Khomotšo go tšwa Lentšung – Letšatši 24

₁₃Morena o hlokomela bao ba mmoifago,

go swana le tatagobana ge a hlokomela bana ba gagwe.

₁Ke tšhabela go wena, Morena,

ke se tsoge ke jelwe ke dihlong.

O ntlhakodiše ka maatla a gago a go phološa.

₂Ntlhwaele tsebe!

Ntlhakodiše ka pela!

Eba mošireletši wa ka yo ke tšhabelago go yena,

le sebo sa go ntšhireletša.

₃O mošireletši wa ka le sebo sa ka.

Ka ge o ntlhokomela,

o tla ntlhahla wa nketetša.

₄Ntanyolle sefung se ba ntheilego ka sona.

gobane ke wena setšhabelo sa ka.

₅Ke gafela moya wa ka diatleng tša gago,

gobane o tla mphološa, Morena.

wena Modimo yo a botegago.

₈O tseba ka mo ke tshwenyegilego ka gona.

Tšhela meokgo ya ka ka lekukeng la gago.

A ke re e ngwadilwe pukung ya gago?

₉Mohla ke go bitša,

manaba a ka a tla katakata.

Se ke se tsebago ke gore Modimo o ema le nna.

₁Ke be ke letile Morena ka tlhologelo,

mme a ntlhwaela tsebe,

a nkwa ge ke mo llela.

₂A nntšha moleteng wa tahlego,

moo tebetebeng ya leraga,

a mpea sebong,

a ntshepediša mo go omilego.

₃A mpha kopelo ye mpsha,

sereto sa Modimo wa rena.

Ba bantši ba tla re go kwa kopelo ya ka ba gakgamala, ba tshepha Morena.

₁Ge nkabe Morena a se eme le rena – a Baisraele ba realo, ba re:

₂“Ge nkabe Morena a se eme le rena mola manaba a be a re hlasela,

₃nkabe ba re kwameditše re phela,

ge ba be ba re tukela bogale;

₄nkabe morwalela o re gogotše,

nkabe lefula le re pipeditše;

₅ee, meetse a sephalo nkabe a re pipeditše.”

₆A re tumišeng Morena,

yo a sa kago a ba lesa ba re rwaetša.

₇Re phonyokgile boka nonyana seropong sa mothei;

seropo sa re go robega, ra phonyokga.

₈Thušo ya rena e tšwa go Morena,

yena Mohlodi wa legodimo le lefase.