Ke tla – Letšatši la 12

Mmarakeng kua Galilea, mosadi yo a tšhogilego a tswalela mahlo a gagwe nakwana ge a buša moya, go dikologa ga gagwe go be go bonagala. Mengwaga ye lesomepedi o be a rapelela katlego. O rekišitše dithoto tša gagwe ka moka go lefela dingaka. Ga go o tee yo a mo thušitšego. Ge a bula mahlo, o lebeletše Jesu ka gare ga lešaba, a le dimetara tše mmalwa go yena. O tseba se a swanetšego go se dira. A ikemišeditše, a khunama ka mangwele. Le ge a ka dira seo ka maatla a gagwe a mafelelo, o tla kgwatha morumo wa seaparo sa Jesu lehono.

Letšatšing le lengwe e le bošego, pele ga mojako kua Ethani, mosadi a ema pelo ya gagwe e itia ka lebelo. Ekaba o dirile phošo ka go tla fa? Maikwelo a molato a bophelo bja gagwe bja sebe le dipheto tše fošagetšego ga di rwalege magetleng a gagwe. Go thweng ge A ka mo raka? A buša moya la mafelelo gomme a bula lebati ge a sepela a lebile go Jesu. Ge a khunama pele ga Gagwe, dikeledi tša go itshola di elela marameng a gagwe. Ekaba O tla ba le mogau go yena? Gomme a bula moruswi wa alapastere go tlotša maoto a Gagwe ka makhura a go tura ye a e rekilego ka tšhelete ya gagwe ya mafelelo.

Basadi ba babedi bao ba lego tlalelong, ba khuname pele ga Motho yo a kago ba le mogau, kgaugelo le go kgona go fodiša. Le ge go be go se le o tee wa bona yo a bego a tla kgonthiša poelo ya seemo sa gagwe, bobedi ga bona, ka tumelo, ba tšea kgato go ya go Jesu.

Go Lukase 8:46-48 re bala gore mosadi o kgwathile morumo wa seaparo sa Jesu mmarakeng. Le semeetseng a fodišwa gomme Jesu a retologa a botšiša gore: “Ke mang a nkgwathilego?” Go be go le potšišo ya go makatša go barutiwa ba gagwe, ka gobane go be go na le batho ba bantši bao ba bego ba ikgohla ka Yena. Go Lukase 8:46 Jesu lega go le bjalo o rile: “O gona yo a nkgwathilego, gobane ke kwele go etšwa maatla mo go nna.” Ge Jesu a kopanya mahlo le mosadi, mosadi a khunama fase ka letšhogo pele ga Gagwe, a mmotša gore ke ka lebaka la eng a dirile seo. Go e na le go mo sola, o bile le lerato ka mahlong gomme a re: “Morwedi wa ka, tumelo ya gago e go fodišitše. Sepela gabotse” (Lukase 8:48).

Go Lukase 7 re bala gore mosadi yo a tloditšego maoto a Jesu ka makhura o be a letetše kotlo ka lebaka la botumo bja gagwe bjo bobe. Le gaešita monna yo ba bego ba le ntlong ya gagwe, o ile a ipotšiša gore ka ka lebaka la eng Jesu a mo dumeletše go tlotša maoto a Gagwe ka makhura. Ka ge Jesu a tsebile se se lego kgopolong ya gagwe, A re: “Yena o bontšhitše gore o na le lerato le legolo ka gobane o swaretšwe dibe tša gagwe tše e bego e le tše ntši. Yo a swaretšwego sebe se senyenyane fela, le lerato la gagwe ke le lenyenyane.” Jesu a lebelela mosadi, a re: “O swaretšwe dibe tša gago” (Lukase 7:47-48).

Basadi ba babedi ba hweditše mogau wo o bego o sa ba swanela wa Modimo ka gobane ba, ka tumelo, kgethile go nyaka sefahlego sa Gagwe. Go Jakobose 4:8 re bala gore: “Batamelang Modimo, gomme le yena o tla le batamela.” Gomme go Jesaya 1:18, Modimo o re: “Le ge le hwibitše perr ka dibe tša lena, le tla šweufala twaa! Le ge le re hwibii, le tla šweufala pšoo!”

Ekaba a o hlologetše, bjalo ka basadi ba, go itemogela mogau wa Modimo bophelong bja gago lehono? A re tšeeng kgato ya tumelo lehono re yeng go Jesu. O bontšhitše mogau le kgaugelo go bona. O tla dira se se swango go wena. Modimo a go šegofatše.