Jesu ka go Testamente ye Tala - Letšatši la 3

Modimo o re nea menyetla e meswa bophelong. Re swanetše go šomiša maphelo a rena go hlankela le go tumiša Modimo. Modimo gape o re nea bophelo bjo bo sa felego bjalo ka mpho ya kgaugelo.

Modimo o dirile gore maphelo a rena e be a maswa ka Jesu Kriste. Go 2 Bakorinte 5:17-18 re bala: “Ka lebaka leo, ge motho e le wa Kriste e ba sebopiwa se sefsa; tša kgale di fetile, go tlile tše difsa. Tšeo ka moka di dirwa ke Modimo, yo a re boelantšego le yena ka Jesu Kriste, le rena a re fa modiro wa go boelanya ba bangwe le yena.” Tswalano ye e mpsha le Modimo e a bonagala ka tsela ye re phelago ka yona. Bjale re phela bjalo ka batho ba baswa bao ba dirago dilo ka tsela e mpsha. Se se ra gore re swanetše go phela ka tsela ye batho ba bangwe ba kago bona le go itemogela lerato le kgaugelo ya Modimo.

Go na le gape mmono wa Kutollo 21:5-6a wa gore Modimo o dira dilo ka moka tše mpsha. “Yo a dutšego setulong sa bogoši a re: ‘Bona, dilo tšohle ke di dira tše mpsha!’ A ba a re go nna: ‘Ditaba tše di ngwale, ka gobane ke tša nnete ebile di a tshepega.’ A ba a re: “Go phethegile! Ke nna Alfa le Omega, Mathomo le Bofelo.’ ” Bophelo bjo ga se bjohle bjo bo lego gona. Ka Jesu Krisete, re šetše re na le kabelo go nnete e kgolo ya letago – bophelo bjo bo sa felego.

Modimo o boditše Noa go tšwa ka leselawatleng. Kanegelo ya Noa ke mohlala o hlalošago Modimo wa kgaugelo yo a nego motho monyetla wa bobedi. Taelo ya Modimo go Noa go tšwa ka leselawatleng e bohlokwa. Ka mehla re ka se dule ka mafelong a bolokegilego. Bophelo ke mpho go tšwa go Modimo gomme bo swanetše go phelwa.

Ka moka re na le menyetla ya moswananoši ye e re tlelago. Re dira eng ka yona? Re hloka go e šomiša ka mo re ka kgonago go phelela letago la Modimo le go phela letšatši le letšatši ka kholofelo. Dilo ka moka bophelong ga di go wena; ge o dira dibe, ga se bofelo. Ka mehla go na le khomotšo ya gore Modimo, ka kgaugelo ya gagwe, o tla go direla mathomo a maswa.

.