Kholofelo e mpsha (Karolo ya 2) – Letšatši la 3

Naa o rapelela tšhireletšo go ditswalano tša gago le ba o ba ratago letšatši le letšatši? Ge e ba ga go bjalo, o tla hlaselwa gabonolo ke lenaba.

Ka bo-1940, sefofane sa ntwa sa maemo a godimo se dirilwe kua Amerika kua Kampeng ya Sešole sa Difofane ya Lockheed ka ntlenyana ga Los Angeles. E be e le sefofane sa dimilione tše ntšintši sa maemo a godimo sa theknolotši sa nako ya sona.

Mathomong a Ntwa ya Lefase ya Bobedi, madira a U.S. a tšere sephetho sa go šomiša Lockheed bjalo ka bodula difofane go mešomo ya bona e mentši. Se se dirile gore Lockheed e be lefelo le le ka hlaselwago ke lenaba. Ge go e ba le mabarebare a gore Lockheed o tlo hlaselwa ke Majapane, setšhaba go dikologa kampa se ile sa boifa. U.S. e logile tharollo e kgahlišago, ya maano. Ba gakantšhitše kampa le setšhaba se sennyane go e dikologa ka dinete tše phifadu. Go tšwa lefaufaung, go be go bonala o ka re ke tšhemo ye e bulegilego ye e nago le dintlo tša polaseng. Le ge lenaba le fofile godimo ga lefelo le go nyaka go hwetša Lockheed, ga ba e hwetša. Leano le le phološitše diketekete tša maphelo a a se nago molato.

Ge re rapelela tšhireletšo go ditswalano tša rena le go ba re ba ratago, Modimo gape o bea nete ya go gakantšha go rena le leboto la mollo go re dikologa, tikologong ya moya, gore lenaba la rena, Sathane le batemone ba gagwe, le se re gobatše.

Go Jobo 1, re bala gore Sathane o ile go Modimo go yo kgopela tumelelo go leka tumelo ya Jobo. Go temana ya 1:10, o lemogile gore ditlhaselo tša gagwe ga di šome ka lebaka la tšhireletšo ya Modimo: “Ga ke re ke wena o dulago o mo šireleditše ka gohle, yena le lapa la gagwe gotee le tšohle tše a nago le tšona. O šegofaditše tšohle tše a di dirilego, gomme mehlape ya gagwe ya ata kudu.” Gape go Sakaria 2:9, re bala ka tšhireletšo ya Modimo go Jerusalema: “Morena a re yena mong e tla ba morako wa mollo go dikologa motse, le gona o tla dula go wona ka letago la gagwe.”

Naa o phela ka poifo ya tšhireletšo ya gago goba ya ba o ba ratago? Naa go na le ditswalano tše di robegilego bophelong bja gago? Gopola, leano la Modimo go rena ke go phela bophelo bja khutšo le go ipshina ka ditswalano tše botse. Ka gona, a re mo kgopeleng go bea lebota la mollo go dikologa maphelo a rena le ditswalano. Go oketša moo, a re lekeng go phela maphelo a a thabišago Modimo go re šireletša go tšwa ka mahlakoreng ka moka. Modimo a go šegofatše!