Gopola maatla a gagwe – Letšatši la 15

Bontši bja rena re itemogetše poifo goba kgateletšego ya monagano pele re ka lebeletšana le teko goba bothata bjo bo itšego. Le ge go le bjalo, ga go motho yo a phelago yo a ilego a itemogela se Jesu a itemogetšego sona kua Getsemane, ka serapeng kua Thabeng ya Mehlware, pele a swara.

Lemoga mantšu go Mateu 26:37: “A thoma go nyama le go tlalelwa.” Gomme go temana ya 38, o re: “Ke nyamile la go hwa …” Naa seo se mabapi le eng? Naa Jesu o be a boifa ka lebaka la tlaišo ye sehlogo ya mmele ye a bego a tlo itemogela yona? Mohlomongwe ga go bjalo, ka gobane batho ba bantši pele ga gagwe ba ile ba bapolwa, ba bangwe ka sebete le go nyatša babolai ba Baroma.

Aowa! Go be go na le selo se bohlokwa seo se bego se direga ka gare go yena, moyeng wa gagwe, moo go bego go se na motho yo a ka se bonago. O be a le tshepetšong ya go rwala molato wa lefase. O be a rwala morwalo wa rena le go ba kgauswi le go ineela bjalo ka sehlabelo go bogale bja Tatagwe. Sebe se swanetše go otlwa. Modimo o lokile, ke yo botho, eupša toka e swanetše go dirwa mabapi le sebe. Morwa wa Modimo o be a le kgauswi le go šikara kotlo ya rena go dibe tša rena. O be a lebeletšane le kahlolo ye e bego e swanetše rena.

Naa kahlolo ye e be e le mabapi le eng? E be e le mabapi le gore a rakwe pele ga bogona bja Tatagwe. Naa re thoma bjang go akanya gore se se be se hlaloša eng go Motho wa Bobedi ya Boraro-botee – yo ka mehla a bego a le bogoneng bja Tatagwe? Le ge go le bjalo, selo se bohlokwa se o swanetšego go se tseba ke gore: “Modimo yena o re bontšhitše lerato le a re ratago ka lona, e lego la mola Kriste a re hwela re sa le badiradibe.” (Baroma 5:8)

O se tsoge o belaetše lerato la Modimo go wena. Se gopole gore ga o a swanela gore Modimo a tshwenyege ka wena. Gopola Getsemane! Moo, Jesu o šikere morwalo wa gago gomme a ikemišetša go lebeletšana le kotlo ya gago. Ka lebaka la eng? Ka gobane o go ratile pele o belega.

Ikokobetše. O tla makatšwa. E ba tlalelong. Le ge go le bjalo, se nolege moko. Se belaele lerato la gagwe.