Ke tla – Letšatši la 14

Jeremy le Jason Holden, mafahla go tšwa Hollywood, ba tšere sepheto sa go ruta mahodu a go utswa dipaesekela thuto. Ka metato ye e bego e loketšwe gabotse dipaesekeleng tša bona, sedirišwa sa go laola o le kgole le khamera ye e bego e utilwe, ba ya mekgotheng. Ba bea paesekela ye e bego e sa kgokwa kgahlanong le pala ya lebone mokgotheng bjalo ka “molaba” go goketša bao e ka bago mahodu.

Nako le nako, ge motho a feta o be a lemoga gore paesekela ga e a notlelwa gomme a e tšea. Motsotso wa go makatša o tlile ge lehodu le dula setulong sa paesekela. Mafahla, ka sedirišwa sa go laola o le kgole, ba tšhouka lehodu. Boikarabelo bja lehodu bo be bo segiša. O tee wa mahodu a tšhoga kudu moo a nyakilego a thula mohlare wa kgauswi.

Modimo ke Seetša gomme re, go karolo efe le efe ya maphelo a rena, swanetše go katanela go pheleng ka gare ga Seetša. Ge re sa dire bjalo, re namela “paesekela” ya lanaba ka go se tsebe ye a e beilego maphelong a rena bjalo ka molaba go re kweša bohloko go ya pele le phedišo. Go Baefeso 4:26-27 re bala gore: “Ge le ka tšhoga le galefile le se ke la lesa kgalefo ya lena e le diriša sebe, le gona letšatši le se ke la le sobelela le sa galefile. Le se ke la fa Diabolose sebaka.”

Re namela bjang “paesekela” ya lenaba? Re dira seo ka go seba, go e na le go le fediša; ka go ketha go lefeletša bobe ka bobe go e na le go lebalela le go bontšha kgaugelo; ka go felela pelo bao re ba ratago; ka go dumelela dipelo tša rena go tlala ka mona, boradia, go senya ba bangwe maina le go duma, go e na le go di tšhabela (Baroma 1:29-31); goba go lahla potego ya rena ka go dira selo se se sa sepelelanego le thato ye phethagetšego ya Modimo.

Go Diema 4:23 re bala gore: “Se bohlokwa go feta tšohle ke go itota go tše o di naganago, gobane ke tšona di laolago bophelo bja gago.” Mopesalome o kwišišitše se gomme a rapela go Pesalome 139:23-24: “Mphetleke, Modimo, o tsebe pelo ya ka; ntekole, o bone khuduego ka go nna. Ntebelele ge ke na le bobe, gomme o nkiše tseleng ya go sa felego.” Go 1 Bathesalonika 5:19,22-23 re bala gore: “Le se ke la šitiša Moya wo Mokgethwa … gomme le ile bobe bofe le bofe. Yena Modimo wa khutšo a le kgethwafatše ka botlalo mme a le lote moya, pelo le mmele ka mokgwa wo o phethegilego, a le šireletše le se be le bosodi mohla Morena wa rena, Jesu Kriste, a etla.”

Nagana nakwana ka bophelo bja gago. Ekaba o file lenaba sebaka o tseba goba o sa tsebe? Ekaba mohlomongwe o šetše o itemogela go “tšhoukwa” ke lenaba ka lebaka la seo? A re fologe paesekela, re e lahlele ka thoko gomme re tšhabe go selo sefe goba sefe se se re aroganyago le bogona bja Modimo. A re kgopeleng Modimo go re kgontšha, ka Moya wa Gagwe wo Mokgethwa, go phela bophelo bjo bo se nago bosodi pele ga Gagwe. Modimo a go šegofatše.