Khomotšo go tšwa Lentšung – Letšatši 11

₁₄Fela nna ke botile wena, Morena,

ke re: “O Modimo wa ka.”

₁₅Bophelo bja ka bo laolwa ke wena;

ntlhakodiše diatleng tša manaba a ka,

le go tša bantlhomari.

₁₆Nke o nkedišetše sefahlego sa gago,

nna, mohlanka wa gago;

ntlhakodiše ka leratorato la gago.

₂₂Ke be ke tšhogile ke re o nthakile pele ga gago.

Eupša o kwele sello sa ka mola ke go llela ke nyaka thušo.

₂₄Tiang maatla, betang dipelo,

lena bohle ba le botilego Morena!

₁₈Ke Morena yo a babalelago ba ba mmoifago,

bao ba botilego lerato la gagwe,

kilaphetogo,

₁₉gore a ba phološe lehung,

a ba babalele mehleng ya tlala.

₂₀Rena re holofetše Morena;

ke yena Mothuši le Mošireletši wa rena.

₂₁Re thaba ka gobane re le ba gagwe,

ka gobane re tshephile yena Mokgethwa.

₂₂Morena, anke leratorato la gago

le be le rena, ka ge re botile wena.

₂₉Ge e le nna,

ke a tlaišega, ke bohlokong;

nke o mphološe mme o ntšhireletše, Modimo.

₃₀Ke tla tumiša Modimo ka kopelo;

ke tla mo reta ka go mo leboga.

₃₁Seo ke se se tlago mo kgahla go feta go mo neela sehlabelo sa poo,

powana ya dinaka le ngatha tša mapharo.

₃₂Baikokobetši ge ba di bona ba tla thaba;

lena ba go khunamela Modimo,

tiang maatla.

₃₃Morena o theeletša bahloki,

le batho ba gagwe ba ba lego kgolegong ga a ba nyatše.

₃₄A legodimo le lefase di mo tumiše,

le mawatle le diphedi tšohle tše di lego ka go ona,

₃₅gobane Modimo o tla hlakodiša Sione,

a tsošološa metse ya Juda.

Setšhaba sa gagwe se tla dula gona sa ithopela naga.

₃₆Ditlogolo tša bahlanka ba gagwe di tla e abelwa ya ba lefa la bona;

ba ba mo ratago ba tla dula go yona.