Bible Society of South Africa
Dithulaganyo tša go bala
Jesu ka go Testamente ye Tala
Jesu ka go Testamente ye Tala - Letšatši la 6
Gerhard Lindeque

Jesu ka go Testamente ye Tala - Letšatši la 6

Melao ya Modimo

(Di)temana ya Bibele

DOITERONOMIO 22

1“Ge o ka bona seruiwa sa Moisraele wa geno se timela, o se ke wa se hlokomologa; se boetše go yena. 2Eupša ge mong wa sona a dula kgole, goba o sa tsebe gore ke sa mang, gona o ye naso gae. Ge mong wa sona a etla a se nyaka, o mo neele sona. 3O dire bjalo le ge o ka hwetša pokolo, goba seaparo, goba se sengwe le se sengwe se Moisraele wa geno a ka bago a se timeditše.

4“Ge o ka bona pokolo goba kgomo ya Moisraele wa geno e wele fase, o se ke wa e hlokomologa; o mo thuše le tsoše phoofolo yeo.

5“Basadi ba se ke ba apara diaparo tša banna, le banna ba se ke ba apara diaparo tša basadi, ka gobane Morena Modimo wa lena o hlaswa batho ba ba dirago tše bjalo.

6“Ge o ka hwetša sehlaga sa nonyana mohlareng goba fase le tshadi ya ntshe e alametše mae goba mafotwana, o se ke wa tšea nonyana yeo. 7O ka tšea mafotwana, eupša nonyana o e lese e itshepelele, gore o tle o phele bophelo bjo botelele bja katlego.

8“Ge o aga ngwako wo mofsa, o raretše magomo a tlhaka ka mmotwana, ke moo o ka se bego le molato ge motho a ka wa mme a hwa.

DOITERONOMIO 22:1-8NSO00Bula go Mmadi wa Bibele

Jesu Kriste o be a tseba melao ya Testamente ye Tala gabotse. E be e le Bibele ya ka nako yeo. Le ge go le bjalo, o ile a latofatšwa ka go se latele melao ya Moshe. Ka gona, Jesu o gatelela gore ga a nyake go bolela gore melao ga e na mohola, eupša gore o nyaka go e nea tlhalošo ya nnete.

Ge o e lebelela, ye mengwe ya melao ka go Testamente ye Tala ga e mabapi le tswalano ya rena le Modimo. E na le melao ya go fapafapana e mabapi le diaparo, diphoofolo, dikhouto tša go aga le dikgomo tše di timetšego. Motho a ka re, ge e le gabotse, se se mabapi le melao ya masepala le melwawana ya go laola setšhaba se se rulagantšwego.

Ditemana tše dingwe ka go Testamente ye Tala di mabapi le go hlweka nameng tše amantšhwago le batho ba ba ikhwetšago setšhabeng sa pele. Sa go makatša ke gore melao ye e filwe rena gammogo le ditokišetšo tša dihlabelo, matšatši a menyanya le melao e mengwe ya sedumedi. Bahlami ba Testamente ye Tala ba e neile maatla a swanago. Go oketša moo, re swanetše re gopole gore nakong ya bothopša bja Israele, ge dikarolo tše kgolo tša Testamente ye Tala di ngwalwa, morero e be e le go hlankela Modimo ka tlhokomelo e kgolo, go leka go thibela poeletšo ya bothopša.

Ge bjale re thoma go bala Bibele go tloga go Genese gomme re fihla go dipuku bjalo ka Lefitikose le Doiteronomio, e ka re dira gore re nologe moko. Re tšhošwa ke melao ye ka moka. Se ke sona se se diregilego go batho nakong ya ge Jesu a le lefaseng. Ba ikwetše o ka re ba ka se tsoge ba e obametše goba go o latela, ke ka lebaka leo Jesu a dirago kakaretšo ya molao ka melao e mebedi: rata Modimo gomme o rate bangwekawena.

Modimo ke karolo ya bophelo bja rena bja letšatši le letšatši. Ga re phele fela bogoneng bja Modimo ka Sontaga kerekeng. O gona mo gohle. Tlhalošo ya Jesu ya molao gape e ama rena ge re otlela dikoloi tša rena, go fa mohlala.

Bible Society of South Africav.4.26.9
RE HWETŠE GO