Ke mosadi – Letšatši 3

₂₇Ka gona Modimo a hlola batho, a ba dira gore ba swane le yena. A ba dira e le monna le mosadi,

₁₉Kgane ga le tsebe ge mebele ya lena e le tempele ya Moya wo Mokgethwa wo o phelago mo go lena, wo le o filwego ke Modimo? Gape ga le sa le ba lena beng, ₂₀Modimo o le rekile, gomme bjale le ba gagwe. Ka gona mebele ya lena le e šomišetše go tumiša Modimo.

₁₀Ka letšatši la bošupa la monyanya, ge kgoši a ikhoretše dino, a bitša banna ba ba šupago ba ba amogilwego bonna ba e bego e le bahlanka ba gagwe ba bagolo, Mehumane, Biseta, Harbona, Bigta, Abagtha, Setare le Karkase. ₁₁A ba laela gore ba tliše Mohumagadi Bashti a rwele mphapahlogo wa gagwe wa bogoši. Gape mohumagadi yoo e be e le mosadi yo mobotse, gomme kgoši a nyaka go kgantšhetša bakgomana le baeng ba gagwe ka moka botse bja gagwe. ₁₂Eupša ya re ge bahlanka bao ba botša Mohumagadi Bashti se kgoši a se laetšego, yena a gana go tla. Gomme seo sa befediša kgoši kudu.

₃Botšhepi bja lena a e se be bja ka ntle, bjalo ka go loga meriri le go tšhepa ka dikgabišo tša gauta le diaparo tša mabaibai. ₄Bja lena botšhepi a e be bja ka pelong, botšhepi bjo bo sa senyegego bja moya wo boleta wo o thotšego, e lego wona wo Modimo a bonago e le wo bohlokwa. ₅Woo ke wona mokgwa wo basadi bale ba kgale ba ba bego ba ineela go Modimo mme ba mmotile ba bego ba ikgabiša ka wona ka go ikokobetša go banna ba bona,

₃₄gomme o pelopedi. Mosadi yo a sego a nyalwa le kgarebe ba kgothalela tša Morena, gore ba tle ba kgethwafale mmeleng le moyeng. Yo a nyetšwego yena o kgothalela tša lefase, ka mo a ka kgahlago monna wa gagwe.

₃Le bakgekolo o ba laye gore ba itshware ka mo go swanetšego bakgethwa. Ba se ke ba ba le lesebo, goba ba laolwa ke bjala. E be ba go ruta tše di lokilego, ₄gore ba kgothaletše mathari go rata banna ba bona le bana ba bona, ₅le gore ba itshware ka tlhaologanyo le bohlweki, le gore e be ba ba hlokomelago malapa a bona, ba ba ikokobetšago go banna ba bona, gore go se be le motho yo a gobošago molaetša wa Modimo.