Kholofelo e mpsha (Karolo ya 2) – Letšatši la 18

Kua Egepeta, go kgahlanong le molao go bolela gore o Mokriste. Go sa šetšwe dikiletšo tše, Modimo o sa šoma ka ditsela tše maatla go tliša batho go yena. Yo mongwe wa bašomi-gotee ba ka o boile go tšwa Egepeta, moo ba bilego le khonferense ya thapelo ya kereke ya ka sephiring. O abile bopaki bjo maatla bja mosadi yo a kopanego le yena fao yo a bitšwago Maggie:

Pelo ya Maggie e betha ka lebelo gomme diatla tša gagwe di tletše kudumela, ge a dula setulong sa ka morago sa thekisi. “Bolela le mootledi ka nna,” a kwa Moya wo Mokgethwa o mo sebela. O be a nyaka, eupša nako le nako ge a lebelela diaparo tša monna tša setšo le maledu a matelele, a a bontšhago potego ya gagwe go bodumedi bja gagwe, o be a nyama kudu. Go thweng ge e ba o botša bahlankedi ba mmušo gomme o a ahlolelwa. O na le lapa kua gae le a swanetšego a nagane ka lona.

Ge mootledi a ema pele ga lefelo la mošomo la Maggie, o be a ikwa o ka re o tlo idibala. Pelo ya gagwe e betha ka lebelo gomme mogolo wa gagwe wa oma. “Bolela le monna ka Nna. Mmotše gore ke a mo rata …,” a sebelwa gape, ge a e tšwa ka koloing. O tsebile gore o be a swanetše go obamela. Ge a nea mootledi tšhelete, o tšere monyetla wa gagwe ka lefoko le bonolo: “Moo ke tšhelete. Se sengwe gape, Jesu o go rata kudukudu!” A retologa gore a sepele ge a ekwa lebati la thekisi le bulega, o nyakile a thoma go kitima. “Ema! Hle ema!” mootledi wa thekisi a mmitša, ka go akgofa lentšung la gagwe. “Ke swanetše go bolela le wena. Mphe metsotso e mehlano ya nako ya gago!”

Maggie o boetše morago thekising ka poifo. Monna yo o nyakang go yena? Ge a fihla thekising, o maketše go bona go akgofa ka mahlong a monna. O nametše ka thekising ka go dikadika moo mootledi a thomilego go mo anegela kanegelo ya gagwe. Dikgwedi tše mmalwa tša go feta, o bile le ditoro tše nne moo Jesu a tšweletšego go yena. Nako le nako O boditše monna gore a mo latele. Monna, le ge go le bjalo, o be a boifa kudu ka ge a be a le karolo ya sehlopha se sengwe sa tumelo. Bošego pele ba kopana, Jesu o tšweletše go yena ka mantšu: “Go bonala o ka re ga o nyake go Ntatela. Gosasa mosadi o tla bolela le wena ka thekising ya gago mabapi le Nna. Gomme o tla tseba gore ke a phela.” Moo ka gare ga thekisi, go bapa le mmila wa leemaema wa Egepeta, ka lebaka la go theeletša ga gagwe, Maggie o bile le monyetla wa go iša Moegepeta go Jesu Kriste.

Modimo o hlodile batho ka moka gore ba be le tswalano le yena. Ka dinako tše dingwe, re hloka go ba linki go ketane ya gagwe go bega ditaba tše botse tša Jesu Kriste. Go 1 Bakorinte 3:6,7,9, Paulose o ngwetše: Nna ke bjetše peu, Apolose a e nošetša; eupša wa go e mediša e bile Modimo. Ka gona, wa go e bjala le wa go e nošetša ga ba balwe, go balwa Modimo, ka gobane ke yena a e medišago. Gobane rena re badirišani mošomong wa Modimo, gomme lena le tšhemo ya Modimo, ebile ke lena moago wa Modimo.

Modimo ke Modimo wa go kgona go hlama gomme o diriša ditsela tše di fapafapanego go iponagatša go rena. Naa o a botega le go ba gona go ba sedirišwa ge a go hloka? Go 1 Samuele 15:22, Samuele o gateletše bohlokwa bja go theeletša Modimo: “A ke eng seo se kgahlago Morena kudu: go phetha ditaelo tša gagwe, goba go mo direla dihlabelo tša go tšhungwa ka moka le dihlabelo tše dingwe? Go kaone go mo theetša go na le gore o mo direle sehlabelo ka dikgapa tše kaonekaone.”

Naa o ka akanya legodimo le betha matsogo ge Maggie mafelelong a tsena ka thekising gape? Nako e telele, yena le maloko a gagwe a kereke ba rapeletše batho ba ba timetšego nageng ya gabobona. Nakong ye, o bile linki ya mafelelo go ketane ya Modimo go netefatša boyo bja mafelelo bja motho, yo a bego a timetše, go fetoga go ya go ile. Naa o tla dira ka mo go swango lehono? Modimo a go šegofatše.