Gopola maatla a gagwe – Letšatši la 21

Magareng ga batho ba Modimo, ga go a swanela go be le go bolela maaka goba go se tshephege. Re ba Yo a rilego, “Ke nnete”, gomme nnete le go tshephega di swanetše go ba karolo ya dilo ka moka tše re di dirago.

Bontši bja rena re tseba bohloko, tlhakatlhakano le thulano ye e tlišago ke batho ba ba bolelago maaka. Mohlomongwe, wena o bile motšwasehlabelo wa bofora. Ka gona o a tseba gore seo se bohloko gape se a makatša.

Re a tseba gore re phela lefaseng la maaka. Ga se fela boradipolitiki le batho ba go tuma ba ba re botšago maaka, eupša gantši re palela ke go efoga maaka le bofora tše di lego ka gare ga ditokumente tše ntši tše re di saenago, gore re phele lefaseng le. Mananeo a rena a thelebišene a tletše ka dilo tše di senyago setšhaba sa rena. Nagana ka dihlogo tša a managwe a maneneo a thelebišene ge o bala se. Ka moka di go botša maaka, bofora le go se botege.

Diema 19:5 e re, “Hlatse ya maaka ga e pheme kotlo, ramaaka ga a ke a phonyokga.” Ka moka re a tseba gore maaka le dinnete tše di sa felelago di tšwela nyanyeng, eupša go kweša bohloko go bona dimelo tša baswa di bopša ka go phela tikologong moo yo mongwe le yo mongwe a phelago ka go bolela maaka.

Se ga se bjalo ka Bakriste. Re a tseba, ka maikwelo, gore nnete e swanetše go bopa le go hlama maphelo a rena. Re tseba nnete ya Diema 19:22: “… go ba ramaaka go phalwa ke go diila”. Re gopola thuto mabapi le maatla a leleme – Ke sethonyana se senyenyane, fela le ikgantšha ka dilo tše dikgolo (Jakobose 3:5).

A re efogeng go bolela maaka ka mo go feletšego. Re latela Morena Jesu Kriste, yo a sa kago a bolela maaka. Selo le ge e le sefe se ba bangwe ba se dirago, ka mehla a re ikemišetšeng go bolela nnete gomme re be batho ba ba tsebjago gore ba a tshephega le go botega, ka lebaka la Kriste.