Kholofelo e mpsha (Karolo ya 2) – Letšatši la 10

Etla le nna go ya morago nakong. Ke thapama ya Labohlano pele ga 15:00. Mmotong wa Kalvari, madi a maswa a rotha go tšwa dinthong tša monna yo a lekeletšego sefapanong mo gare. Diiri pele, o apešitšwe kgare ya meetlwa pele mmele wa gagwe o tlaišwa go fihlela o se sa tsebja. O nyaka go goeletša le go omanya mašole a a emego ka tlase ga sefapano a mo kwerago. Ba dira phošo. Naa ga ba lemoge gore monna yo ke mang?

Gateetee, go ba le leswiswi. Moya o maatla o goga diaparo mola lefase le thoma go šišinyega ka tlase ga maoto a gago. “Eloi, Eloi, lama sabachthani?” (Modimo wa ka, Modimo wa ka, o ntlogeletše eng?), monna sefapanong o a goeletša. O kitimela kgauswi le sefapano. O nyaka go ba kgauswi le yena. Hlogo ya monna ka go nayana e sepela go ya kgareng ya gagwe. Mahlo a lena a kopana nakwana. A gago a tletše ka go makala, go se kgolwe le bohloko. A gagwe, a tletše ka lethabo fela. E ba fela nakwana pele a buša moya la mafelelo.

Dikeledi di elela sefahlegong sa gago. Go lebelela gatee go be go lekane go wena go lemoga gore Jesu o lekeletše sefapanong ka lebaka la gago. O neetše bophelo bja gagwe ka lebaka la gago. Gomme ge a ka boetša nako morago go ya Serapeng sa Getsemane, a ka kgetha go hlokafala legatong la gago, gape!

Jesu o tsebile gore, bjalo ka badiradibe, re ka se tsene bogoneng bjo bokgethwa bja Modimo. Ka lebaka le, o ithaopile go neela ka bophelo bja gagwe. Le ge go le bjalo, ke a ipotšiša ge e ba o swaragane kudu ka dikarata, matšoba le dimpho tša go keteka Letšatši la Baratani, moo e lego gore o lebetše ka tiro e kgolo ya nako ka moka?

Modimo o kganyoga go ba le tswalano le wena. Ke ka lebaka leo a rometšego, mengwaga ye 2 000 ya go feta, Morwa wa gagwe lefaseng. Go Johanese 3:16 re bala gore: Gobane Modimo o ratile lefase kudu mo a ilego a ba a le fa Morwa wa gagwe a le noši, gore mang le mang yo a dumelago go yena a se lahlege, eupša a be le bophelo bjo bo sa felego. Gomme go Baroma 8:38-39, lerato le go rena le a tiišetšwa: Gobane ke tseba ntle le pelaelo gore ga go se se kago re aroganya le Modimo yo a re ratago: ga se lehu goba bophelo, ga se barongwa goba magoši a semoya goba balaodi ba semoya, goba dilo tša gonabjale goba tša ka moso, ga se sa kua godimo sebakabakeng, goba sa kua fase bodulabahu – gare ga tšohle tše di hlodilwego ga go se se kago re aroganya le Modimo yo a re ratago ka Kriste Jesu, Morena wa rena.

Modimo o rometše Jesu, a tseba gore o re hlodile ka tokologo ya boikgethelo. Ka gona, re ka kgetha go mo hlankela goba go mo gana. Ke eng kgetho ya gago? Go oketša moo, ke neng la mafelelo moo o lebogilego Modimo gore o rometše Morwa wa gagwe go hlokafala legatong la gago? Modimo a go šegofatše.