Kholofelo e mpsha (Karolo ya 2) – Letšatši la 1

Naa o rapelela phološo ya motho yo o mo ratago? O se ke wa felelwa ke kholofelo ya katlego. Modimo o kwa dithapelo tša rena. Se ke se mmadi yo mongwe le lapa la gagwe ba itemogetšego sona:

Mariëtte: “Rakgolo wa ka wa mengwaga ye 89 o phetše gabotse go fihlela a lwala ngwagola. O be a otlela ka boyena gomme a na le lekgarebe le a bego a le iša paesekopong kgafetšakgafetša goba mabenkeleng a bojelo. Le ge go le bjalo, bjalo ka lapa, re tsebile gore rakgolo wa ka o be a se na tswalano le Jesu Kriste. Go tloga bjaneng, mma o mpoditše gore ke rapelele phološo ya gagwe. Nako le nako ge yo mongwe a leka go bolela le yena ka taba yeo, o be a gana gomme a bolela ka diphošo ka moka tše kereke e di dirilego nakong e fetilego. Pelo ya gagwe e be e thatafetše wa leswika gomme ke Modimo fela yo a bego a ka e fetoša.

“Ge tswalano ya ka le Jesu Kriste e godile kudu, ke lemogile nnete ya legodimo le dihele. Ke be ke tla phela bjang le letswalo la ka, ke tseba gore rakgolo o hlokafetše ka ntle le Jesu? Ke thomile go rapelela phološo ya gagwe ke tiišitše.

“Gare ga ngwagola, rakgolo wa ka a lwala. Re be re sa lemoge bošoro bja bolwetši ka ge a be a phela gabotse le go kgona go sepela ka go phakiša go feta mma wa ka, ge ba be ba itšhudolla, nakong ye, bophelo bja gagwe bja mpefala ka lebelo. Re bokane bjalo ka lapa gomme ra thoma go ikona dijo le go rapelela phološo ya gagwe.

“Nakong ya ketelo ya ka ya pele sepetlele, morago ga go ikona dijo, ke be be tšhogile gannyane. Ka beta pelo gomme ka mmotšiša: Rakgolo, naa o a nyaka go amogela Jesu Kriste bjalo ka Mophološi wa gago? Ke be ke letetše gore o tla gana, eupša a ntebelela gomme a re, ‘Ee’. Ke ile ka makala kudu gomme ka rapela le yena.

“Matšatši a mmalwa ka morago, ke boetše sepetlele. Rakgolo o be a fokola go feta pele. Nakong ya poledišano ya rena, ke mmotšešitše: Rakgolo, naa o a gopola gore ke rapetše le wena beke ya go feta le gore o amogetše Jesu bjalo ka Mophološi wa gago? Nakong ye, o be a sa gopole seo. Ke nyamile ge ke be ke swanetše go lwešana le dikgopolo tša gore o be a lapile kudu le gore o rile ‘ee’ nakong e fetilego, go ntloša morago ga gagwe. Ke lahlile dikgopolo tša ka tša pelaelo gomme ka tšwela pele ka myemyelo: Se tshwenyege, Rakgolo, eupša naa o ka rata go amogela Jesu Kriste bjalo ka Mophološi wa gago? Gape, a araba, ‘Ee,’ gomme ka mo rapelela lekga la bobedi.

“Nakong ya ketelo ya ka ya boraro, rakgolo o be a fokola kudu gomme a sa bolele kudu. Ke be ke nyaka go netefatša gore ga a lahlegelwe ke go ya go ile le Jesu, gomme ka mmotšiša gape: Rakgolo, naa o ka rata go amogela Jesu Kriste bjalo ka Mophološi wa gago? Moo a bego a robetše gona bolaong bja gagwe, ke bone gore o lekile ka mo a ka kgonago go bolela gomme ka go hlaboša lentšu, a araba, ‘Ee!’ Ka dikeledi di elela maramaeng a ka, ke rapetše le yena. Ka pelong ya ka, ke tsebile gore o be a ikemišeditše ka sephetho sa gagwe nakong ye.

“Matšatši a mmalwa ka morago, ke be ke na le batswadi ba ka ge rakgadi wa ka a founa go tšwa sepetlele. Rakgolo o be a hlokafala. Nna le mma wa ka le semeetseng ra swarana ka matsogo gomme ra rapelela tšhireletšo ya Modimo le khutšo go yena. Kgopolong ya ka, ke bone seswantšho sa dibopego tše ntsho, tše di lekilego go utswa moya wa rakgolo. Ge di batamela kgauswi le yena, gateetee tša ema di maketše le go nyama difahlegong tša tšona. Ke be ke sa kwešiše boikarabelo bja tšona. Ge re le gare re rapela, ke boletše gore rakgolo o amogetše Jesu bjalo ka mophološi wa gagwe le gore ke karolo ya mmušo wa seetša. O hlokafetše ka pejana ka morago ga moo.

“Bošegong bjoo, nakong ya ka ya setu, ke botšišitše Modimo gore seswantšho seo se hlaloša eng. Ka pelong ya ka, ke itemogetše gore o be a nyaka go nnea khutšo ya monagano ka pheletšo ya go ya go ile ya rakgolo wa ka. Go fihlela mafelelong a bophelo bja gagwe, go bile le ntwa ka mehla magareng ga seetša le leswiswi ya moya wa gagwe. Batemone ba tlile go tšea moya wa gagwe eupša, ka go makala, ba lemogile gore maano a bona a šomme mengwaga ye 89, eupša a palela mafelelong. Rakgolo wa ka o phološitšwe! Ka mengwaga ye 64, mma wa ka o amogetše karabo go dithapelo tša gagwe tše a thomilego go di rapelela ge a be a sa na le mengwaga ye 16! Modimo o lokile gomme letago ka moka ke la gagwe!”

Mariëtte o nepile. Sathane le batemone ba gagwe ka mehla ba leka go foufatša menagano ya ba ba sa dumelego. Go 2 Bakorinte 4:4 re bala gore: Ke ba ba sa dumelego, bao modimo wa lefase (Sathane) le o ba šitišago go kwešiša. O ba šitiša go bona seetša se se ba bonegelago sa go tšwa go Taba ye Botse ya letago la Kriste, yo e lego yena seswantšho sa Modimo. Le ge go le bjalo, go na le menyetla ya bobedi ge re sokologa dibeng tša rena le go amogela Jesu Kriste bjalo ka Mophološi wa rena. Go Lukase 23:43 Jesu o boletše ka modiradibe yo a lego kgauswi le yena sefapanong: “Ruri, ke go botša gore lehono o tla ba le nna paradeising.” A re tšweleng pele go rapelela bagwera le malapa a rena ba ba se nago le tswalano le Kriste. Ka tsela ye, re tla netefatša gore re tla ba le bona go ya go ile legodimong! Modimo a go šegofatše.