Kholofelo e mpsha (Karolo ya 2) – Letšatši la 16

Naa o ikwa o ka re o kgauswi le go rola mošomo wa gao lehono, ka lebaka la molaodi wa gago wa go hloka botho goba boitshwaro bja mošomi-gotee bja makgwakgwa? Ke neng la mafelelo moo o ba rapeletšego? Ge o ka bolela nnete, naa o šetše o thomile go bapala ka mošomo wa gago goba o sa o bona bjalo ka mpho go tšwa go Modimo?

Naa o a lemoga gore go ba le mošomo go go bea boemong bjo bokaone go feta palo e kgolo ya setšhaba sa batho ba bagolo, bao ba sa šomego ga bjale? O be o tseba gore go ba le dijo ka ntlong go go bea boemong bjo bokaone go feta bontši bja batho bao, go ya ka dipalopalo, ba se nago dijo? Mohlomongwe, re swanetše re thome go tsepelela go se re nago le sona, go e na le se re se nago sona.

Ke nyaka go go nea melao ye mehlano ya Bibele ya lefelong la mošomo ye e kago go thuša go swaragana le ditlhohlo tše boima ka mokgwa wo bonolo.

MOLAO WA 1: ŠOMA EKA MODIMO KE MOTHWADI WA GAGO
Go Baefeso 6:7 re bala gore: Le ba šomele ka dipelo tše ditšhweu mo nkego le šomela Morena, e sego batho. Naa o šomela go thabiša Modimo goba go kgahla molaodi wa gago?

MOLAO WA 2: KGOPELA BOHLALE LE TLHAHLO YA MODIMO
Go Jakobose 1:5 re bala gore: Eupša ge mo gare ga lena go ka ba le yo a hlokago bohlale, a bo kgopele go Modimo, gomme Modimo o tla mo fa bjona, ka gobane yena o fa bohle ka go se timane le ka go se balabale. Ke mang yo o nyakago go bolela le yena ge gateetee o lebeletšane le leboto gomme o sa tsebe gore o tla swaragana bjang le tlhohlo ye e itšego? Modimo, inthanete goba bašomi-gotee ba gago?

MOLAO WA 3: DIRA KA POTEGO KA DINAKO KA MOKA
Go Doiteronomio 25:15-16: “Le šomiše dikeloboima le dikelo tša mmakgonthe tše di tshephegago, gore le tle le phele nako ye telele nageng ye Morena Modimo wa lena a le fago yona.” Naa o na le mellwane go ditiro tša gago lefelong la mošomo goba go sa na le mafelo a o sa kwanantšhago go wona?

MOLAO WA 4: DIRA MODIMO KAROLO YA MERERO YA GAGO
Go Diema 16:3 re bala gore: Gafela Morena tše o di dirago, gomme o tla atlega mererong ya gago. Naa o kgopela tlhahlo go Modimo pele o swaragana le diprotšeke tše mpsha goba fela ge o thoma go boifa ge o palela?

MOLAO WA 5: SE BOLELE FELA, ŠOMA KA THATA!
Go Diema 14:23 re bala gore: Go katana go tlišetša motho moputso, go etiša leleme pele gona go a mo diitša. Naa o motho yo a lekago go dira tše nnyane ka mo go kgonegago lefelong la mošomo goba Modimo a ka go tshepha go dira tše kaonekaone boemong bjo bongwe le bjo bongwe?

A re lebogeng Modimo ka mošomo wa rena lehono re gopole gore re šomela yena e se fela balaodi ba rena. A re mo laletšeng ka pela e sa le goseng lefelong la rena la mošomo le go tshepha yena go re hlahla ka Moya wa gagwe wo Mokgethwa, pele mathata a hlaga. A re tsebegeng bjalo ka batho ba potego, re bolela le Modimo pele re swaragana le protšeke e mpsha le go šoma ka thata go dira gore e atlege. A re lebogeng se re nago le sona le go emiša go tsepelela go se re se nago le sona. Modimo a go šegofatše.