Kgaugelo ya Modimo, lerato le maatla – Letšatši la 2

Ge selemo se thoma, go ba le ditšhošane tše ntši. Gateetee, go be go na le ditšhošane ka ntlong ya ka mafelong a go fapanafapana, di sepela ka methaladi e metelele. Gape di be di le ka gare ga diraka tša khitšhing moo ke beago dijo. Ke bea dilo ka moka tše nkago kgona ka gare ga ditšhelo tša plastiki, eupša ditšhošane tša se timelele. Mafelelong, ge ke tennwe, ke pakolotše le go hlatswa diraka, le go fothela go dikologa mamati ka moka a diraka. Ke be ke sa nyake go dira seo, eupša ke botša bjang ditšhošane gore ga di a amogelwa ka gare ga diraka tša ka tša khitšhing?

O duma gore o ka šogana le ditšhošane ka tsela e fapanego. Ge fela o ka di botša gore o nyaka go ba mogwera wa tšona le gore o nyaka go di thuša. O tla leta nako e telele gore tšhošane e go lebelele le gore e yo botša tše dingwe gore e ka hlatsetša gore o a phela. Seo se ka se direge. Ge ditšhošane di sa tle go wena, wena o swanetše go ya go tšona. O swanetše go ba tšhošane gomme o tla kgona go bontšha go phela ga gago le go fihliša molaetša ka leleme la tšona.

Se ke sona se Modimo a se dirilego go rena batho. Modimo o bile motho le go itsebagatša go rena. Lentšu mo ke “go iponagatša”. Modimo o iponagaditše.

Ga re, ka gona, hlatsetše gore Modimo o gona. Modimo o itlhatsetša ka boyena – ka tlhago, ka Bibeleng le kudukudu go Jesu Kriste. Ge o lebelela Jesu ka kelohloko, o tla bona yo Modimo a lego yena. Ka ge motho a kgona go tseba mothadi ka diswantšho tša gagwe tše di thadilwego, ka gona motho o kgona go tseba Modimo ka Jesu Kriste (Johanese 14:9).