Etlang go nna – Letšatši la 1

Ke rata mananeo a thelebišene mabapi le diagente le melato ya go kgahliša ye ba swanetšego go e fahlelela goba go e ahlola! Pele go tšweletšwa dintlha tša gore ke mang a dirilego eng goba go se dire, motšhotšhisi o hlaloša ditatofatšo kgahlanong le molatofatšwa. Puku ya Jesaya e thoma bjalo ka molato kgorong ya tsheko; ke motšhotšhisi yo a hlalošetšago moahlodi molato wa gagwe.

Go molaleng gore ke ka lebaka la eng ditatofatšo di tlišitšwe kgahlanong le Juda le Jerusalema – ba robile kgwerano e kgethwa ye Morena a e dirilego le bona. Ba tšhilafetše. Ba dira tše mpe le go dira dibe. Ga ba hlomphe Modimo.

Le ge go le bjalo, ba iphetolela ka go reng? Naa molatofatšwa o ipobola bjang? Ke nagana gore ba galefile – ge e le gabotse batho ba ba sekišwago ka lebaka la go lahla Modimo ba na le lenaneo le le telele la dilo ka moka “tša go loka” tše ba di dirago. Ba ka re, “Moahlodi! Re nea dikabelo, re ipolela dibe tša rena, re ya kerekeng, re a rapela.” Bothata go ba gona, e be e le boitshwaro bja bona. Ba be ba dira fela ditlwaedi; ba bolela se ka Sontaga gomme ba dira ka mo go fapanego ka Mošupologo mesong.

Modimo o hloile boikaketši – ka nako yeo le lehono. Ge batho ba dira ditlwaedi tša bodumedi tša go ya kerekeng go kgahla batho le go uta bošaedi, Modimo o di hloile. Ge o nagana ge e ba o phela bophelo bjo bo lokilego, na go ya kerekeng ga gago kgafetšakgafetša go nthloreng ya lenaneo la gago la “Ke phela gabotse”? Naa o naganne ka fao o phelago ka gona go tloga Mošupologo go fihla Mokibelo?