Segwera – Letšatši la 6
Eliya le Elisha – segwera sa go hlahla
(Di)temana ya Bibele
1 DIKGOŠI 19
Go bitšwa ga Elisha
O ka gopola kanegelo ye – morago ga nakwana ya phenyo ya bophelo bja Eliya, moo a fenyaga baprofeta ba Baale Thabeng ya Karmele, Mohumagadi Isebele a thoma go bolaya baprofeta ba Morena. O tšhošeditše go bolaya Eliya.
Eliya a tšhaba ka poifo. Ga a je. Ga a nwe. O robala kudu. A duma ge a ka hwa. Se sebe le go feta, o ikwa a le nošinoši. Modimo o pakela Eliya senkgwa, a mo fa meetse ka legapana gomme se segolo le go feta, Morena o nea Eliya mantšu a tlhohleletšo.
“Tsoga,” Morena a realo. “Ga o noši. Go na le ba makgolokgolo bjalo ka wena. Ba a nthata. Ga se batho ka moka bao e lego ba babe. Ga o boemong bja go hloka kholofelo. Go oketša moo, ke go rometše mogwera. Leina la gagwe ke Elisha gomme e tla ba mogwera wa gago.”
Ka go realo gwa thoma segwera se segolo – sa go ikgetha magareng ga baprofeta ba Testamente ye Tala. Le ge go le bjalo, Modimo o dirile go feta fao, o a bona, Modimo ga a nea Eliya mohlatlami fela; O mo tsebešitše gape go mogwera wa kgauswi. Eliya o ratile Elisha le go mo kwešiša kudu go mo thuša le go mo hlohleletša.
Ka dinako tše dingwe segwera se bohlokwa kudu ke seo se lego ka ntle ga dithaka tša gago. Tswalano ya kgauswi le motho yo mogolo kudu goba yo monnyane kudu go re feta e godiša le go matlafatša maphelo a rena. Bagwera ba bagolo ba a re hlahla, bjalo ka ge Eliya a hlahlile Elisha. Nako ye e beeletšwago go motho yo monnyane e re nea morero wa lehono le kholofelo ya gosasa.
