Go Thoma ka Leswa – Letšatši la 7

Kgalekgale, monna yo bohlale o agile ntlo ya gagwe godimo ga leswika. Pula ya na, mafula le diphefo tša betha ntlo, eupša ntlo ya se we, ka gobane motheo o agilwe godimo ga leswika.

Moagišani wa gagwe, le ge go le bjalo, o agile ntlo ya gagwe lešabašabeng. Ge pula e ena, mafula le diphefo di betha ntlo, ntlo ya wa ka gobane motheo o agilwe lešabašabeng.

A re baleng kanegelo gape:

Kgalekgale, lapa le bohlale le agile maphelo a bona go Modimo. Pula ya na ka sebopego sa kgatelelo ya monagano mošomong, menyetla ya go ba maratong ka ntle ga lenyalo, mathata a ditšhelete le malwetši mmeleng. Ge “madimo” a tlile, lapa le le bohlale la ya go Modimo go hwetša tlhahlo. Mmogo, ba nyakile thato ya gagwe ya maphelo a bona. Ka gobane ba agile maphelo a bona go Modimo bjalo ka motheo wa bona, lapa le ga le a wa – ba batamela kgauswi le Modimo kudu le go bona beng dinakong tše tše thata.

Baagišani ba bona ba ipitša “Bakriste”, eupša ba se dire Modimo gore e be yena a tlago pele maphelong a bona. Pula ya na ka sebopego sa kgatelelo ya monagano mošomong, menyetla ya go ba maratong ka ntle ga lenyalo, mathata a ditšhelete le malwetši mmeleng. Balekani ga ba a tsena fela molabeng wa teko, kgatelelo ya dira gore ba kgaogane le go dira gore ba we, ka ge ba agile maphelo a bona go motheo o fošagetšego.

Theeletša gape mantšu go Pesalome 127:1: “Ntlo ya se agwe ke Morena, baagi ba yona ba itapišetša lefeela; motse wa se šireletšwe ke Morena, baleti ba wona ba o letela lefeela.”

Motheo wa bophelo bja gago o tiile gakaakang? Naa o tla šala o sa eme ge madimo a etla bophelong bja gago? A re kgethe go dira Modimo motheo wa maphelo a rena lehono. Modimo a go šegofatše.