Go sepela le Modimo – Letšatši la 17

O se lese go ba le leratorato le potego; o ikgabiše ka tšona bjalo ka pheta molaleng, o di boloke ka pelong ya gago. Ge o ka dira bjalo o tla kgahla Modimo le batho, wa ba le seriti mo go bona. Diema 3:3-4

Fela Morena a thabišwa ke Noa. Genese 6:8

Nagana o le yo mongwe wa baagi ba pele ba dikepe lefaseng, o laetšwe ke Modimo ka boyena go aga leselawatle le go fiwa ditaelo tše thata mabapi le materiale le ditekanyo. Nagana o aga sekepe sa botelele bja lebala la kgwele ya maoto le seripa, ya bogodimo bja moago wa mabato a mane gomme se kgona go rwala dinku tše dikete tše lekgolo le masome a mabedi. “Noa a dira tšohle tše Morena a mo laetšego tšona.” (Genese 7:5)

Le ge go na le batho ba bantši bao ba hwetšago go le boima go dumela gore go bile le areka, Ngaka Seon Hong, nyakišišong ya Korea ka 1993, “ga a hwetša bothata ka ditekanyetšo tša Leselawatle” le gore “se be se loketše lewatle le go emelana la maphoto a bogodimo bja dimetara tše 100”. Sa go kgahliša ke gore moakanyetšo o šomišitše tekanyo ya 1.6 bakeng sa go aga, yeo baagi ba dikepe ba hlalošago gore “ke tekanyo e tsepamego ya sekepe seo se yago lewatleng” le gore “go tloga go sa kgonege go re se ka menoga”.

Kgegeo ya seemo ke gore gaešita le matšatšing a Noa, batho ba be ba sa dumele go leselawatle le se e se emelago; Noa mohlomongwe a ka ba a kwerilwe ge a be a se aga. Ga go mo re balago gore batho ba ile ba ithaopa go mothuša goba go itlhaganela go tsena ka gare go sona – le ge pula e thomile go na.

Bibele e re botša gore “Noa o be a se na diphošo, mme e le motho a nnoši yo a lokilego gare ga batho ba mehleng yeo” (Genese 6:9). Eupša, “… mola yo mongwe le yo mongwe e le yo mobe pele ga Modimo, mme polayano e phatlalaletše mo gohle … ka gobane batho ka moka ba be ba phela bophelo bjo bobe” (Genese 6:11-12). Go be go le gobe moo e lego gore “… o ile a nyama ge a kile a ba dira mme a ba bea lefaseng … moo a ilego a ba a re: ‘Ke tla tloša batho ka moka ba ke ba dirilego …’ ”(Genese 6:6-7).

Modimo o nyamme kudu, go no swana le motswadi yo boitshwaro bja ngwana wa gagwe bo tlago mo tlišetša kotlo, go e na le moputso wo o lokišeditšwego yena ka lerato; le ge go le bjalo, Noa o thabišitše Modimo gomme a mo nea tsela ya go tšhabela phedišo ka meetsefula, le go iphološa le balapa la gagwe.

Gaešita le boemong bjo, Noa a ka ba a tsošitše mpherefere kgahlanong le Modimo gomme a gana go aga leselawatle, eupša go na le se sengwe se bohlale ka go ikokobetša le go obamela, ka gobane go tla tliša katlego go sa šetšwe go lahlegelwa ke boipušo bja bophelo bja motho. Se se tiišetšwa thuto ya Jesu: “Gobane yo a ipabalelago o tla lahlega, eupša yo a itatolago ka lebaka la ka o tla phelela sa ruri” (Mateu 16:25). Ka ge a be a tlwaetše go obamela, Noa o agile areka gomme letšatši la fihla ge yena, le balapa la gagwe le tona le tshadi ya mohuta wo mongwe le wo mongwe wa diphedi ba tsena ka gare go sona. “Ka morago ga fao Morena a tswalelela Noa ka gare.” (Genese 7:16)

Nagana e le bona fela go tšhabela meetsefula le go thoma ka leswa lefaseng le leswa leo le se nago bobe. Naa re tla ba ka gare ga leselawatle?