Ke tla – Letšatši la 17

E tee ya ditaba tše di tlwaelegilego kudu tše di tšwelelago go diimeile tša babadi ke ditlhohlo lefelong la mošomo. Motho o phela bjang gabotse, o a bonega seetša sa Modimo dinakong tša go lahlegelwa ke mošomo, theeletšo ya kgalemo kgahlanong le wena goba ge o katana le go hwetša mošomo, le ge o rometše palo e kgolo ya di-CV? Gape, re ka thibela bjang tikologo ya mošomo, ye e tletšego ka lesebo, bašomedi-gotee ba thata goba moo o lego modumedi fela gomme ka dinako tše dingwe ba a go kwera ka seo, go re fekeetša?

Mo ke dikeletšo tše tharo go tšwa Lentšung la Modimo:

1) KGOPELA BOHLALE LE TLHAHLO GO MODIMO

Letšatši le letšatši re hloka go tšea diphetho tše ntši lefelong la mošomo. Go be go ka se be bonolo kudu ge re ka be re na le bohlale bja Modimo ge re tšea dipheto? Go Jakobose 1:5 re bala gore: “Eupša ge mo gare ga lena go ka ba le yo a hlokago bohlale, a bo kgopele go Modimo, gomme Modimo o tla mo fa bjona, ka gobane yena o fa bohle ka go se timane le ka go se balabale.” Go Diema 3:5-6 go ngwetšwe gore: “O tshephe Morena ka pelo ya gago ka moka. O se ke wa tshepha kwešišo ya gago. O gopole Morena dilong tšohle tše o di dirago, gomme yena o tla go lokišetša ditsela.” Gomme go Jesaya 30:21 re hwetša kholofetšo: “Ge le phamoga tsela le eya ka thoko efe le efe, le tla kwa lentšu ka morago ga lena le re: ‘Tsela ke ye. Tšeang ka yona.’ ” Modimo ga a nyake fela go re šireletša go tšeeng dipheto tše fošagetšego, eupša gape O nyaka go re hlahla go tšeeng dipheto tša maleba.

2) DIRA KA POTEGO
Go Baheberu 4:13 re bala gore: “Ga go sebopiwa se se širegelago Modimo.” Go Doiteronomio 25:16 re bala gore: “Morena o hlaswa batho ba ba hlalefetšago.” Ge re thoma go phela ka temogo ya gore Modimo o tseba kgopolo ye nngwe le ye nngwe le tiro maphelong a rena, go ba bonolo go leka go dira ka potego ka dinako ka moka, re tseba gore o tla tumišwa ge re dira seo.

3) GOPOLA YO O MO ŠOMELAGO
Modimo ke Mothwadi wa rena wa kgonthe. Ka gona re tla hlaloša pele ga Gagwe dilo ka moka tše re di dirilego. Go Baefeso 6:6 re bala gore: “Seo le se se direle gore ba le bone mme ba le rete, eupša ka dipelo tšohle tša lena le dire se se nyakwago ke Modimo, ka ge le le makgoba a Kriste.” Gomme go Bakolose 3:23 go ngwetše gore: “Sengwe le sengwe se le se dirago le se dire ka pelo ka moka, mo nkego ga le se direle motho, le se direla Morena.”

A re gopoleng gore ditiro tša rena di bolela kudu go e na le mantšu a rena. Bontši bja bašomi-gotee ba rena ba tla tseba gore re Bakriste le ge re sa bolela ka yona. Ditiro tša rena, lega go le bjalo, di ka hlohleletša goba go dira gore mošomi-gotee yo a sa dumelego goba yo a nyakgo go dumela a lahlegelwe ke kgahlego ya go ka tseba Modimo bokaone, goba a se nyake seo ka mo go feletšego. A re kgopele Modimo go re etela pela ka Moya wa Gagwe wo Mokgethwa letšatši ka moka go bolela, go tliša kholofelo le go hlohleletša ba bangwe go Mo tseba ka bokgauswi. Modimo a go šegofatše.