Ke tla – Letšatši la 10


Ke tla dula ke botega
(Di)temana ya Bibele
DOITERONOMIO 5
Mo ke kanegelo ya ka fao Protšeke ya SOS100 e thomilego, nakong yeo Radio Tygerberg 104fm kua Nkasehlakahlakeng sa Kapa e kgobokeditšego tšhelete go rekela balemi dijo tša diphoofolo mafelong ao a bego a wetšwe ke komelelo.
Ka Krisemose, Adri Williams go tšwa mokgatlong wo o sego wa mmušo, Khayelitsha Cookies, a dula tafoleng le balapa le batswadi ba gagwe. Le ge monyanya o be o ba letetše, ga se a tlogela go nagana ka balemi letšatšing leo, bao ba bego ba palela ka go fa diphoofolo dijo ka lebaka la komelelo le sekoloto sa bona seo se bego se oketšegile. Ba bangwe ba bona ba be ba se na dijo magaeng a bona. Ke mang yo a bego a tla ba hlokomela? Ka tšhišinyo ya gagwe ya gore ba dire se sengwe, tatagwe mathomong o rile: “Adri, o ka se thuše batho ka moka ka nageng ya rena. Tsepelela go mokgatlo wa gago gomme o thuše batho fao.”
Go akgofa pelong ya Adri wa gola. O tsebile gore e be e le taelo go tšwa go Modimo. A tšea kgato ya pele ya tumelo. O ikgokagantše le mokgatlo wa Boere in Nood go hwetša fao tlhoko ye kgolo ya dijo tša diphoofolo ka Afrika Borwa e lego gona. A hwetša thekgo go tšwa go MAN Truck le Bus ka go sepetša dijo tša diphoofolo. A boledišana le barekiši gore ba mo rekišetše dijo tša diphoofolo ka theko ya tlase gomme, kgatho ye kgolo ya tumelo, a tšea R17 000 ya gagwe, tšhelete ya mokgatlo o monnyane wo e sego wa mmušo gomme a patelela dijo – ka go obamela taelo ya Modimo ka mo go feletšego.
Ka morwalo wa pele wa dijo tša diphoofolo, Adri le tatagwe ba ema kgauswi le lori kua Williston gomme ba bona ka fao balemi ba bagolo, bao ba bego ba thabile, bannatia ba bego ba lla ka tebogo. Le bona ba palela ke go itshwara. Modimo o kwele dithapelo tša balemi, gomme kobamelo ya gagwe e tlišitše kholofelo boemong bja bona bjo bo bego bo sa na kholofelo. Beke morago ga fao Radio Tygerberg 104fm e bile karolo ya protšeke gomme Protšeke ya SOS100 ya hlongwa semmušo.
Go Doiteronomio 5:33 re bala gore: “Le e phetheng ka moka, gore tšohle di tle di le atle mme le fele le phela nageng ye le yago go e thopa.” Gape, go 2 Samuele 15:22 Modimo o re gopotša gore go obamela go bohlokwa kudu go Yena go feta dihlabelo. O rata gore re obamela ge A re bitša, go e na le go tla le dikgopolo tše botse gomme re mo kgopela gore a di šegofatše. Merero ye e kgothaletšago ke Modimo e šetše e šegofetše.