Bible Society of South Africa
Dithulaganyo tša go bala
Gopola maatla a gagwe
Gopola maatla a gagwe – Letšatši la 16
Frank Retief

Gopola maatla a gagwe – Letšatši la 16

Go lahlwa

(Di)temana ya Bibele

MARKOSE 15

34Ya re ka nako ya boraro mathapama Jesu a goelela kudu a re: “Eloi, Eloi, lama sabagtani?” Ke go re: “Modimo wa ka, Modimo wa ka, o ntlogeletšeng?”

MARKOSE 15:34NSO00Bula go Mmadi wa Bibele

Pesalome 22

Sello sa molahlegi le phološo ya gagwe

Go tsebišwa moopediši gore e opelwe ka moopelo wa kopelo “Kgama ya Mahube”. Ke pesalome ya Dafida.

1Modimo wa ka, Modimo wa ka,

o ntlogeletšeng?

Ke golola ke nyaka thušo,

eupša o no fela o le kgole le nna.

2Mosegare ke hlwa ke go llela,

Modimo wa ka,

eupša ga o nkarabe;

le bošego ke lala ke go llela,

eupša khomotšo ga ke e hwetše,

3etšwe o dutše sa borena o le Mokgethwa,

moo go kwalago direto tša Israele.

4Borakgolokhukhu ba rena ba be ba go botile,

mme wena o ba hlakodiša.

5Ba be ba go llela mme ba phološwa,

ba go botile mme ba sa swabišwe.

6Ge e le nnayena ga ke sa le motho,

ke no ba seboko,

ke nyatšwa ke batho,

ke hlaswa ke setšhaba sa gešo.

7Ba ba mponago ka moka ba a nkwera;

ba šonya melomo ba šišinya dihlogo

8ba re: “Yena o botile Morena.

A a mo hlakodiše,

a mo phološe ge eba o a mo rata!”

9Ke wena o dirilego gore ke belegwe,

ke iketle difarong tša mma.

10Ke botile wena go tloga mola ke belegwago,

go tloga mola mma a mpelegago o bile Modimo wa ka.

11Hle, se nkatologe,

ditlaišego di kgauswi!

Ga go yo a ka nthušago.

12Manaba a mantši a ntikaneditše bjalo ka dipoo,

a ntikologile boka dipoo tše šiišago tša Bashane.

13A nkahlamela bjalo ka tau ye e gabutlago e rora.

14Ke bjalo ka meetse a a tšhologilego;

marapo a ka ka moka a a kgwelekgwehla;

pelo ya ka e tologa bjalo ka moti.

15Magalagapa a ka a gagaletše boka lekopelo,

leleme le kgomaretše mehlagare.

O nthapaladitše gore ke hwele thogorogong.

16Lekoko la dikebeka le ntikologile,

le ntikaneditše bjalo ka dimpša.

Ba ntlema maoto le matsogo;

17ke kgona go ipala marapo.

Manaba a ka a ntomoletše mahlo.

18Ba abelana diaparo tša ka,

kobo ya ka ba e direla matengwa.

19Hle, wena Morena, se nkatologe!

Wena maatla a ka,

phakiša o nthuše!

20Ntlhakodiše go ba ba ntlhaselago ka ditšhoša,

o mphološe dimpšeng tšeo.

21Ntlhakodiše molomong wa ditau tše,

o mphološe le manakeng a tšona dinare tše.

22Morena, o kwele thapelo ya ka;

ke tla anegela magagešo tše o ntiretšego tšona.

23Ke tla go reta phuthegong ka re:

“Mo reteng, lena bahlanka ba Morena!

Mo hlompheng,

lena ditlogolo tšohle tša Jakobo!

Mo khunameleng,

lena setšhaba ka moka sa Israele!

24Ga a lahle motlaišegi,

ga a mo hlokomologe ditlaišegong tša gagwe.

Ga a mo furalele, fela ge a mo llela o a mo thuša.”

25Phuthegong ka moka ke tla go tumiša ka lebaka la tše o di dirilego;

ke tla go direla dihlabelo tše ke go tshephišitšego tšona mahlong a ba ba go khunamelago.

26Badiidi ba tla ja nama ya tšona go khora,

bao ba tlago go Morena Tempeleng ba tla mo reta.

Nke ba atlege go ya go ile!

27Batho ba lefase ka moka

ba tla dumela go Morena,

ba sokologela go yena;

ditšhaba tšohle di tla mo khunamela,

28ka gobane ke kgoši, o a di buša.

29Bahumi ka moka ba tla mo obamela;

bohle ba ba boelago leroleng ba tla mo khunamela.

30Le ba ba sa tlago tswalwa ba tla mo hlankela,

le ditlogolo tša bona tša anegelwa tša Morena,

31le tšona tša anegela tše di tlago ba di tswetšwe tša re:

“Morena o phološitše setšhaba sa gagwe.”

Pesalome 22NSO00Bula go Mmadi wa Bibele

Batho ba bantši ba ikwetše ba tlogetšwe ka mo go feletšego ke Modimo dinakong tše fapanego maphelong a bona. Kgoši Dafida ka nnete o itemogetše seo, lebakeng le lengwe bophelong bja gagwe. O ngwetše Pesalome ka seo, Pesalome 22. Ke temana ya pele ya Pesalome ye Jesu a e tsopolago ge a le sefapanong.

Ke rile, “go e tsepola ge a le sefapanong”? Se ga se tlhalošo ya se se diregilego fao, ka Lebohlano le Lebotse. Go be go le legoa, go tsetla, go golola ka go kwa bohloko kudu. Temaneng ye e nnoši, ge e kwešišwa gabotse, re na le kanegelo ya ebanagedi ye e feletšego. Dilo ka moka di mabapi le Kriste le lehu la gagwe sefapanong. Ke mo sefapanong moo selo se se tseneletšego gape se segolo se diregago gona, se monagano wa motho o ka se se kwešišego gabotse. “A tlogetše ke Modimo”? Naa go a kgonega? Mmadi yo a rategago, se o lebeletšanego le sona mo ke sephiri sa Kriste a tlaišega ka lebaka la dibe tša rena. Ke mang a ka re botšago gore tlaišego ya gagwe ne e le mabapi le eng? Mo ke monna yo a lebeletšanego le kahlolo ye e bego e lebane rena. Tahlo ya mafelelo, ye e bego e re lebane, ga bjale e lebane yena. O šikere dibe tša rena gore re lebalelwe.

Ka kgopelo se tšeele se fase. Se se diregago mo ga go mantšu a a kago se hlaloša. Ka moka re hloka go khunama ka go makala gore selo se se bjalo se ka direga. Modimo o otla Morwa wa gagwe legatong la rena, gore rena re lokologe! Naa lefase le kwele ka selo se bjalo?

Le ge go le bjalo, nnete ke gore, go diregile. Se se hlaloša gore go na le kholofelo go bohle ba ba tlago go yena. Kgobogo sefapanong ke gore le batho ba ba bego ba sa swanela, ba ba retologelago go Jesu ka tshokologo ya mmakgonthe, ba hwetša tebalelo, kamogelo le kholofelo ya bokamoso. Se se goboša kwešišo ya ba ba phelago gabotse, ba dikgopolo tša bona tša toka di nyakago gore batho ba babe ba otlwe. Le ge go le bjalo, se ba sa se kwešišego ke gore batho ba babe ba šetše ba otlilwe. Yo a ba emego legato o tšere kotlo ya bona. Kanayo e kaone e dirilwe. Yo a sa tsebego sebe e bile sebe go bona, gore bona e be baloki ba Modimo go yena.

Naa go na leina go tiro e bjalo ka ye? Ee, ke kgaugelo! Kgaugelo, mogau wo o sa swanelago go lefase la badiradibe, gore ba retologele go monna gare ga banna – ka nnete Modimo/Monna, yo e bilego mophološi sefapanong.

Se nologe moko. Dibe ka moka di a lebalelwa. Badiradibe ka moka ba ka amogelwa. Go na le sekgoba sa gago sefapanong – etla feela! Etla, gaešita lehono!

Bible Society of South Africav.4.25.3
RE HWETŠE GO