Ke tla – Letšatši la 3

Ke bogetše filimi ya diphoofolo morago bjale le morwedi wa ka. Go e tee ya ditiragalo, dihlora tše pedi di eme lebopong la lewatle. Gateetee lephoto la bogolo bja tsunami la tšwelela, le etla lebopong. Dihlora tša tšhoga ge di lemoga gore di ka khupetša ke lephoto.

Boikarabelo bja dihlora tše pedi bo be bo fapana. Sehlora sa pele sa tšhoga gomme sa thoma go kitimakitima se nyaka lefelo la go khuta. Sehlora sa bobedi sa ema gomme ka boitshepo sa lebelela lephoto o ka re se be se tseba gore selo goba motho o kgauswi le go le emiša. Gomme, ge lephoto le le kgauswi le go fihla lebopong, le khupetša dihlora, la kgahla. Go tšwa go gongwe morago ga lephoto, meetse a thoma go kgahla gomme lehlwa la fihla lephotong pele le fihla lebopong.

Maphelong a rena go a diraga ka dinako tše dingwe gore le rena re ba le maphoto a bogolo bja tsunami a a re lebilego, a ikemišeditše go re khupetša. Le tla ka sebopego sa, mohlala, kgalemo ye e fošagetšego lefelong la mošomo, tlhalo ye e lego kgauswi le go direga, tobo ya ditšhelete goba mohlomongwe ditaba tše mpe ka tša maphelo a gago. Ka tšhošetšo yeo ya gore re tla khupetšwa, le rena, go swana le dihlora, re na le kgetho ya go ka tšhoga re le gare re kitimakitima ka go tlalela re nyaka tsela ya go tšwa, goba re ka, bjalo ka sehlora sa bobedi, rerišana taba yeo le Modimo gomme ka boitshepo le tumelo re lete lebopong, re mo dumelela go lwa legatong la rena.

Ya morago ke se Baisraele ba se dirilego. Go Eksodose 14 re bala gore ba ikhwetša boemong moo lewatle le lego pele ga bona gomme Baegepeta ba ba boifišago ba le ka morago ga bona. Theeletša mantšu a Moshe go temana ya 13-14: “Se boifeng! Emang le tie, gomme le tla bona se Morena a tlago go se dira go le phološa lehono; le ka se tsoge le bone Baegepeta ba gape. Morena o tla le hlabanela, mme lena le ka se itapiše ka selo.” Go Doiteronomio 20:4 re bala gore: “Morena Modimo wa lena o ya le lena, mme o tla dira gore le fenye.” Gomme madira a maatla a tšhošetša go hlasela Juda. Gape, Modimo a laela batho go 2 Dikronika 20:17: “Ntwa ye le ka se e lwe. Lena le no ema maemong a lena le letele; le tla bona manaba a lena Morena a le fenyeditše ona.”

Ge re lemoga gore boemo bja rena bo a re palela gomme re bitša Modimo, Mohlodi wa lefase, ka pelo ye e hlwekilego, re a tseba gore o lwa legatong la rena. Lephoto la ka no tla, le lehlwa le lona. Karabo le katlego di ka ba kgauswi kudu go feta ka mo o naganago. Tsepeletša mahlo a gago go Yena. Modimo a go šegofatše.