Bible Society of South Africa
Dithulaganyo tša go bala
Etlang go nna
Etlang go nna – Letšatši la 19
Xanthe Galanis

Etlang go nna – Letšatši la 19

Ekwa lentšu la Modimo

(Di)temana ya Bibele

JESAYA 66

2Etse ke nna ka noši ke hlodilego legodimo le lefase, mme tša ba gona! Batho ba ba nkgahlago ke ba ba ikokobetšago gape ba itsholago, ke ba ba phethago melao ya ka.

3“Setšhaba se dira dihlabelo se sa ntšhetše. Ka gona, yo a dirago sehlabelo ka poo go nna o swana le yo a bolayago yo mongwe; yo a dirago sehlabelo ka kwanyana o swana le yo a robago mpša molala; yo a neelago kabelo ya bupi o swana le yo a dirago sehlabelo ka madi a kolobe; yo a ntšhumelago seorelo o swana le yo a khunamelago modimo wa seswantšho. Ba dira tše ba di ratago, gomme ba kgahlwa ke go khunamela medimo ya diswantšho ya go sišimiša.

JESAYA 66:2-3NSO00Bula go Mmadi wa Bibele

JESAYA 66

18Ke tseba megopolo ya bona le ditiro tša bona. Nako e etla yeo ka yona ke tlago kgoboketša ditšhaba tšohle tše di bolelago maleme a mehutahuta. Ge ba kgobokana ba tla bona maatla a ka, 19gomme ba tseba gore ke nna ke ba otlago.

“Eupša mašaledi a bona a mangwe ke tla a roma ditšhabeng le bathong ba mabopong a kgole ba ba sešogo ba kwa setumo sa ka, le gona ba sešogo ba bona maatla a ka: Ke tla ba roma Tarshishe, Libia, Lidia le bakgoni ba yona ba mesebe, le Tubale, le Gerike. Ba tla begela ditšhaba tšeo bogoši bja ka. 20Ba tla tliša banna ba gabolena ka moka ba etšwa ditšhabeng ba abetšwe nna. Ba tla ba tliša thabeng ya ka ye kgethwa kwa Jerusalema ba ba nameditše dipere le dimeila le dikamela le dikoloi tša ntwa le dikoloi tše dingwe, go no swana le Baisraele ge ba tliša dikabelo tša bupi Tempeleng ka dibjana tše di hlwekilego. 21Ba bangwe ba bona ke tla ba bea baprista le Balefi.

22“Bjalo ka ge legodimo le lefsa le lefase le lefsa tše ke di hlolago e tla ba tša neng le neng di hlokometšwe ke nna, ka wona mokgwa wo mobjalo ditlogolo tša lena le leina la lena e tla ba tša go ya go ile. 23Ka monyanya wo mongwe le wo mongwe wa Lebalana le ka Sabatha se sengwe le se sengwe batho ba ditšhaba tšohle ba tla tla go nkhunamela ka Tempeleng ya ka Jerusalema.” O realo, Morena. 24“Ge ba tloga ba tla bona ditopo tša bao ba ilego ba ntsogela maatla. Diboko tše di di jago di ka se tsoge di hwile, le mollo wo o di tšhumago o ka se tsoge o timilwe. Go bona ditopo tšeo go tla šišimiša batho ka moka.”

JESAYA 66:18-24NSO00Bula go Mmadi wa Bibele

Jesaya e fela ka seswantšho sa kahlolo ya mafelelo ya Modimo le moputso wa ba ba lokilego lefaseng ba msphafatšwa. Letago la Modimo le tla tsebagatšwa go ditšhaba gomme batho go tšwa ditšhabeng ka moka ba tla tla go yena ba tlo mo tumiša. Lefase le leswa le a utollwa. Ye ke phetho e botse kudu go lentšu le le lebotse le le begwago ke Jesaya!

Le ge go le bjalo, Jesaya 66 a fela ka seprofeto sa phedišo ya lefase le kholofelo (66:18-24), mathomo a kgaolo a aba temošo ye nngwe gape: “Batho ba ba nkgahlago,” o realo Morena, “ke ba ba ikokobetšago gape ba itsholago, ke ba ba phethago melao ya ka” (66:2). Ditemana tše mmalwa ka morago, Jesaya ka go lebanya o bolela ka ba ba lokilego bjalo ka ba ba “phethago melao ya gagwe” (66:5). Ba fapantšhwa le bao ba sa arabego goba go theeletša ge Morena a bitša le go bolela (66:4). Ditemana tše tše bohlokwa di nea kakaretšo ya molaetša wa Jesaya – leganetši la sebe ga se bodumedi, eupša go theeletša ka go ikokobetša.

Go moloko o mongwe le o mongwe, seo mafelelong se fapantšhango nnete go maaka, magaraeng ga setšhaba sa Modimo, ga se bao ba ipontšhago kudu gore ke Bakriste, ke bao ba botegago ka mehla go lentšu la Modimo.

Naa o a ikokobetša go lentšu la Modimo? Naa o tšeela godimo lentšu la Modimo goba o letetše Modimo go dumelelana le ditumo tša gago, dinyakwa le ditetelo? Naa o amogela dikarolo tša Bibele tše o dumelelanago le tšona le go gana tšeo o naganago gore ga di a go swanela goba di fošagetšego? Ge e ba lentšu la Modimo le thulana le setšo sa gago, naa o latela lentšu la Modimo goba setšo?

Bible Society of South Africav.4.26.9
RE HWETŠE GO