le Maglone le Kilione. E be e le ba kgorwana ya Efrata ya Betlelehema, nageng ya Juda. Ge ba sa le moo Moaba, ₃Elimeleke a hwa, gomme Naume a šala a le noši le barwa ba gagwe ba babedi. ₄Bona ba nyala basadi ba Bamoaba; leina la yo mongwe e be e le Orpa, la yo mongwe e le Rute. Ge ba dutše fao mengwaga ye e ka bago ye lesome, ₅Maglone le Kilione le bona ba hwa, gomme Naume a tlogelwa a le nošinoši – a se na barwa, a se na le monna.

₆Ya re ge Naume a sa le nageng ya Moaba, a kwa gore Morena o atlile setšhaba sa Israele ka go se fa puno ye botse; ka gona a itokišetša go tloga Moaba le betši ba gagwe. ₇Ba tloga mmogo go boela nageng ya Juda, fela ge ba le tseleng, ₈Naume a re go betši ba gagwe ba babedi a re: “Ipoeleleng magae le yo itulela malapeng a bolena. Hle, Morena a le dire ka botho bjalo ka ge le lena le dirile bao ba hwilego ka botho, mme le nna la ntira ka botho. ₉Le gona, hle, a Morena a thuše yo mongwe le yo mongwe wa lena le nyalwe gape, le age metse.”

Ka gona Naume a ba atla a ba šadiša gabotse. Eupša bona ba lla, ₁₀ba re go yena: “Aowa hle! Re tla ya nago go batho ba geno.”

₁₁Fela Naume a ba fetola a re: “Anke le gomeng hle, bana ba ka. Ke ka lebaka lang le nyaka go ya le nna? Na ke sa kgona go belega barwa ba ba tlago le nyala? ₁₂Ipoeleleng gae; nna ke itšofaletše, nka se hlwe ke sa nyalwa gape. Le ge e be nka hutša go nyalwa bjona bošego bjo gomme ka ima ka ba le barwa, ₁₃a le be le ka letela ge ba godile gore ba le nyale? A seo se be se ka le thibela go nyalwa ke ba bangwe? Aowa, bana ba ka, le a tseba gore ga go kgonege. Ke setlega pelo kudu ka lena; nna Morena o mphularetše.”

₁₄Ba napa ba lla go fetišiša. Gomme Orpa a atla matswalagwe a laelana naye, a boela gae. Rute yena a gomarela matswalagwe. ₁₅Ka gona Naume a re go yena: “Rute, ngwanaka, ngwaneno o ipoeletše gae setšhabeng sa gabo le go modimo wa gabo. Le wena ipoelele gae le yena.”

₁₆Fela Rute a mo fetola a re: “Hle, se phegelele go nkgopela go go gomela. Ntumelele ke sepele nago. Mo o yago gona le nna ke tla ya; mo o dulago ntshe le nna ke tla dula gona. Batho ba geno e tla ba batho ba gešo, mme Modimo wa gago e tla ba Modimo wa ka. ₁₇Mo o tlago hwela gona le nna ke tla hwela ntshe, mme ke gona moo ke tlago bolokwa ntshe. Go na le gore ke kgaogane le wena e se ka lehu, Morena a ka upša a nkotla ka kotlo e šorošoro.”

₁₈Ge Naume a bona gore Rute o tloga a feditše le pelo go ya naye, a se hlwe a mo phegelela.

₁₉Bobedi bja bona ba sepela ba ba ba fihla Betlelehema. Ge ba fihla, motse ka moka wa huduega mme basadi ba botšišana ba re: “A ruri yo ke yena Naume yola?”

₂₀Yena a ba fetola a re: “Se mpitšeng Naume, mpitšeng Mara, ka gobane Ramaatlaohle o ntirile tše di galakago kudu. ₂₁Ge ke tloga mo ke be ke na le tša ka, eupša Morena o mpušitše ke le fela. A ruri le ka hlwa le mpitša Naume mola Morena Ramaatlaohle a ntšwile mme a ntlhokofaditše?”

₂₂Ke ka moo Naume a boilego ka gona a etšwa nageng ya Moaba le Rute, ngwetši ya gagwe ya Momoaba. Ba gorogile Betlelehema ge batho ba thoma go buna garase.

₁Go be go na le monna yo mongwe wa leloko la boElimeleke, mogatšaNaume. Yena o be a bitšwa Boase. E be e le monna wa mohumi wa maemo. ₂Rute a re go Naume: “E re ke ye mašemong ke yo budutša ka morago ga yo a ka ntšhokelwago.”

Naume a mo fetola a re: “Sepela, ngwanaka.”

₃Ka fao Rute a ya mašemong mme a sepela ka morago ga babuni a tšama a budutša. A ikhwetša a le tšhemong ya Boase wa leloko la boElimeleke.

₄Ka morago ga lebaka yena Boase a fihla a etšwa Betlelehema. A dumediša babuni a re: “Morena a be le lena!”

Bona ba mo fetola ba re: “Morena a go šegofatše!”

₅Boase a botšiša mohlapetši wa babuni a re: “A kgadi yela ke ya ga mang?”

₆Yena a mo fetola a re: “Ke kgadi yela ya Momoaba ye e tlilego le Naume ge a boa nageng ya Moaba. ₇O nkgopetše gore ke mo dumelele go budutša le go kgobela ka morago ga babuni. E sa le le hlaba a ikeme go fihlela bjale ge a no khutšanyana mola mošašaneng.”

₈Ke mo Boase a rilego go Rute: “E re ke go botše, ngwanaka. O se hlwe o eya go budutša tšhemong ye nngwe ge e se go ye. Itseparele gona fa, o batamele basadi ba ba šomago mo. ₉O lebeledišiše moo banna ba bunago, mme o ipate le basadi. Ke laetše banna gore ba se ke ba go tshwenya. Ge o swerwe ke lenyora, o ye o nwe kua meeteng ya meetse ao badiredi ba a gelego.”

₁₀Rute a khunama, a itahlela fase ka sefahlego, a re go Boase: “Ke ka lebaka lang o ntlhokomela, o ntebelela ka botho mola ke le motho o šele?”

₁₁Boase a mo fetola a re: “Ba mpoditše tšohle tše o di diretšego matswalago go tloga mola mogatšago a hlokafalago. Ke tseba ka mo o tlogetšego tatago le mmago le naga ya geno, le ka mo o tlilego go dula setšhabeng se o bego o sa tsebe tša sona. ₁₂A Morena a go putse go tšeo o di dirilego. Anke Morena Modimo wa Israele yo o tlilego go yena go šireletšwa ke diphego tša gagwe a go putse ka mo go tletšego.”

₁₃Rute a mo fetola a re: “O yo botho kudu go nna, mong wa ka. O nkhomoditše wa nkuša pelo le ge ke se yo mongwe wa badiredi ba gago.”

₁₄Ka nako ya dijo Boase a re go Rute: “Batamela mono o tšee lerathana la senkgwa o šebe ka morong wa beine.” Ka fao a dula le bašomi, gomme Boase a mo hlallela dipale. A ja a khora, a ba a šadiša tše dingwe. ₁₅Ka morago ga ge Rute a boetše go budutša, Boase a laela bašomi a re: “Le mo lese a topatopele le gare ga mekgobo ya diako, mme le se ke la mo kgalema. ₁₆Le tšame le uša diako tše dingwe ka boomo, a tle a topatope. Gomme le se ke la mo omanya.”

₁₇Ka gona Rute a budutša tšhemong yeo go fihlela mathapama, mme ge a fotše a nyaka go tlatša seroto. ₁₈A rwala mabele a gagwe a boela motseng, a bontšha matswalagwe mabudutša ao. A mo fa le tšela di šetšego ge a eja. ₁₉Matswalagwe a mmotšiša a re: “Na o hlwele o budutša kae lehono? O be o šoma tšhemong ya mang? A Modimo a šegofatše monna yo a go šeditšego.”

Ke moo Rute a boditšego matswalagwe a re: “Lehono ke hlwele ke šoma tšhemong ya monna yo ba rego ke Boase.”

₂₀Naume a re go ngwetšiagwe: “A a šegofatšwe ke Morena yo ka mehla a phethago dikholofetšo tša gagwe go ba ba phelago le go ba ba hwilego!” A tšwela pele a re: “Monna yoo ke moloko wa kgauswi le rena, ke yo mongwe wa bao ka segagešo ba swanetšego go re babalela.”

₂₁Ke moo Rute a itšego: “O ile a ba a re go nna: ‘O fele o ipata le badiredi ba ka go fihlela ba fetša go buna.’ ”

₂₂Naume a re go Rute, ngwetšiagwe: “Ee, ngwanaka, ge o ka ya tšhemong ya motho yo mongwe mohlomongwe ba ka go tshwenya. Go kaone ge o ka itšhomela le basadi ba tšhemong ya Boase.” ₂₃Ke ka moo Rute a šomilego le bona ka go budutša go fihlela ba fetša go buna garase le korong. Gomme a fela a ituletše le matswalagwe.

₁Ka tšatši le lengwe Naume, matswale wa Rute, a re go Rute: “Ngwanaka, ga ke re ke swanetše go go hweletša monna gore o tle o age motse o ikhutše? ₂Gape monna yo, Boase, yo o šomilego le badiredi ba gagwe, ke moloko wa borena. Bjale theetša gabotse. Bošego bja lehono Boase o tla be a ološa garase seboeng. ₃Ka gona o hlape, o tlole ka dinkgabose, mme o apare gabotse. Ke moka o theogele seboeng, fela o se ke wa iponatša go yena go fihlela ge a feditše go ja le go nwa. ₄Ge a yo robala o diše moo a robalago ntshe. Gomme o ye, o mo apole kobo maotong, o robale. Ke moo a tlago go botša gore o dire eng.”

₅Rute a mo fetola a re: “Ke tla dira tšohle tše o mpotšago tšona.”

₆Ka gona Rute a theogela seboeng mme a dira ka moka tšeo matswalagwe a mo laetšego tšona. ₇Ya re ge Boase a feditše go ja le go nwa, a thabile, a ya go robala sethaleng sa garase. Rute a nanyetša go yena, a mo apola kobo maotong mme a robala. ₈Ka bomašegogare Boase a phafoga. Ge a fetoga a bona mosadi a robetše maotong a gagwe. ₉A mmotšiša a re: “O mang?”

Rute a mo fetola a re: “Ke nna Rute, mong wa ka. Ka ge o le motsenedi, hle, ntsenele, nna, molata wa gago.”

₁₀Boase a re: “Morena a go šegofatše, ngwanaka! O laetša gore o tloga o botegela lapa lešo ka seo o se dirago bjale go fetiša ka moo o diretšego matswalago. Ga wa ikganyogela lesogana la mohumi goba la modiidi. ₁₁Bjale, ngwanaka, se boife! Mang le mang mo motseng wa gešo o tseba ge o le mosadi wa mmakgonthe. Ke tla dira tšohle tše o nkgopelago tšona. ₁₂Ke therešo ke motsenedi, mme ke swanetše go go tsenela. Fela go sa na le monna yo e lego motsenedi wa kgauswi go mpheta. ₁₃Lala mo bošego ka moka, mme ge go sele re tla nyakišiša ge e ka ba o tla go tsenela. Ge go ka ba bjalo, go lokile. Eupša ge go ka se be bjalo, gona ke ena ka Modimo yo a phelago gore ke tla go tsenela. Bjale ithobalele fa go fihlela go esa.”

₁₄Ka gona a robala moo maotong a Boase go fihlela go esa. Fela a tsoga e sa le ka maswiswana gore a se ke a bonwa, ka gobane Boase o be a sa rate gore yo mongwe a tsebe gore Rute o letše fao seboeng. ₁₅Boase a re go yena: “Ala kobo ya gago fase o e swareletše.” Rute a dira bjalo, gomme Boase a mo elela garase ye e ka bago diroto tše pedi, a mo rweša yona. Rute a napa a rotogela motseng a rwaleletše. ₁₆Ge a fihla gae matswalagwe a mmotšiša a re: “Gomme o sepetše bjang, ngwanaka?”

Rute a mmotša tšohle tše Boase a mo diretšego tšona. ₁₇A ba a re: “O ntšheletše šuba se sa garase gomme a re go nna: ‘O se ke wa boela go matswalago o akga diatla.’ ”

₁₈Matswalagwe a re go yena: “Bjale o iketle, o se ke wa fela pelo, ngwanaka, go fihlela o bona gore taba ye e tla feletša kae. Boase a ka se khutše lehono pele a phetha taba ye.”

₁Boase a ya kgorong ya motse, a fihla a dula fao. Ke moka motsenedi yola Boase a mmoletšego a feta moo, gomme Boase a mmitša a re: “Anke o fetele mono, morwarre, o dule fa.” Ka gona monna yoo a fetela thoko yeo a dula. ₂Boase a kgobokanya bakgomana ba lesome ba motse, gomme a ba kgopela gore le bona ba dule fase moo. Ge ba dutše, ₃Boase a bolela le motsenedi a re: “Bjale ka gore yola Naume o tšo boa nageng ya Moaba, o rekiša mogola wola wa Elimeleke, moloko wa borena, ₄nna ke ile ke tle ke go lome tsebe. Bjale ge, ge o nyaka mogola woo, o reke banna le bakgomana ba ba dutšego mo ba le gona. Fela ge o sa o nyake, hle, ntsebiše, ka gobane mo ditabeng tše go tla wena pele, gwa tsebo latela nna.”

Monna yoo a re: “Ke tla o reka.”

₅Ke moo Boase a itšego: “Bjale ge, tšatšing leo o rekago mogola woo go Naume, o tla be o tšea le Rute, mohlologadi wa Momoaba, gore o tle o tswale mojalefa go tsošetša mohu leina.”

₆Monna yoo a mo fetola a re: “Ge go le bjalo, gona nka se ithekele mogola woo, ka gobane o ka se tle o eba bohwa bja bana ba ka. Wena ithekele wona. Nna nka se kgone.”

₇Mehleng yeo e be e le setlwaedi setšhabeng sa Israele gore ge motho a rekolla karolo ya gabo ya naga, goba a e neela yo mongwe, a role seeta sa gagwe a se neele yoo mongwekayena. Wo e be e le mokgwa wa Baisraele wa go tiišetša taba.

₈Ka fao ge monna yola a re go Boase: “Wena ithekele wona,” o ile a rola seeta sa gagwe a mo neela sona. ₉Ke moo Boase a ilego a bolela le bakgomana le batho ka moka a re: “Lena le dihlatse lehono tša gore ke rekile tšohle go Naume tše e bego e le tša Elimeleke, le tšohle tša Kilione le Maglone. ₁₀Le gona Rute, Momoaba, mohlologadi wa Maglone, ke a mo tšea e ba mogatšake gore ke tle ke tswale mojalefa go tsošetša mohu leina, gore leina la gagwe le se ke la timelela lelokong la gabo le motseng wa gabo. Lena le dihlatse lehono.”

₁₁Bakgomana le bohle ba bangwe kgorong ba re: “Ee, re dihlatse. A Morena a atle mosadi yoo o mo gorošago lapeng la gago, a be bjalo ka Ragele le Lea, bao bobedi ba bilego le thari, ba thea setšhaba sa Israele. Anke o be senatla kgorwaneng ya Efrata, gomme le leina la gago le tume motseng wa Betlelehema. ₁₂A bana bao Morena a tlago go fa bona ka mosadi yo mofsa yoo ba age lapa la gago bjalo ka lapa la Peretse, morwa wa Juda ka Tamare.”

₁₃Ka fao Boase a goroša Rute ya ba mosadi wa gagwe. A tsena dikobong naye; Morena a mo atla, a ima, gomme a belega ngwana wa mošemane. ₁₄Basadi ba motse ba re go Naume: “Reta Morena! O go file setlogolo lehono sa go go babalela. A mošemanyana yo a tume go Baisraele! ₁₅Ngwetši ya gago e a go rata, mme go wena e phala le barwa ba motho ba ba šupago. Bjale o go belegetše setlogolo sa go go hlogiša lefsa, le go go fepa ge o tšofetše.” ₁₆Naume a tšea ngwana, a mmea difarong, gomme a iphepela yena.

₁₇Basadi ba baagišani ba rea mošemanyana leina la Obede. Ba tšama ba botša mang le mang ba re: “Naume o belegetšwe ngwana wa mošemane!”

Obede e bile tatagoIsai yo e bilego tatagoDafida.

₁₈Bjale le ke lešika la leloko go tloga go Peretse go fihla go Dafida: