Jesu ka go Testamente ye Tala - Letšatši la 1

Batho ba nagana ka diswantšho. Bibele e re thuša go bopa seswantšho sa Modimo, e se ka kgopolo ya ka fao Modimo a lebelegago ka gona, eupša yo Modimo e lego yena. E bontšha tswalano ya Modimo le rena batho. Bothata ke gore, ka dinako tše dingwe, go na le tshedimošo ka Bibeleng ye e dirago gore re be le seswantšho se se fošagetšego sa Modimo.

Seswantšho sa Modimo bjalo ka modiši, go Pesalome ye e tsebjago kudu ya 23, se a kgothatša. Se se re botša se sengwe ka tlhokomelo ya Modimo le tšhireletšo. Se re tlišetša khutšo. Se hlaloša gore re ka bota Modimo ka boitshepo gomme ga re a swanela go tshwenyega ka bokamoso. Go Pesalome ye e swanago, re bona seswantšho sa Modimo bjalo ka Modimo wa kgaugelo.

Dilo ga di a sepela gabotse, le ge go le bjalo, nakong ya bothopša bja Israele gomme kudukudu nakong ya mengwaga ye 300 ye e fetilego magareng ga diTastemente tše Tala le ye Mpsha. Go tloga ka nako yeo, batho ba be ba swantšha Modimo bjalo ka moahlodi yo a otlago. Pono ye ya Modimo e hwetšwa ditemaneng tše dingwe tša Bibele. Nakong ya go hlatloga ga Bojuda, tlhalošo e fošagetšego ya Modimo e fihlile tlhoreng ka kgatelelo ya baetapele ba Bajuda ya go latela molao.

Jesu, le ge go le bjalo, o tlile go fetoša seswantšho se sa Modimo. Jesu Kriste ke Modimo ka sebopego sa motho. O tlile go re bontšha ka fao Modimo a lego ka gona. Se ke ka lebaka leo re swanetšego go bala Bibele go tloga mathomong go fihla mafelelong. Re swanetše go thoma ka Testamente ye Mpsha re ithute se Jesu a tlilego go tlo re ruta sona ka Modimo. Ke fela ge re tseba Modimo ka Kriste Jesu moo re ka boelago morago gomme ra nyaka Modimo ka go Testamente ye Tala.

Mo matšatšing a mmalwa a latelago, re tla leka go hwetša tše dingwe tša seswantšho tša Modimo, tšeo Kriste a tlilego go re bontšha tšona, ka go Testamente ye Tala le go botšiša ka ditlhalošo tša tšona go maphelo a rena.