Go Thoma ka Leswa – Letšatši la 12

Go bile letšatši la manyami ge kgošigadi ya mmušo a hlokafala e sa le yo monnyane. O be a sa rate fela ke kgoši, eupša a ratwa le go hlophiwa ke batho ba mmušo ka moka. Batho ba bantši go ralala le naga ba tlile polokong ya gagwe. Bahlanka ba kgoši ba be ba swere lepokisi la gagwe mekgotheng gomme go kwagala sello sa batho bao ba bego ba mo llela.

Morago ga go sepela mekgotheng, bahlanka ba beile lepokisi kgauswi le lebitla, moo kgoši o khunamego gomme a lla, “Justine! Justine! Ke tla phela bjang ka ntle le wena?” Ge mafelelong a emelela le go phumola megokgo, a bolela a tiišitše a re, “Bahlanka, tswalelang lebitla. Re ka se boloke kgošigadi ka go lona. Gosasa re tla thoma go aga tempele, ka materiale e mebotse fela, bjalo ka lefelo la tlhompho go kgošigadi ya rena. Ga go yo a swanetšego go mo lebala!”

Modiro wa go aga o ile wa thoma. Ge dikgwedi di fetoga mengwaga, moago wa ba o mobotse kudu, eupša baagi ba se šetše kudu lepokisi la kota leo le bego le tletše ka lerole bogareng bja phapoši.

Letšatši le lengwe, kgoši a tsena ka tempeleng gomme, ka go kgotsofala, a kgahlwa ke mošomo wa mmabole le bokgabo bjo kaonekaone mabotong. Ge a feditše, a retologa go tšwela ntle, ka kotsi a thula ka leoto la gagwe lepokisi la kota leo le bego le le bogareng bja phapoši. Ka go selekega, a bitša o tee wa bahlanka gomme a mo laela gore ba ntšhe lepokisi ka phapošing. Ka go se tsebe, kgoši o laetše bahlanka go ntšha kgošigadi ka tempeleng.

Ke ba bakae ba rena bao ba wetšego molabeng o swanago bjalo ka kgoši? Mathomong, re makatšwa ke bogolo, lerato le leano la tlhakodišo la Modimo go batho. Re paletše ke go leta go botša batho bao re phelago le bona gore ke ka sehlabelo sa Jesu go rena sefapanong. Ka gona, ge re sa hlokomele, re tsena molabeng wa lenaba moo re swaregago kudu ka dilo tša Modimo (mohlala, go abela bahloki dijo, dipasara le diprotšeke tše dingwe), moo re lebalago ka Modimo.

Theeletša mantšu a Modimo go Kutollo 2:2-5: “Tše le di dirago ke a di tseba; ke tseba le maitapišo a lena, le kgotlelelo ya lena … Eupša se ke le solelago sona ke ge le se sa nthata bjalo ka pele. Gopolang gore le be le nthata bjang. Sokologang, gomme le dire tše le bego le di dira pele. Ge le sa sokologe, ke tla tla go lena ka tšea sehlomamabone sa lena madulong a sona.”

O ka, ka kgonthe, bolela gore Modimo e sa le lerato la gago la pele? Goba o wetše molabeng wa go tsepelela kudu go dilo tše dingwe? A re mmeng gape setulong sa bogoši sa dipelo tša rena lehono. Modimo a go šegofatše.