Gopola maatla a gagwe – Letšatši la 10

Ba bantši ba ka dumela gore lefase la rena le hloka banna le basadi ba botshephegi le boitshwaro bjo bobotse bjalo ka baetapele. Ba bangwe ba dirile boipiletšo bja diphetogelo tša boitshwaro gomme ke nagana gore, se ga se kgole kudu le nnete ye e rego lefase ka moka le a babja gape le lapišitšwe ke bomenetša, go se tshephege le go hloka boitshwaro bjo bobotse bja setšhaba sa rena. Naa karabo ke eng?

Go ya ka Bibele, se re se hlokago ke “bohlale”. Bohlale ke bokgoni bja go tseba se se swanetšego go dirwa, go dira diphetho tše di nepatšego le go kgona go efoga melaba ya bophelo. Go oketša moo, go ya ka Bibele, go na le “bošilo”. Ka mantšu ao, ke ra pono ye nngwe ya bohlale ye e bonago bophelo ka tsela ya lefase. Ka gona, banna le basadi ba kgona go šomiša mokgwa wa bohlale wa tlhago, ba dira tšhelete e ntši le go aga dikgwebo tše kgolo.

Pono ya Bibele ya bohlale, le ge go le bjalo, ke ye e fapanego. Mathomo ke GO BOIFA MORENA. Testamente ye Tala e šomišitše polelo ye go Moheberu yo a akgafilego kudu yo a bego a tsepha Modimo wa Israele. Go Testamente ye Mpsha, go hlaloša gore go dumela ka mo go feletšego go Morena Jesu Kriste bjalo ka Morwa wa Modimo le Mophološi, le go phelela yena. Seo se hlaloša gore re swanetše go thoma go yena ka merero ka moka ya maphelo a rena. Re nagana ka bophelo ka mo go fapanego. Re bea boleng go dilo tše “bošilo” – bohlale bjo e sego bja Modimo – bo sa beego boleng go tšona. Re tšeela godimo tayo, temogo, bohlale, toka, go se kgethologanye batho, tsebo le kwišišo (Diema 1:1-4).

Motheo wa rena wa go phela o fapane kudu. Le ge go le bjalo, lemoga gore dilo tše re tsepelela go tšona ge re “boifa Morena”. Ge re mmona bjalo ka Morena wa bophelo bja rena gomme dipelo tša rena di le go yena, se se lego bohlokwa go yena se tla ba bohlokwa go rena. Re tla tlogela go tšeela godimo dilo tše di lego bohlokwa go lefase, ka gobane lefase le tšeela godimo dilo tše e lego maaka gomme gantši di re fapoša go dilo tše di lego bohlokwa.

Lemoga ka fao seema se se felago ka gona: “Ditlatla di nyatša bohlale, di gana go rutwa”.

Go Diema, go bolelwa ka “setlatla” gantši. Se ga se sešupo sa motho wa setlatla goba motho yo a hlakanego bjaša. Go e na le moo, go Diema, setlatla ke motho yo a hlokago maitshwaro gape a se nago taba le dilo tša moya. O re ka pelong ya gagwe Modimo ga a gona (Pesalome 14:1). Lešilo ke motho yo a sa eletšegego. Go sa šetšwe gore o mmotša eng, ka mehla o nagana gore o nepile. “Lešilo le gopola gore le dira tše di nepagetšego, yo bohlale yena o kwa dikeletšo.” (Diema 12:15)

Se phele le batho ba ba sa eletšegego, eupša ka mehla ba dumela gore ba nepile go dilo ka moka.

Gopola gore bohlale bja mmakgonthe bo tšwa go boifeng Morena. Ge tswalano ya rena le Modimo e lokile, dilo ka moka di a direga. Boifa Modimo e se motho.