Go Thoma ka Leswa – Letšatši la 21

Lesogana le le bego le le karolo ya sešole le be le segwa le go gobošwa ke molaodi le madira, ka lebaka la tswalano ya gagwe le Modimo. Ka letšatši le lengwe, molaodi o tšere sephetho sa go go mo goboša kudukudu pele ga madira. A bitša lesogana, a mo neela dinotlelo tša lori gomme a mo laela go e phaka pele ga mothaladi wa dikoloi tše dingwe tše di bego di phakile – a tseba gore lesogana le be le sa kgone go otlela.

Ge lesogana le araba ka gore ga le kgone go otlela, molaodi a le sega ka lenyatšo a re, “Ke ka lebaka la eng o sa kgopele Modimo wa gago mohlolo?” Lesogana la tšea dinotlelo gomme la sepela go ya loring, le rapela gore Modimo a šomiše boemo bjo go dira mohlolo wo o tlago tumiša leina la Gagwe.

Lesogana la tsena ka gare ga lori, la e dumiša gomme madira ka moka le molaodi ba maketše, a phaka lori gabotse moo molaodi a nyakilego gore a e phake gona. Ge a etšwa ka loring, madira a be a lla: “Re nyaka go hlankela Modimo wa gago,” yo mongwe wa madira a realo, ge lesogana le eya go bona. Molaodi a ya loring, a emiša ponate gomme a bontšha madira gore go be go se na entšene ka gare ga lori. Lesogana la myemyela gomme ka go ikokobetša la re, “Wa bona, Modimo yo ke mo hlankelago o dira di sa kgonege gore di kgonege, gomme a ka phediša tše di sa phelego.”

Naa o ikhwetša ka gare ga boemo, bjalo ka lesogana, moo Modimo e lego yena fela yo a ka go neago katlego? Theeletša gape mantšu go Mateu 6:33-34: “Lena sa pele le šomele mmušo wa Modimo le tše Modimo a nyakago gore le di phethe, gomme tše dingwe tšeo ka moka o tla le okeletša ka tšona. Ka gona le se ke la tshwenyega ka tša ka moswane, ka gobane la ka moswane le na le a lona mathata. Letšatši le lengwe le le lengwe le na le mathata a a le lekanego.”

Modimo o dirile tsela ka gare ga Lewatle le Lekhubedu ge Baegepeta ba nyaka go hlasela Baisraele. Modimo o thušitše Estere ge a be a mo phuphuthela gore a phološe Baisraele. Modimo o file Gideone maatla a phagametšego tlhago go lwa ntwa ka banna ba 300 fela kgahlanong le madira a maatla. Modimo o tswaletše melomo ya ditau go phološa Daniele. O phološitše Shadraka le Meshaka le Abednego ka gare ga moubelo wo o laumago mollo. Go oketša moo, Modimo o romela mollo go tšwa legodimong ge Eliya a ema a le noši thabeng, a tshepha Modimo go iponagatša go baprofeta ba Baale.

Ga go se se palelago Modimo. Ge re thoma go mo amogela ditseleng tša rena ka moka, le go nyaka mmušo wa gagwe le go loka ga gagwe pele, dilo tša rena ka moka re tla di hwetša ka nako ya maleba. Anke seo ebe pono ya gago lenyaga! Modimo a go šegofatše.