Kholofelo e mpsha (Karolo ya 2) – Letšatši la 20

“Thobela Benescke, ke Koko Annie go tšwa Atlantis,” a itsebiša go nna mogaleng. A tšwela pele go mpotša gore motlogolo wa gagwe, Tamerin, o nyaka go ya moletlong wa marematlou, eupša ba palela ke go lefela tšhelete ya gore a ye fao.

Kua Radio Tygerberg, re bile le protšeke ya moletlo wa marematlou moo batheeletši ba bego ba kgetha barutwana ba marematlou bao ba bego ba ka rata go ya, eupša ba palela ke go lefa tšheletše ye e nyakegago. Re kgetha bana ba marematlou ba bane go tšwa go lenaneo gomme ra ya dikolong tša bona go yo ba makatša ka ditaba tše kaonekaone tša taelano ya ditoro tša bona. Moputso o akaretša roko, sutu, go thakga sefahlego, moriri, dibenyabenyane, dieta le senamelwa sa go ya moletlong. Go molaleng gore batho ba bantši ba a lla ge re ba begela ditaba tše botse. Re rekota e sa pele, gomme ka morago ra begela batheeletši ba rena moyeng.

Re be re šetše re tsebišitše bathopasefoka gomme re le gare re aba dipoelo go batheeletši, ge Koko Annie a founa la pele. Phetolo ya ka go yena e bile: “Koko Annie, ke duma ge e ba re ke thuša, ka bomadimabe, re šetse re tsebišitše bathopasefoka.” Se ga se a mo nola moko. Mesong e latelago, ke amogetše mogala go tšwa go yena ka mantšu: “Thobela Benescke, ke Koko Annie go tšwa Atlantis. Ke a tseba ke boletše le wena maabane, eupša ke nyaka go tseba ge e ba Modimo ga a so re thuše.” Se se tšwetše pele beke ka moka. Nako le nako ge ke fihla tafoleng ya ka, ke be ke hwetša molaetša wa gore Koko Annie o founne gape. Phegelelo ya gagwe e dirile gore ke myemyele. Ka nnete o be a nyaka go thuša motlogolo wa gagwe.

Ge ke be ke ruma meputso ye re e amogetšego go tšwa go bathekgi ba rena le batheeletši, ke lemogile gore ka nnete re na le dithoto tše ntši go ka thuša morutwana yo mongwe gape. Gateetee ke founetše Koko Annie ka ditaba tše botse. Go bile le dikeledi tše ntši tša lethabo ka lehlakoreng la gagwe.

Kanegelo ya Koko Annie e kgwathile dipelo tša batheeletši gomme batho ba mmalwa ba rile ba tla ba thuša ka go ba rekela dijo. Matšatši a mmalwa ka morago, yena le batswadi ba Tamerin ba tlile studiong go tlo tšea dithoto. Mo, ba pakile ka go loka ga Modimo go bona. Ngwagola, lapa la bona le bile karolo ya kereke ya bona kua Atlantis ye e bego e rapela le go ikona dijo. Go bile le lepokisana ka kerekeng ya bona la dikgopelo tša thapelo. Lapa la Spandiel le bile le dikgopelo tše bohlokwa tše pedi: e tee, ya gore Modimo o tla dira tsela ya gore Tamerin a ye moletlong wa marematlou gomme ya bobedi, Tamerin o be a šoma gabotse kua sekolong eupša a hloka basari, ka ge ba be ba se na tšhelete.
Lapa la Spandiel le be le se na leano la B ka ge tatago Tamerin a lahlegetšwe ke mošomo wa gagwe gomme a nyakana le mošomo dikgwedi a sa o hwetše. Mmagwe o be a na le ngwana o monnyane yo a bego a swanetše go mo hlokomela. Se ba se dirilego e bile go tshepha Modimo. Dipoelo? Matšatši a mmalwa ka morago ga ge re founetše Tamerin go mo tsebiša ditaba tše botse tša taelano ya marematlou, o amogetše lengwalo go tšwa Yunibesethi ya Stellenbosch, le mo tsebiša gore o hweditše basari ya go ithutela bongaka. Lapa le bile fela le Modimo, eupša o be a lekane go bona.

Go Baefeso 3:20-21 re bala gore: Yena a kgonago go dira tše di fetago kudu tše re kago di kgopela goba ra di nagana, ka maatla a gagwe a a šomago mo go rena, a a tumišwe ke ba meloko yohle ka kerekeng le go Kriste Jesu go ya go ile! Amene.

Naa o ikhwetša boemong bja tlalelo moo le wena o emego ka mokokotlo kgahlanong le leboto? Mohlomongwe lenyalo la gago le a phuhlama, o katana le go ima, o boifa gore o ka felelwa ke mošomo, o na le bolwetši ka lapeng goba ga o tsebe gore o tla lefela bjang dikoloto tša gago mafelelong a kgwedi? Modimo o kgona go dira tše di fetago kudu go feta tše re di kgopelago le go di nagana. O diretše Koko Annie go tšwa Atlantis, gomme a ka go direla le wena. Gopola, ge ka moka tše o nago le tšona e le Modimo, o tla lemoga gore tše ka moka o di hlokago ke Modimo. Tshepha yena, o tla go thuša. Modimo a go šegofatše.