E100 Letšatši 35 – Kgoši Dafida

₁Dikgoro ka moka tša Israele tša tla go Dafida kua Hebrone tša re go yena: “Re madi eno. ₂Mehleng ye e fetilego, le mola Saulo e sa le kgoši ya rena, o be o eta Baisraele pele ntweng. Morena o rile go wena: ‘Ke wena o swanetšego go diša setšhaba sa ka sa Israele; ke wena o swanetšego go ba mmuši wa sona.’ ” ₃Ka gona baetapele ka moka ba Israele ba tla go Kgoši Dafida kua Hebrone. Yena a dira kgwerano le bona pele ga Morena, ba mo tlotša gomme ya ba kgoši ya Israele. ₄Dafida o be a na le mengwaga ye masome a mararo ge e eba kgoši, gomme a buša mengwaga ye masome a mane. ₅O bušitše Juda a le Hebrone mengwaga ye e šupago le seripa, gomme a buša Israele ka moka le Juda a le Jerusalema mengwaga ye masome a mararo a metšo ye meraro.

₆Kgoši Dafida le banna ba gagwe ba ile ba tšwa dira ba yo hlasela Jerusalema. Bajebuse bao ba bego ba dula moo ba gopola gore Dafida a ka se kgone go thopa motse woo, ka gona ba re go yena: “O ka se tsene ka mo; le tšona difofu le digole di tla go thibela.” ₇Eupša Dafida o ile a thopa sebo sa bona sa Sione, gomme sa tsebja ka la “Motse wa Dafida”.

₈Tšatši leo Dafida a re go banna ba gagwe: “Yo mongwe le yo mongwe yo a nyakago go hlasela Bajebuse a a tsene ka nthoba ya meetse, a bolaye digole le difofu tšeo Dafida a di hloilego hloihloi.” Ke ka fao go hlagilego seka se se rego: “Difofu le digole di ka se tsene ngwakong wa Morena.”

₉Ka morago ga go thopa sebo Dafida o ile a dula ka go sona mme a se rea leina la “Motse wa Dafida”. A aga motse go se potologa, a thoma felo mo naga e bego e lekelelantšwe a aga go ya ka gare. ₁₀Maatla a gagwe a ile a fela a oketšega, ka gobane Morena Modimo Ramaatlaohle o be a na le yena.

₁₁Kgoši Hiramo wa Tirose o ile a roma batseta gore ba kwane le Dafida; a mo romela dikota tša mosedere le babetli gotee le babetli ba matlapa gore a ikagele ntlo. ₁₂Ka gona Dafida a lemoga gore Morena o mo tiišeditše bogošing bja Israele, le gore o atlegiša mmušo wa gagwe ka lebaka la setšhaba sa Morena sa Israele.

₁₃Ge Dafida a tlogile Hebrone a ile Jerusalema, o ile a tšea metlabo ye mengwe le basadi fao, gomme a ba le barwa le barwedi ba bangwe. ₁₄Moo Jerusalema a belegelwa bana ba ba latelago: Shamua, Shobabe, Nathane, Solomone, ₁₅Jibehara, Elishua, Nefege, Jafia, ₁₆Elishama, Eliada le Elifelete.

₁₇Bafilista ba ile ba botšwa gore Dafida o tloditšwe ya ba kgoši ya Israele, ka gona madira a bona a tšwa go yo mo thopa. Ge Dafida a ekwa taba yeo, a theogela sebong. ₁₈Bafilista ba fihla molaleng wa Barafa gomme ba ipeakanyetša ntwa moo. ₁₉Dafida a botšiša Morena a re: “A ke hlasele Bafilista? A o tla ba gafela diatleng tša ka?”

Morena a mo fetola a re: “Ee, ba hlasele! Ruri, ke tla ba gafela diatleng tša gago!”

₂₀Ka gona Dafida a ya Baale-Peratsime gomme moo a fenya Bafilista. A re: “Morena o gogotše manaba a ka bjalo ka lefula.” Ka fao felo moo go bitšwa Baale-Peratsime. ₂₁Ge Bafilista ba tšhaba ba ile ba tlogela medimo ya bona ya diswantšho, gomme Dafida le banna ba gagwe ba e tšea.

₂₂Bafilista ba goma ba ya molaleng wa Barafa mme ba ipeakanyetša ntwa gape moo. ₂₃Gapegape Dafida a botšiša Morena, yo a ilego a mo fetola a re: “O se ke wa ba hlasela o le mo, fela o ba pote ka morago mme o itokišetše go ba hlasela o le kua mehlareng ya mekgokgopha. ₂₄Ge o ekwa mešito godimo ga mehlare, gona o hlasele ka bjako, ka gobane ke tla be ke go etile pele go yo fenya madira a Bafilista.” ₂₅Dafida a dira se Morena a mo laetšego sona, gomme a rakediša Bafilista go tloga Geba go ba go yo fihla Gesere.

₁Gapegape Dafida a kgobokanya bahlabani ba ba kgethilwego mo Israele, ya ba banna ba dikete tše masome a mararo. ₂A ba eta pele ba ya Baala kua Juda go yo tšea Polokelo ya Kgwerano ya Modimo moo, ye e bego e abetšwe Morena Ramaatlaohle, yoo setulo sa gagwe sa bogoši se lego ka godimo ga bakerubi. ₃Ba ile ba e tšea lapeng la Abinadaba mmotong, gomme ba e bea ka koloing ye mpsha. Usa le Agio, barwa ba Abinadaba, ba be ba hlahla koloi, ₄Agio a e etile pele. ₅Dafida le Baisraele ka moka ba be ba bina ba opela ka mafolofolo go godiša Morena. Ba be ba letša diletšo tša dikgapa, diharepa, meropa, ditlhawatlhwadi le masenkana.

₆Ge ba fihla seboeng sa Nakone, dipholo tša thetšwa, gomme Usa a iša letsogo a swareletša Polokelo ya Kgwerano ya Modimo. ₇Gatee fela Morena Modimo a galefela Usa gomme a mmolaela go se hlomphe moo ga gagwe. Usa a hwela moo ka thoko ga Polokelo ya Kgwerano, ₈gomme felo fao gwa bitšwa Peretse-Usa go tloga mohlang woo. Dafida a ferekana ka gobane Morena a otlile Usa a galefile.

₉A boifa Morena mme a re: “A bjale Polokelo ya Kgwerano e tla tla go nna bjang?” ₁₀Ka gona a se hlwe a nyaka go e iša ga gagwe Jerusalema, eupša a e aroša tsela mme a e iša lapeng la Obede-Edomo, motho wa motse wa Gathe. ₁₁E ile ya dula moo dikgwedi tše tharo, gomme Morena a šegofatša Obede-Edomo le lapa la gagwe.

₁₂Kgoši Dafida a kwa gore ka lebaka la Polokelo ya Kgwerano, Morena o šegofaditše lapa la Obede-Edomo le tšohle tše e lego tša gagwe; ka gona a e tšea lapeng la Obede-Edomo a e iša Jerusalema ka lethabo le legolo. ₁₃Ka morago ga ge banna ba ba bego ba rwele Polokelo ya Kgwerano ba sepetše magato a a selelago, Dafida a ba emiša ge a sa direla Morena sehlabelo ka poo le namane ye e nonnego. ₁₄A bina ka mafolofolo go godiša Morena, a tšwere fela seaparo se sekgethwa lethekeng. ₁₅Gomme yena le Baisraele ka moka ba iša Polokelo ya Kgwerano Jerusalema ka megobo ya lethabo le mollo wa diphalafala.

₁₆Ge Polokelo e gorošwa motseng, Migale, morwedi wa Saulo, a lebelela ka lefasetere gomme a bona Kgoši Dafida a tšama a taboga a bina go hlompha Morena, mme a mo nyatša kudu. ₁₇Ba tsenya Polokelo, ba e bea madulong a yona ka tenteng yeo Dafida a e hlometšego yona. Ke moka a direla Morena dihlabelo tša go tšhungwa ka moka le dihlabelo tša kagišano. ₁₈Ge a feditše go dira dihlabelo tšeo, a šegofatša setšhaba ka leina la Morena Ramaatlaohle, ₁₉gomme a ba fa dijo ka moka ga bona. A fa monna le mosadi yo mongwe le yo mongwe mo Israele senkgwa, le nama ya go bešwa, le phaphathi ya makwapi a diterebe. Ke moka yo mongwe le yo mongwe a boela gae.

₂₀Ka morago ga moo, ge Dafida a eya gae go yo šegofatša ba lapa la gagwe, Migale a tšwa go tlo mo gahlanetša. A re: “Kgoši ya Israele lehono o itiretše leina le legolo! O itlhobotše a se ne dihlong bjalo ka setlaela mahlong a basetsana ba makgoba ba bahlankedi ba gagwe!”

₂₁Dafida a mo fetola a re: “Ke be ke bina go tumiša Morena yo a nkgethilego a mpea moetapele wa setšhaba sa gagwe sa Israele bakeng sa tatago le lapa la gagwe. Gomme ke tla fela ke bina go godiša Morena, ₂₂ka ikgoboša le go feta mo, ka ipona ke se selo, eupša basetsana bale o ba bolelago bona ba tla ntšeela godimo!”

₂₃Migale, morwedi wa Saulo, a se ke a ba le ngwana go fihlela a ehwa.

₁Kgoši Dafida o be a dutše gabotse mošate, gomme Morena a dira gore manaba a gagwe ka moka a se ke a hlwa a mo tshwenya.

₂Ke moo kgoši a itšego go moprofeta Nathane: “Nnaena šefa ke dutše ka ngwakong wo o agilwego ka dikota tša mosedere, eupša Polokelo ya Kgwerano ya Modimo yona e beilwe ka tenteng!”

₃Nathane a mo fetola a re: “Dira se o se gopotšego, ka gobane Morena o na le wena.”

₄Eupša bošegong bjoo Morena a re go Nathane: ₅“Sepela o yo botša Dafida, mohlanka wa ka, gore ke re go yena: ‘Ga se wena o tlago nkagela tempele ye ke tlago dula ka go yona. ₆Go tloga ka nako yela ka go ntšha setšhaba sa Israele Egepeta go fihlela bjale, ga se ka ka ka dula ka tempeleng; ke raletše mo gohle ke le ka tenteng. ₇Mesepelong ya ka ka moka le setšhaba sa Israele ga se ka ka ka botšiša yo mongwe wa baetapele ba ke bego ke ba bea badiši ba setšhaba sa ka gore ke ka lebaka lang ba sa nkagele tempele ka dikota tša mosedere.’

₈“Ka gona botša Dafida, mohlanka wa ka, gore nna, Morena Ramaatlaohle, ke re go yena: ‘Ke go tšere o diša dinku madišong ka go bea mmuši wa setšhaba sa ka sa Israele. ₉Ke bile nago mo gongwe le mo gongwe mo o ilego wa ya gona, mme ke fentše manaba a gago ka moka ge o a hlasela. Ke tla go dira gore o tume bjalo ka baetapele ba bagolo mo lefaseng. _10-11Ke kgethetše setšhaba sa ka sa Israele naga gomme ka se tsema go yona, moo se kago dula ntle le go hlwa se tšhošetšwa. E sa le go tloga mola ba tsenago mo nageng ye mehleng yela ya baahlodi ba gatelelwa ke batho ba babe, eupša seo se ka se hlwe se direga. Ke go holofetša gore ke tla dira gore manaba a gago ka moka a se sa go tshwenya, mme ka go fa ditlogolo. ₁₂Ge o hlokafetše mme o bolokilwe le borakgolokhukhu ba gago, ke tla bea yo mongwe wa barwa ba gago kgoši mme ka tiiša mmušo wa gagwe. ₁₃Ke yena yo a tlago nkagela tempele, gomme ke tla hloma bogoši bja lešika la gagwe ka bo dira gore e be bja neng le neng. ₁₄Ke tla ba tatagwe, mme yena ya ba morwa wa ka. Ge a phoša ke tla mo otla bjalo ka tatagongwana ge a otla ngwana wa gagwe; ke tla šomiša batho go mo otla. ₁₅Eupša nka se lese go mmotegela bjalo ka ge ke ile ka lesa go botegela Saulo, yoo ke mo tlošitšego gore wena o tle o be kgoši. ₁₆O tla fela o na le ditlogolo, gomme ke tla dira gore mmušo wa gago e be wa neng le neng. Bogoši bjeno bo ka se tsoge bo fedile.’ ”

₁₇Nathane o ile a botša Dafida tšohle tše Modimo a mo utolletšego tšona.

₁₈Ke moka Kgoši Dafida a tsena ka Tenteng ya bodulo bja Morena, a dula fase mme a rapela a re: “Ga ke a swanela tše o šetšego o ntiretše tšona, Morena, Mong wa ka, le lona lapa la ka ga le a di swanela. ₁₉Le ge go le bjalo, tšeo ga se ya ba selo mahlong a gago, Morena, Mong wa ka; o tšwetše pele o bolela tše botse tša mehleng ye e tlago mabapi le ditlogolo tša ka, nna, mohlanka wa gago. Tšeo ke taba tše kgolo bjang go ka di holofetša motho, Morena, Mong wa ka! ₂₀Go feta moo a nka go botša eng? O a ntseba, nna, mohlanka wa gago. ₂₁O dirile dilo tše kgolo tše ka gobane o be o nkholofeditše tšona, le ka gore o be o rata gore o nthute. ₂₂Ka gona o yo mogolo bjang, Morena Yogodimodimo! Ga go yo a swanago le wena; go ya ka tšohle tše re di kwelego re a tseba gore ke wena o nnoši o lego Modimo. ₂₃Ga go setšhaba se sengwe lefaseng se se swanago le sa Israele, se o se phološitšego bokgobeng go tlo se dira setšhaba sa gago. Dilo tše kgolo tše di tšhošago tše o ba diretšego tšona di go tumišitše. O lelekile ditšhaba tše dingwe le medimo ya tšona ge setšhaba sa gago se goroga, setšhaba se o se lokolotšego Egepeta gore e be sa gago. ₂₄O dirile Baisraele setšhaba sa gago go ya go ile, gomme wena, Morena, wa ba Modimo wa bona.

₂₅“Bjale, Morena Modimo, phethagaletša sa ruri tše o di boletšego mabapi le nna, mohlanka wa gago, le ditlogolo tša ka, gomme o dire se o boletšego gore o tla se dira. ₂₆O tla tuma, gomme batho ka mehla ba tla re: ‘Morena Ramaatlaohle ke Modimo wa Israele.’ Gomme o tla boloka mmušo wa ka ka dinako ka moka. ₂₇Morena Ramaatlaohle, Modimo wa Israele, ke na le sebete sa go go rapela ka thapelo ye ka gobane o nkutolletše taba tše ka moka, nna, mohlanka wa gago, gomme o mpoditše gore o tla dira ditlogolo tša ka dikgoši.

₂₈“Bjale ge, Morena, Mong wa ka, ke wena Modimo; ka mehla o phetha dikholofetšo tša gago, gomme o nkholofeditše taba ye e makatšago ye. ₂₉Ke go kgopela gore o šegofatše ditlogolo tša ka gore di fele di ipshina ka botho bja gago. Wena, Morena, Mong wa ka, o rile o tla di šegofatša, gomme tšhegofatšo ya gago e tla ba go tšona go ya go ile.”