Kholofelo e mpsha (Karolo ya 2) – Letšatši la 7

A re re o tsena ka ntlong ya gago ya ditoro gosasa, o na le morekiši wa dintlo. Ka gare, dilo ka moka di bonala di le gabotse – ka mo dilo di lego madulong, mekgabišo le gaešita le bogolo bja ntlo. Gomme, o makale, morekiši wa ntlo a go nea dinotlelo ka mantšu: “Tšea, ke ya gago!” Ge a sepela, o kwa modumo kgojana. O lebelela godimo gomme o lemoga gore: ga go na tlhaka godimo ga ntlo! Ka maru a masomaso a a šetšego a le godimo ga ntlo, o lemoga gore ga go selo se se tlago thibela ledimo go baka tshenyo ntlong ya gago e mpsha!
Ge re palela ke go rapelela tšhireletšo ya malapa a rena goba go hlokomologa go latela melao ya Modimo gore lapa le šome gabotse, re ba nyanyeng ya go ka hlaselwa ke lenaba bjalo ka ge ntlo e hlaselwa ke ledimo, ka lebaka la go hloka tlhaka.

Modimo ke Modimo wa molao gomme o file melao e kwagalago lentšung la gagwe gore malapa a šome gabotse. Naa ke eng molao wa maleba wa lapa? Ge re thala piramiti, Modimo o tla ba kus ntlhoreng, gwa latela monna, a latela ke mosadi, gwa latela bana boemong bja tlase, diphoofolo tša ka gae. Ge sehlopha le ge e le sefe se e tšwa maemong a sona (mohlala, lapa ga le bee Modimo pele, monna ga a tšee boikarabelo bja gagwe bjalo ka moetapele ka gae eupša o bo tlogelela go mosadi, goba mosadi o nyatša taolo ya monna wa gagwe le go leka go laola, goba bana ba lweša batswadi ba bona), go tla ba le le tlhakatlhakano le thulano ka lapeng. Ntlo gateetee ga e sa na tlhaka gomme lenaba le na le tumelelo go baka tshenyo ka lapeng.

Mo ke melao go tšwa lentšung la Modimo mabapi le malapa:

Naa banna ba swanetše go swara bjang basadi ba bona?

• Bakolose 3:19: Lena banna, ratang basadi ba lena gomme le se ba gakalele.
• Baefeso 5:21,25: Motho a ikokobetše go mongwekayena e le ka lebaka la ge le hlompha Kriste. Lena banna, le rate basadi ba lena, bjalo ka ge Kriste le yena a ratile kereke a ba a ikgafela go e hwela.
• 1 Petrose 3:7: … banna, le phedišane le basadi ba lena ka kwešišo ya gore mosadi ke sebjana se se swanetšego go hlekesetšwa. Ka gona, le ba sware ka tlhompho, ka gore le bona ba tlilo fiwa mpho ya bophelo gotee le lena. Seo le se direle gore dithapelo tša lena di se tlo paledišwa ke selo.

Ge monna a rata le go tšeela godimo mosadi wa gagwe, mosadi (le bana) ba itemogela boikwelo bja tšhireletšo le polokego. Ka lebaka la se, bana ba tla swara mmago bona ka tlhompho e kgolo gomme sammaletee, mohlala o mokaone o a hlongwa maphelong a bona wo ba tlago o kopiša manyalong a bona letšatši le lengwe.

Naa basadi ba swanetše go swara banna ba bona bjang?

• Baefeso 5:21-24: Motho a ikokobetše go mongwekayena e le ka lebaka la ge le hlompha Kriste. Lena basadi, le ikokobetše go banna ba lena, go etša ge le ikokobetša go Morena; gobane monna ke hlogo ya mosadi, go no swana le Kriste ge e le hlogo ya kereke; gomme yo Kriste ke Mophološi wa kereke, yona e lego mmele wa gagwe. Bjalo ka ge kereke e ikokobetša go Kriste, basadi le bona ba ikokobetše go banna ba bona go tšohle.

Lerato la monna le tlhompho go mosadi wa gagwe, le baka gore yena a theeletše le go hlompha monna wa gagwe. Go ikokobetša go monna wa gagwe ka gona go ba monyetla, ka ge a ipea ka tlase go yena go ka mo phagamiša ka thekgo le tlhohleletšo, a mo thuša go ba seo Modimo a mo hloletšego go ba sona.

Naa batswadi ba swanetše go swara bana ba bona bjang?

Baefeso 6:4: … le se galefiše bana ba lena. Sa lena e be go ba godiša ka kgalemo le thuto ya Morena.

Bakolose 3:21: … le se tshwenye bana ba lena, gore ba se nolege moko.

Diema 29:17: O kgale ngwana wa gago ka thupa, o tla ikhutša; ka moso o tla go thabiša.

Batswadi ba ka nea bana ba bona maphego go fihla bophagamong bja godimo goba ba ka tlema maphego a bona ka mantšu a ba a šomišago, go aga bana ba bona goba go ba phuhlamiša. A re rapeleleng bohlale go ka godiša bana ba rena ka ditsela tša Modimo.

Naa bana ba swanetše go swara bjang batswadi ba bona?

Baefeso 6:1-3: Lena bana, le hlomphe batswadi ba lena ka ge le le ba ba dumelago go Morena, gomme seo e le se se lokilego. “Hlompha tatago le mmago” ke molao wa mathomo wo o nago le kholofetšo ye e o tlaleletšago ka go re: “gore o tle o atlege, o phele nako ye telele mo lefaseng.”

Naa o hlompha batswadi ba gago ka go ba swara ka tlhompho – le ge o sa dumelelane le tsela ye ba phelago ka yona goba diphetho tše ba di dirago?

Naa go na le tlhaka godimo ga lapa la gago? Gopola, le ge o le motswadi o le tee, Modimo o theeletša dithapelo tša gago gomme o tla go hlahla ka bohlale go godiša bana ba gago ditseleng tša gagwe. Bea Modimo pele bophelong bja gago gomme o tla itemogela khutšo le boiketlo, ge a bea tlhaka e mpsha godimo ga dihlogo tša gago! Modimo a go šegofatše.