Go Thoma ka Leswa – Letšatši la 18

[BOKAMORAGO: Ke rata go abelana ka bopaki go tšwa go babadi ba rena ba babedi ka tšhireletšo le tlhokomelo ya Modimo go rena lehono.]

Mmadi wa 1, Sandra Faber: “Ke be ke kgoga kudu mengwaga e mentši. Nakong e nngwe, ke ile ka kgoga disekerete tše 60 ka letšatši. Ga go a ba le pilisi, keletšo goba pampišana, ye e bego e holofetša go nthuša go tlogela go kgoga, ye e šomilego. Ka 2005, ke neetše leswa bophelo bja ka go Modimo gomme ka thoma go sepela kgauswi le yena. Le ge go le bjalo, ke katane le go tlogela go kgoga. Mesong e mengwe, ke badile sengwalwa go makasine mabapi le mosadi yo a bego a hlaloša ka fao Moya wo Mokgethwa ka maatla a phagametšego tlhago o mo thušitšego ka gona boemong bjo thata ge a kgopela Modimo go mo hlahla ka Moya wa gagwe. Sengwalwa se nkgomile kudu gomme ka khunama ka matolo, le go kgopela Modimo go ntokolla go temalelo ka Moya wa gagwe wo Mokgethwa.
Modimo o kwele thapelo ya ka gomme ka lokollwa le semeetseng. E šetše e le mengwaga gomme go tloga ka lona letšatši leo, ga ke sa ka ka kgoma sekerete – goba go itemogela dika tša tlogelo! Modimo ke yo mogolo. Ka nnete o dirile mohlolo bophelong bja ka.”

Mmadi wa 2, Mabel Swart: “Mengwaga e mmalwa ya go feta, bahlakodi ba tlile ka lebenkelng moo ke bego ke šoma gomme ba tšea tšhelete e ntši ka gare ga motšhene wa go lokela tšhelete. Ka go tšhoga, ke ile ka ba kitimiša, eupša gateetee ka itemogela bohloko bjo bogolo maotong. Bohloko bo be bo le šoro moo ke emego go ba kitimiša gomme moleti a tšwela pele go ba kitimiša.
Kua gae mathapama, bohloko bo gaketše gomme monna wa ka a nkiša sepetlele. Morago ga diteko tše mmalwa, ngaka e re tsebišitše gore ke na le dibeke tše 17 ke imile, eupša ka lebaka la letšhogo, mmele wa ka o be o le gare o gana ngwana. Go be go šetše go na le madi ka gare ga moroto wa ka gomme a re ga go se a ka se dirago go thibela seo.
Re ile gae gomme ra thoma go rapela. Re eme dikholofetšong tša Modimo gomme ra mo kgopela re tlaletše go dira mohlolo go phološa ngwana wa rena. O tseneletše gomme a mphodiša. Ka 21 Lewedi 1994, morago ga go rwala ngwana dikgwedi tše senyane, ngwana wa rena yo mobotse, wa go phela gabotse mmeleng a belega. Ke tumiša leina le lebotse la Jesu Kriste!”

Sandra le Mabel bobedi ba itemogetše maatla a Modimo ka gobane ba beile tumelo ya bona ka mo go feletšego go yena. Theeletša gape mantšu a Jesu go Markose 11:24: “Ka lebaka leo ke le botša gore tšohle tše le kago di kgopela ka thapelo, le dumele gore ruri le tla di fiwa, gomme le tla di fiwa.” Gape go Johanese 16:23 re bala gore: “… se le kago se kgopela Tate ka ge le le ba ka o tla le fa sona.”

Go na le maatla leineng la Jesu Kriste. A re rapeleng ntle le pelaelo le go leta ka lethabo go bona seo a tlago re direla sona maphelong a rena. Modimo a go šegofatše.