Kholofelo e mpsha (Karolo ya 2) – Letšatši la 9

Ke amogetše emeile go tšwa go tate yo a ngwetšwego: “Morwa wa ka o thuntšhitšwe mathomong a 2012 kua Modimolle. Seo se fetošitše bophelo bja ka go ya go ile. Ke na le dipotšišo tše ntši mabapi le tiragalo. Ge e ba go be go le thato ya Modimo, ke tla e amogela, eupša ga ke nagane gore go bjalo.” Ge Anene Booysen wa mengwaga ye 17 go tšwa Bredasdorp a katwa le go bolawa gasehlogo, babadi ba mmalwa ba mpotšišitše gore Modimo o be a le kae nakong ya tiragalo le gore ke ka lebaka la eng a dumeletše seo go direga.

Potšišo ya bogologolo e tšweletše gape: ke ka lebaka la eng Modimo a dumelela bobe go direga lefaseng le? Ga go na karabo e bonolo go potšišo ye. Se re se tsebago, ke gore Modimo ke lerato gomme go mo setla pelo go re bona re tlaišega. Polao kua Modimolle le polao ya Anene, ka gona, go be go se “thato ya Modimo”.

Go Baefeso 6:12 re bala gore: Gobane ya rena ntwa ga se ya go lwa le batho ba nama, ke ya go lwa le meoya ye mebe ya lefaufaung, e lego magoši a semoya, le balaodi ba semoya, le babuši ba lefase le lebe le. Sathane le batemone ba gagwe ba buša lefase. Maikemišetšo a bona ke go baka tshenyo le go leka go sola Modimo ka seo. Go 2 Bakorinte 4:4, Sathane o bitšwa “modimo wa lefase le” yo a šitišago ba ba sa dumelego go bona seetša, gore ba se bone latago la kriste. Batho ba ba se nago tswalano le Jesu Kriste, ka gona, ba tseba goba ba sa tsebe, e ba bao ba goketšwago go leano la Sathane go baka tshenyo. Ka gona, go a kwešišega ka palo ye e sesefalago ya badumedi, re na le bothata bjo bogolo bja dilo tše bjalo ka go thuba, marato ka gare ga manyalo, bomenetša, polao, go kata le mathata a mangwe a mantši setšhabeng sa rena.

Le ge go le bjalo, go na le kholofelo go Jesu Kriste, ka gobane o šetše a fentše bobe sefapanong le go re nea maatla a go dira ka mo go swanago. Go Lukase 10:19 Jesu o rile: “Theeletšang! Ke le fa maatla a gore le gate dinoga le diphepheng, le a gore le fenyetše Sathane sa ruri; gomme ga go se se tla tsogago se le dirile selo.”

Naa re lwa bjang letšatši le letšatši kgahlanong le lenaba? Gopola, re ntweng ya semoya, ye a nyakago dibetša tša semoya. Go Baefeso 6, dihlabani tše re swanetšego go di apara letšatši le letšatši di ngwetšwe:

1) Kefa ya phologo: Lenaba le hlasela kudu dikgopolo tša rena. Ka gona, apara kefa ya gago ka go mpshafatša monagano wa gago letšatši le letšatši.

2) Sephemasefega sa toko: Lemoga gore Jesu o hlokafetše ka lebaka la dibe tša gago le go mo leboga ka sehlabelo seo.

3) Lepanta la therešo: Dira nako ya go bala Bibele. Ke tsela e nnoši ya go fapantšha therešo ya Modimo go maaka a lenaba.

4) Dieta tša go ikemišetša go bega ebangedi: Rapelela bohlale le temogo go tšwa go Moya wo Mokgethwa go tseba gore ke neng mo o ka begago molaetša wa ebangedi le go lokafatša go rapelela motho yo a sa dumelego.

5) Kotse ya tumelo: Swarelela go dikholofetšo tša Modimo go katlego ya gago. Ge tumelo ya gago e tekateka, tumiša Modimo. O ka makatšwa ke ka fao go ka tiišago tumelo ya gago.

6) Tšhoša ya lentšu: Lentšu la Modimo ke sebetša se nnoši ntweng kgahlanong le bobe. Netefatša gore o tseba Mangwalo a Makgethwa ka hlogo ka ge a e ba sebetša ntweng ya gago ya letšatši le letšatši kgahlanong le lenaba.

Go Pesalome 18:30, re bala gore re ka tshepha Modimo go re šireletša: O bjalo ka kotse go bohle bao ba nyakago a ba šireletša. Gomme go 2 Bakorinte 12:9, Paulose o ngwala gore o kgopetše Modimo gararo gore a mo hlomole phatša nameng: “Kgaugelo ya ka e go lekane, gobane maatla a ka a tiile kudu mo go ba ba fokolago.”

O ka gare ga lenyalo le thata, motho yo o mo ratago o a babja kua gae, o lahlegetšwe ke tšhelete e ntši, o katana le go fenya temalelo, o katana le go amogela tiragalo e bohloko bophelong bja gago, tseba gore Modimo o tla go nea tekanyo ya kgaugelo le maatla a o a hlokago go lebeletšana le boemo bja gago. dinakong tše ntši, re itemogela Modimo kudu ka gare ga ledimo maphelong a rena. Ke ka lebaka la eng o sa kgethe go leta o sa fele pelo bogoneng bja gagwe? Modimo a go šegofatše.