E100 Letšatši 45 – Diema tša Solomone

₁Motho a ka no ba le maikemišetšo,

fela molaodi wa tše di tlago hlaga ke Morena.

₂Motho a ka no gopola gore tšohle tše a di dirago di lokile,

kganthe yo a elago maikemišetšo ke Morena.

₃Gafela Morena tše o di dirago,

gomme o tla atlega mererong ya gago.

₄Dilo tšohle di na le se Morena a di hloletšego sona,

le bakgopo ba hloletšwe tšatši la masetlapelo.

₅Morena o šišingwa moikgogomoši,

ruri, yo mobjalo a ka se phonyokge kotlo.

₆Motho o swarelwa dibe ka go rata Morena le go mmotegela;

ka go mmoifa motho o phema bobe.

₇Ge motho a phela ka go kgahla Morena,

Morena o mo phediša le manaba a gagwe ka khutšo.

₈Bonnyane o bo hwetšago ka toka

bo phala bontši o bo hwetšago ka boradia.

₉Motho a ka itherela boyo,

fela ke Morena yo a mo etetšago.

₁₀Kgoši e bolela ka maatla a go tšwa go Modimo;

tša gagwe dikahlolo di lokile.

₁₁Morena o nyaka ge go šomišwa kelo ya nnete;

ke yena a beago seroto.

₁₂Magoši a šišingwa ditiro tše mpe,

gobane toka ke yona e tiišago mmušo.

₁₃Mokgahlakgoši ke mmolelatherešo;

moratwakekgoši ke wa polelo tše di lokilego.

₁₄Kgalefo ya kgoši e ka hlola lehu;

yo bohlale o a e tima.

₁₅Botho bja kgoši bjona bo a phediša,

bo bjalo ka maru, manešapulayatsheola.

₁₆Go huma ka bohlale go phala go huma ka gauta;

go ba le kwešišo go phala go ba le silibera.

₁₇Baloki ba phela ka go šikologa bobe;

yo a itotago maitshwarong o tla phela.

₁₈Boikgogomošo bo iša motho tahlegong;

boikgodišo bo feleletša ka go wiša motho.

₁₉Go ikokobetša le baikokobetši

go phala go abelana phahlanahlakola le baikgogomoši.

₂₀Mošetšakeletšo o a atlega;

go lehlogonolo yo a tshephago Morena.

₂₁Motho yo bohlale re ra wa kwešišo;

mmoledi wa sethakga ke wa go kgodiša batho.

₂₂Tlhaologanyo e kgontšha mohlaologanyi go ipshina ka bophelo;

mašilo a bolawa ke bošilo bja ona.

₂₃Yo bohlale o nagana pele a bolela;

ka gona polelo ya gagwe e a kgodiša.

₂₄Polelo tše bose di swana le mamapo a dinose –

a a natefago ka ganong,

gape a fepago mmele.

₂₅Go na le tsela ye e bonalago nke e lokile,

fela mafelelong e iša lehung.

₂₆Diyamaleng di hlohleletša mošomi go šoma,

gobane o šomišwa ke tlala.

₂₇Senokwane se loga maanomabe;

ganong se tshwa polelo tše di fišago boka mollo.

₂₈Moradia o hlola phapano;

wa lesebo o lweša bagwera ba go ntšhana sa inong.

₂₉Ntwadumela o goketša batho,

a ba tšeiša ka tsela tša go se loke.

₃₀Motho wa go budulala o nagana bomenemene;

sepetlamelomo o rera bobe.

₃₁Moriri wo mošweu ke seala,

ke moputso wa ba ba phelago ka go loka.

₃₂Motho wa pelotelele o phala mogale;

wa go se tshelwe ke pelo o phala wa go thopa motse.

₃₃Batho ba ka no dira matengwa,

eupša sephetho se tšewa ke Morena.

₁Go ja nthathana ya molatšana o iketlile

go phala go ja dimakhura ka lapeng la diphapano.

₂Mohlanka yo bohlale o laola ngwanamalešadihlong,

ya ba mojabohwa le barwa ba monglapa.

₃Silibera e hlwekišwa ka go tološwa ka pitšeng;

gauta e hlwekišwa ka go tološwa moubelong,

kganthe pelo ya motho yona e hlahlobja ke Morena.

₄Modiratšempe o theeletša polelo tše mpe,

wa maaka o hlwaela lesebo tsebe.

₅Mokweramodiidi o nyefola Mmopi wa gagwe,

mothabelamadimabe a mongwe a ka se phonyokge kotlo.

₆Ditlogolwana ke diala tša diputswa,

barwa le bona ba itheta ka botatabo.

₇Polelo ye botse e rona lešilo,

maaka le ona a rona mokgomana.

₈Tsogolekobong mofi wa lona o re ke pheko,

o re le mo kgontšha tše a di dirago.

₉Molebalelaphošo ke wa go nyaka kwano;

motsošološaphošo yena o lweša bantšhanasainong.

₁₀Monatlhaologanyo o kwa kgalemo,

lešilo lona le palela le thupa tše lekgolo.

₁₁Yo kgopo o kgonetše go tsoša mmudubudu,

eupša o tla otlwa gasehlogo.

₁₂Go gahlana le bere ye e hlakotšwego bana

go phala go gahlana le lešilo le tša bošilo bja lona.

₁₃Yo a lefetšago botse ka bobe,

bobe bo ka se tloge ka ga gagwe.

₁₄Go rumolana go swana le go phulela meetse mosele;

wena o tloge ntwa e sešo ya thoma.

₁₅Wa go lokafatša yo kgopo le wa go tšwa moloki

ba šišimiša Morena ka babedi.

₁₆Go thušang go fa lešilo tšhelete ya go lefela thuto,

mola le sa nyake thušo?

₁₇Mogwera ke yo a go botegelago ka nako tšohle;

morwarragomotho o ema naye mathateng.

₁₈Mohlokatlhaologanyo o itlema go lefela motho melato

ge mongmelato a palelwa;

o ikana go lefela yo a jetšego molato mpeng.

₁₉Yo a ratago go kgopiša batho o rata diphapano;

yo a ikgogomošago o a ipolaya.

₂₀Senokwane ga se atlege;

mpheane le yena o wela kotsing.

₂₁Motswalasetlatla o rwele bothata;

tatagolešilo ga a na lethabo.

₂₂Motho wa go thakgala ke yo a phetšego gabotse;

wa go nolega moko yena ga a na maatla.

₂₃Yo kgopo o amogela tsogolekobong

gore go menolwe toka.

₂₄Monatlhaologanyo o ikemišetša go dira tša bohlale,

lešilo lona ga le na maikemišetšo.

₂₅Ngwana yo e lego setlaela o nyamiša tatagwe,

o kweša mmagwe bohloko bjo bogolo.

₂₆Go lefiša mohlokamolato ga se gwa loka;

go betha mokgomana ga go a lebana.

₂₇Motsebi ga se wa go balabala,

wa go se felafele pelo ke yena wa kwešišo.

₂₈Le lešilo ge le ikhomoletše le ka sengwa yo bohlale;

ge le momile molomo go ka thwe le ne tlhaologanyo.

₁Tšhikanoši ke wa go nyaka go dira boithatelo,

o gana maele ka moka a mabotse.

₂Setlatla ga se tshwenyegele go kwešiša ba bangwe,

se rata fela go bolela tše se di naganago.

₃Bokgopo bo sepela le lenyatšo,

tlhomphologo e sepela le kgobogo.

₄Polelo ya yo bohlale e ka teba bjalo ka bodiba;

e ka ba bjalo ka noka ye e elago,

e ka ba mothopo wa bohlale.

₅Go emelela monamolato tshekong,

e le ge o lahla mohlokamolato, ke phošo.

₆Polelo tša setlatla di hlola phapano,

di se bakela go itiwa.

₇Lešilo le ipolaya ka dipolelo tša lona,

le tanywa ka tše le di bolelago.

₈Lesebo la mpheane le bose,

le etša seakolo se se kwametšwago.

₉Motho wa sebodu ke yo mobe,

o bjalo ka motšitlanyi.

₁₀Morena o bjalo ka tora ye e tiilego yeo moloki a ka tšhabelago go yona a bolokega.

₁₁Mohumi o bona lehumo la gagwe e le motse wo o ageleditšwego,

e le morako wo mogolo wo o mo šireleditšego.

₁₂Go ikgogomoša ke go ikiša tahlegong;

ge o nyaka go hlompšha o ikokobetše.

₁₃Yo a arabago a se a kwa potšišo o dira tša bošilo

le tša go rumolana.

₁₄Monakgotlelelo ga a fekeetšwe ke bolwetši,

eupša ge a nolegile moko a ka swarelela bjang?

₁₅Monatlhaologanyo o fišegela go tseba;

yo bohlale o dula a hlwaetše tša tsebo tsebe.

₁₆Mpho e phulela moabi wa yona tsela,

e mo fihliša go ba ba nago le maatla.

₁₇Mmolelapele tshekong o a kgolwa,

go fihlela ge go etla wa go mo sekišiša.

₁₈Taba ya banna ba maatla ba ba lwago ka kgorong ya tsheko

e ka ahlolwa ka go direlwa matengwa.

₁₉Ngwanabomotho a kgopišwa,

ga a tsenege,

o feta le motse wo o ageleditšwego ka go se tsenege,

wa fapana naye, o gana poelano.

₂₀Motho a ka iphediša ka tše a di bolelago,

a ka ikhweletša dijo ka go ba seboledi.

₂₁Lehu le bophelo di laolwa ke go bolela ga motho;

yo a bolelago kudu o tla ikobela.

₂₂Yo a nyetšego mosadi ke yo lehlogonolo,

o thabelwa ke Morena.

₂₃Sa modiidi ke go kgopela,

fela mohumi a fetole ka sekgapho.

₂₄Bagwera ba bangwe ba a lahletšana,

ba bangwe bona ba tshephagala

go feta bana ba motho.