Ke tla – Letšatši la 1

Nagana ka nako bophelong bja gago moo o itemogetšego tlhohlo e kgolo (goba mohlomongwe molokoloko wa tšona). E amile bjang tswalano ya gago le Modimo? Ge o ka ipha moputso sekaleng sa meputso e lesome, moo 0 (lefela) e emelago lefelo la go lahla Modimo ka mo go feletšego gomme 10 (lesome) e emelago tswalano ya kgauswi le Modimo, o ka ipha moputso wa bokae nakong yeo e boima bophelong bja gago?

Ga bjale nagana nakwana ka nako bophelong bja gago moo o bego o thabile kudu – gomme o hweditše dilo tše ntši. Gape, iphe moputso go ye lesome (10) wo o emelago tswalano ya gago le Modimo nakong yeo.

Gape, ipee sekaleng sa meputso e lesome lehono. O ipha moputso wa bokae?

Ekaba meputso ye e a fapana nakong ya dihla tša go fapanafapana bophelong bja gago? E be mohlomongwe e le 9 goba 10 nakong e boima ka gobane o hloka katlego gomme o rapela Modimo mosegare le bošego? Ekaba mohlomongwe e be e le 3 goba 4 nakong ya lethabo ka gobane o be o swaregile kudu ka dilo tše dingwe moo o paletšego ke go dira nako ya go rapela?

Ka Afrika Borwa, ga bjale re itemogela ditlhohlo tše mmalwa. Balemi ga bjale ba itemogela komelelo e šoro dipolaseng tša bona. Ba bangwe ba itemogela seabe sa ranta ye e fokolago lefaseng la kgwebo mola ba bangwe ba katana le go nagana ka bokamoso ka ntle le letšhogo, ka lebaka la dipolelo tše itšego tša sepolitiki.

Go puku ya Habakuku moprofeta o rapela Modimo go se lebale Baisraele. Ba fapogile go Modimo gomme ba thoma go itemogela ditlhohlo. Go puku ka moka Habakuku o hlaloša bogolo bja Modimo le go gatelela maatla a Modimo le bokgoni bja go tšweletša katlego. Gomme go Habakuku 3:17-19 re bala thapelo ye e tsebegago: “Le ge mego e ka se khukhuše, le merara ya se enywe, le ge puno ya mehlware e ka pala, le mašemo a se be le dijo, le ge mašaka a ka felelwa ke dihuswane, le meraka ya dikgomo ya se be le selo, nna ke tla no thaba ka thakgala, gobane Morena Modimo ke Mophološi wa ka. Morena, Mong wa bohle, o mpha maatla. O ntshepetša gabotse bophelong, ka swana le kgama dithabeng, a ba a ntshepediša ke bolokegile le mebotong.”

Go phetolelo ye nngwe mantšu a Habakuku ke: “Go bota ga ka Modimo ga go laolwe ke maemo a ka a lethabo goba manyami.”

Ekaba ka nnete o ka bolela, bjalo ka Habakuku, gore le ge o itemogela ditlhohlo ka sebopego sa bolwetši, kgateletšego ya ditšhelete, tlhalo, go se šome, manyami, tswalano ye e tšhošetšago go fela goba komelelo polaseng, o tla kgetha go thaba Moreneng le go tumiša Yena bjalo ka Mophološi? Gomme ekaba ke seo o se dirago? Gopola, Modimo ga a robale goba go potuma, gomme dilo ka moka di a kgonega go Yena. Ge re batamela go Yena, le Yena o batamela go rena. Modimo a go šegofatše.